ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު، މަޖިލިސް މެންބަރެއްގެ ހައިސިއްޔަތުން ލިބިވަޑައިގަންނަވާ މުސާރަ ޖެނުއަރީ މަހުން ފެށިގެން ނުނަންގަވާ ކަމަށް ވިދާޅުވެއްޖެއެވެ.

ސްރީލަންކާގެ "ދަ މޯނިން" އަށް ދެއްވި އިންޓަވިއުއެއްގައި ވާހަކަ ދައްކަވަމުން ރައީސް ނަޝީދު ވިދާޅުވީ ސީވީއެފްގައި މަސައްކަތް ކުރައްވަން ފެއްޓެވީ ފެބްރުއަރީ މަހު ކަމަށާއި މަޖިލިސް މެންބަރެއްގެ ހައިސިއްޔަތުން ލިބިވަޑައިގަންނަވާ މުސާރަ ޖެނުއަރީ މަހުން ފެށިގެން ނުނަންގަވާ ކަމަށެވެ.

ރައީސް ނަޝީދު މިހެން ވިދާޅުވިއިރު މިއަހަރުގެ އެޕްރީލް މަހުން ފެށިގެން ދައުރުގައި ބާކީ އޮތް މުއްދަތުގައި މަޖިލިސް މެމްބަރެއްގެ ހައިސިއްޔަތުން ލިބިވަޑައިގަންނަވާ މުސާރަ އުނިކޮށްދެއްވުމަށް އެދިވަޑައިގެން އެމަނިކުފާނު ވަނީ މަޖިލީހުގެ ރައީސް މުހައްމަދު އަސްލަމަށް ސިޓީއެއް ފޮނުއްވާފަ އެވެ.

ރައީސް ނަޝީދުގެ ދިރިއުޅުއްވުން ގާނާއަށް ބަދަލުކުރެއްވީ މިއަހަރުގެ ޖެނުއަރީ މަހު އެވެ.

މީގެ އިތުރުން ރައީސް ނަޝީދު ވަނީ ސިޔާސީ މަސައްކަތްތަކުން މި ވަގުތަށް ދުރަށްޖެހިވަޑައިގަންނަވާ ކަމަށް މިދިޔަ އަހަރުގެ ޑިސެމްބަރު މަހު އިއުލާން ކުރައްވާފައިވީ ނަމަވެސް ނިމިދިޔަ މަޖިލިސް އިންތިޚާބުގެ ޑިމޮކްރެޓްސްގެ ކެމްޕޭން ހަރަކާތްތަކުގައި އެމަނިކުފާނު ވަނީ އަމަލީގޮތުން ބައިވެރިވެފައެވެ.