އަންހެނުންނަށް ފުރުސަތު ފަހިކޮށްދޭން މަސައްކަތް ނުކޮށްފިނަމަ 21 ވަނަ ރައްޔިތުންގެ މަޖިލީހުގެ އެއްވެސް ގޮނޑިއެއް ތަމްސީލް ކުރުމަށްޓަކައި އަންހެނެއް ނީންނާނެ ކަމަށް އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.

ރޮޒައިނާ މިފަދައިން ވިދާޅުފައިވަނީ މިއަދުގެ ޖަލްސާގައި ވާހަކަދައްކަވަމުންނެވެ.

އެގޮތުން އޭނާ ވިދާޅުވީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އިޞްލާޙު ގެނައުމުގެ ބިލަކީ މަޖިލީހަށް އިންތިހާބުވާ މެމްބަރުންގެ ތެރޭގައި އަންހެނުން ހިއްސާ ކަށަވަރު ކުރުމަށާއި، ރައްޔިތުންގެ މަސްލަހަތާއި ގައުމީ މަސްލަހަތު ހިމާޔަތް ކުރުމުގައި އަންހެނުންގެ ދައުރު އިތުރުކޮށް ގައުމުގެ މުހިންމު ނިންމުންތަކުގައި އަންހެނުންގެ ބަސް ހިމެނުމަށް ހުށަހެޅި ބިލެއްކަމަށެވެ.

ރޮޒައިނާ ވިދާޅުވީ މަޖިލީހަށް އަންހެނުން ގެންނަން އުޅެނީ ފިރިހެނުންނަށް ދެރައެއް ދިނުމުގެ މަގްސަދުގައި ނޫން ކަމަށެވެ.

އަދި މަޖިލީހުގައި ކުރާ މަސައްކަތާއި މުޅި ޤައުމާ ދޭތެރޭ ވިސްނާލާއިރު އަންހެނުންގެ ހިޔާލު ކޮންމެހެން ވެސް ބޭނުންވާ ކަމަށް ވެސް ރޮޒައިނާ ވިދާޅުވިއެވެ.

އެހެންކަމުން އަންހެނުންގެ ވިސްނުން ކޮންމެހެން ބޭނުންވާކަމެއްގެ މަޝްވަރާ އަދި ބަހުސެއް ކުރިޔަށް ގެންދެވޭނީ އެ ހިޔާލު ވެސް ހުރި ބަޔަކު ތިބެގެންކަމަށް ވެސް ރޮޒެއިނާ ވިދާޅުވިއެވެ.

އަދި އަންހެނުން މަޖިލީހަށް ހޮވޭ ނިސްބަތް ދަށްވެ، ދެން އަންނަ ދައުރަކަށް އެއްވެސް ގޮނޑިއެއް އަންހެން ކެނޑިޑޭޓަކަށް ކާމިޔާބު ނުކުރެވުމުގެ ފުރުސަތު އެބައޮތްކަމަށް ވިދާޅުވެ ރޮޒައިނާ ވަނީ ކަންބޮޑުވުން ފާޅުކޮށްފައެވެ.