ދިވެހިރާއްޖޭގެ ބޭރުގެ އަސްކަރިއްޔާތައް ބައިވެރިވެގެން ، ދިވެހި ސިފައިންގެއިން ކުރިއަށް ގެންދާ 12 ވަނަ ބޭސިކް ޑައިވިންގ ކޯސް މިއަދު ފަށައިފިއެވެ.
މި ކޯސް ފެށުމަށް ބަންޑާރަކޮށީގައި މިއަދު ބޭއްވި ޚާއްސަ ރަސްމިއްޔަތު ޝަރަފުވެރިކޮށްދެއްވީ ވައިސް ޗީފް އޮފް ޑިފެންސް ބްރިގޭޑިއާ ޖެނެރަލް އަހްމަދު ޣިޔާޠްއެވެ.
އިނގިރޭސި މީޑިއަމަށް ހިންގާ މި ކޯހުގައި ޖުމްލަ 17 ދަރިވަރުން ބައިވެރިވިއިރު، އޭގެ ތެރޭގައި ބަންގްލަދޭޝް، މެލޭޝިއާ، ނޭޕާލް، ސްރީލަންކާ އަދި ތުރުކިއޭގެ އަސްކަރިއްޔާއަށް ނިސްބަތްވާ ސިފައިން ހިމެނޭހެން ބޭރުގެ އަސްކަރިއްޔާތަކުގެ 9 ސިފައިން ބައިވެރިވެފައިވެއެވެ
މޭ 12 އިން ފެށިގެން ތިން މަސް ދުވަހުގެ މުއްދަތަށް ގިރިފުށީ ޓްރެއިނިންގ ސެންޓަރުގައި ކުރިއަށްގެންދާ މި ކޯހުގައި ކިޔަވައިދިނުމަށް ހަމަޖެހިފައިވާ ބައިތަކުގެ ތެރޭގައި ޑައިވިންގެ ތާރީޚާއި، ފިޒިކްސް އެންޑް ފިޒިއޮލޮޖީ އޮފް ޑައިވިންއާއި، ޑައިވިންގ އޮޕަރޭޝަންގައި ބޭނުންކުރާނެ ޑައިވް އިކްއިޕްމަންޓްސްއާއި އެކްސެސަރީސް ބޭނުންކުރާނެ ގޮތާއި، ޑައިވިންގ ކޮމިއުނިކޭޝަނާއި ޑައިވް ޓޭބަލްސްގެ ބޭނުމާއި، ޑައިވިންގ ސޭފްޓީ އަދި ޑައިވިންގ ސަރޗް ޕެޓާންސްއާއި، ފިޒިކަލް ޓްރެއިނިންގ، ސްވިމިން އަދި ޑައިވިންގ ސްކިލްސް، ޑައިވިންގ ފަސްޓްއެއިޑް، މިޝަން ޕްލޭނިންގެ އިތުރުން ހާލުގައިޖެހޭ އުޅަނދުފަހަރު ސަލާމަތްކުރާނެ ގޮތުގެ ތަމްރީނާއި ތަޖުރިބާތައް ކޯހުގެ ބައިވެރިންނަށް ލައިދިނުމަށް ވަނީ ހަމަޖެހިފައެވެ.
