ޤައުމިއްޔަތާ، ސަގާފަތް ރަމްޒުކޮށްދޭ ގޮތަށް ފާލަން ތަރައްގީކުރަން ކަމަށްބުނެ އަނެއްކާވެސް ދައުލަތުގެ ބަޖެޓުން ބޭކާރު ޚަރަދެއް ކުރަން، ޚަރަދު ކުޑަކޮށް ސަރުކާރު ހިންގާނެ ކަމުގެ ވައުދާއެކު އައި ރައީސް ޑރ. މުހައްމަދު މުއިއްޒުގެ ސަރުކާރުން ނިންމައިފިއެވެ.

ރަސްމީ ފާލަން ތަރައްގީ ކުރުމުގެ މަސައްކަތް ކޮންސްޓްރަކްޝަން މިނިސްޓްރީން އެމްޓީސީސީއާ ހަވާލު ކޮށްފައިވާއިރު، އެ ކުންފުނިން ވަނީ ފާލަން ތަރައްގީ ކުރުމުގެ އަމަލީ މަސައްކަތް ފަށާފައެވެ.

މި މަސައްކަތާ ގުޅޭގޮތުން އެމްޓީސީސީން ބުނެފައިވަނީ، ރަސްމީ ފާލަމަކީ ދިވެހި ޖުމްހޫރިއްޔާގެ އިއްޒަތާއި، ސިޔާދަތާއި، ދިވެހިންގެ އަމިއްލަވަންތަކަން ރަމުޒުކޮށްދޭ މުހިންމު ބިނާއެއް ކަމަށެވެ. އެގޮތުން ރާއްޖޭގެ މިނިވަންކަމަށް 50 އަހަރު ފުރުމުގެ މުނާސަބަތާ ގުޅިގެން ފާލަށް އެންމެ ފަހުންވެސް ފަރުމާކުރީ އެކުންފުނިންކަން ފާހަގަކޮށްފައިވެއެވެ.

އެމްޓީސީސީން ބުނެފައިވަނީ ފާލަން މިހާރު ހުރީ ވަރަށް ބޮޑަށް ވީރާނާވެ މަރާމާތަށް ބޭނުންވެފައި ކަމަށެވެ. އެމްޓީސީސީއިން ހާމަކޮށްފައިވާ ގޮތުގައި، ރަސްމީ ފާލަން ނުވަތަ އިއްޒުންދީން ފާލަން އަލުން ތަރައްގީކުރުމަށް 11.7 މިލިއަން ރުފިޔާ ޚަރަދުވާނެއެވެ. މަސައްކަތް ފުރިހަމަކުރަން ދީފައިވާ މުއްދަތަކީ 270 ދުވަހެވެ.

ރާއްޖޭގެ އިގްތިސޯދު ރަގަޅު ނޫންކަމަށް ދުނިޔޭގެ މާލީ އިދާރާތަކުންވެސް ހާމަކޮށްފައިވަނިކޮށް، މިފަދަ ބޮޑު ޚަރަދެއް ދައުލަތުގެ މާލިއްޔާއިން ކުރުމަކީ ސަރުކާރުން މިވަގުތަށް ކުރަން އެންމެ ރަގަޅު ކަމެއްތޯ އިގްތިސޯދީ މާހިރުން ގެންދަނީ ސުވާލު އުފައްދަމުންނެވެ.