އިންޑިއާ ރާޑަރު ސިސްޓަމްތަކާއި ގުޅޭގޮތުން މިއަދު ސަރުކާރުގައި ތިއްބެވި ބޭފުޅުން ވަނީ އިދިކޮޅުގައި ތިއްބެވިއިރު ހަގީގަތާއި ހިލާފު ގިނަ ވާހަކަތައް ދައްކަވާފައެވެ.

އެކަމުގެ ސަބަބުން ރާއްޖޭގެ މިނިވަންކަމާއި އިސްތިގުލާލަށް ނެދެވޭ އަސަރުކުރާ ކަމަށް ވިދާޅުވެފައިވެއެވެ. 27 މާރިޗު 2022 ގައި އިންޑިއާގެ އެހީގައި ގާއިމުކުރި ރާޑަރު ސިސްޓަމް އިފްތިތާހުކުރުމާއި ގުޅިގެން ސަރުކާރަށް ވަރަށް ބޮޑަށް އޭރު، މިއަދުގެ ވެރިން ފާޑު ވިދާޅުވެފައިވެއެވެ.

އެގޮތުން އެއީ އިންޑިއާއަށް މައުލޫމާތު ހޯދުމަށް ބަހައްޓާވައިވާ އާލަތްތަކެއް ކަމަށާ އޭގެ ސަބަބުން ރާއްޖޭގެ "ސިއްރު" މައުލޫމާތުތަކާ ރާއްޖޭގެ އެކި ސަރަހައްދުތަކުން އިންޑިއާ އަސްކަރިއްޔާއަށް ޑައިރެކްޓް އިންފޮމޭޝަން ލިބެމުންދާނެ އާލަތްތަކެއް ކަމަށެވެ. އަދި އެއީ އެމްޑީޕީއިން ހިންގާފައިވާ ޖަރީމާއެއް ކަމަށާ އެކަން ކޮށްފައިވަނީ ގައުމުގެ ވަތު ބަތާނައަށް ދާންދެން އިންޑިއާއަށް ނީލަން ކިޔައިގެން ކަމަށް ބުނެ އޭރު. މިއަދުގެ ވެރިން އަޑު ގަދަކުރިއެވެ.

ކަންމިހެން އޮތްއިރު، ކުރިން ބުނި ނުރައްކާތެރި އެ ރާޑަރުތަކުގެ ބޭނުން މިއަދު. ދިވެހީން ކުރަމުންދާ ސަބަބު ދާޚިލީ ވަޒީރަށް މިވަނީ ބުނެ ނުދެވިފައެވެ.

ރާއްޖޭގައި ތިބި އިންޑިއާ ސިފައިން ބޭއްލިއްޖެ ކަމަށް ބުނެ ސަރުކާރުން ކާމިޔާބީ ފާހަގަކުރަން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ދިފާއީ ވަޒީރު އަދި މިސަރުކާރުގެ އެއް ބައިވެރިޔާ ޕީޕީއެމްގެ ނައިބު ރައީސް މުހައްމަދު ޣައްސާން މައުމޫނަށް ނުސްވެރިއަކު ސުވާލެއް އަމާޒުކުރިއެވެ.

އެގޮތުން އިންޑިއާއިން ހަދިޔާކުރި ރާޑަރު ސިސްޓަމްތައް މިހާރު ބޭނުންކުރޭތޯ ކުރި ސުވާލަށް ޖަވާބު ދެއްވަމުން މިނިސްޓަރު ޣައްސާން މައުމޫން ވިދާޅުވީ ރާއްޖޭގެ ސަރަހައްދު ބަލަހައްޓަން އެކި ވަސީލަތްތައް ބޭނުންކުރާ ކަމަށެވެ. އެކި މަރުހަލާތަކުގައި ކުރާ މިމަސައްކަތުގައި ރާޑަރުތަކާއި، ސެޓްލައިޓް އިމޭޖިން އަދި ޔޫއޭވީސް ބޭނުންކުރަމުންދާ ކަމަށް މިނިސްޓަރު ޣައްސާން ވިދާޅުވިއެވެ.

މިނިސްޓަރު ޣައްސާން ވިދާޅުވީ އޮޕަރޭޝަންގައި ވަކި ވަސީލަތެއް ބޭނުންކުރާކަން ހާމަކުރުމަކީ ރަނގަޅު ކަމެއް ނޫން ކަމަށެވެ. ނަމަވެސް ސީދާ ޖަވާބެއް ސުވާލަށް ނުދެއްވާ ވަޒީރުގެ ޖަވާބު ނިންމަވާލެއްވިއެވެ.

އެހެންކަމުން ކުރިން ކީހާ ޅެން ފަރިއްސަށްވެ ވަޒީރުގެ އަނގައަށް އެ ބަސްތައް ވަދެގެން ދިއުމުން ރައްޔިތުން ދޭހަ ކުރަންވީ މިއިން ކޮންކަމެއްބާއެވެ؟ ވަޒީރުމެން ކުރިން ދެއްކި ވާހަކަތަކަކީ ރައްޔިތުންނަށް އޮޅުވާލަން ދެއްކި ވާހަކަތަކެއް ތޯ ނޫނީ ވެރިކަމުގެ ދަހިވެތިކަމުގައި ޖެހ ޗައްކަރެއްތޯ ރައްޔިތުން ނިންމާނެކަން ކަށަވަރެވެ.

ނަމަވެސް މިހާރު ފެނިގެން މި ދަނީ ކުރިން ނުރައްކާވެގެން އުޅުނު ހުރިހާ ކަމެއް މިހާރު ސޭފް ޒޯނަށް އެރި މަންޒަރެވެ. ކުރިން ތްރެޓަކަށް ވެފައި އޮތް ރާޑަރު ސިސްޓަމް ވެސް މިހާރު އޯކޭ ވެއްޖެ ކަން ނޭނގެއެވެ. ނަމަވެސް ސުވާލަކީ ވެރިކަމަށް ބޫތުކައި ރައްޔިތުންނަށް އެވަރުގެ އޮޅުވާލުމެއް އޮޅުވާލަން ހެޔޮވާނެ ތޯއެވެ؟

ރާޑަރު ސިސްޓަމްތައް ބަލަހައްޓަން ބޭރުގެ ބަޔަކު "މިހާރު" ނުތިބޭނެއޭ ވަޒީރު ވިދާޅުވިއިރު، ކުރިންވެސް ރާޑަރު ސިސްޓަމްތައް ބަލަހައްޓަމުން ދިޔައީ އެމްއެންޑީއެފް ކޯސްޓްގާޑްގެ މިކަމަށް ޚާއްޞަ ތަމްރީން ލިބިފައިވާ ދިވެހި ސިފައިންނެވެ.

މަކާރާ އޮޅުވާލުމާއެކު ކޯޓު ފަޓުލޫނު ލައިގެން ތިބި ހިޔަޅުން ކަމުގައި ވަޒީރުންނާ ވަލިއްޔުލްއަމްރުވުމަކީ ދެރަވަރުގެ ދެރަ ފެންވަރުގެ ކަންކަމެވެ.