ގައުމު ކިތަންމެ ކުޑައަސް ގައުމުގެ ފުދުންތެރިކަމަކީ އެގައުމެއްގެ ވެރިން އިތުރު ކުރިވަރަކަށް އިތުރުވާނެ އެއްޗެކެވެ. ދަރަނި އަދާކުރެވޭނީ ދަރަނި އަދާކުރާނެ އުކުޅުތައް އެނގިގެންނެވެ. އެއީވެސް ހިކުމަތެކެވެ.

ދަންނަވަން މިއުޅެނީ ކޮން ވާހަކައެއްކަމާ މެދު ރައްޔިތުން ހިތުގައި ސުވާލު އުފެދިދާނެއެވެ. އާދޭހެވެ. މި ދަންނަވަނީ ނިމިދިޔަ ސަރުކާރުން ދިވެހިންގެ ގޮހޮރުގެ އެެތެރެއަށް ދާންދެން ނުވިހާ ކުއްޖާގެ ފޫޅަށް ދާންދެން ވިއްކާ ނެގި ދަރަނިތައް އަދާނުކުރެވިގެން މި ސަރުކާރުން ޖަހަމުން ގެންދާ ސަކަރާތުގެ ވާހަކައެވެ.

ޅ. ހިންނަވަރު ނުރާނީއާގެ އިބްރާހިމު މުހައްމަދު ސޯލިހު ފަސް އަހަރު ދުވަސް ތެރޭގައި ވަކި ބައެއްގެ އުނގަށް ވެއްޓި އެބަޔަކާ ނުލާ ނޫނި ވެރިކަން ނުކުރެވިގެން އެބައެއްގެ ކުރިމަތީ ކުޑަ ކަކޫ ޖަހާ އެޅިހާ ބަހާތަކަށް ރިހަ ވެގެން އެބަޔަކަށް ކުރިނީސްކޮށް އިންޑިއާ އަތުން ނަގާފައި ހުރި ލޯނު ފީނިން ސަލާމާތްވާން ނޭނގިގެން އަދުގެ ސަރުކާރުގެ ވެރިން ދެފައިންޕުޅަށް ހިނި އަރައިގެން ދުވެވަޑައިގަންނަވާ ވާހަކައެވެ.

އިބްރާހީމުގެ ސަރުކާރާއި އިންޑިއާ ސަރުކާރާ ދެމެދު 2019 ގައި ވެވުނު އެއްބަސްވުމެއްގެ ދަށުން ޖުމްލަ 200 މިލިއަން ޑޮލަރުގެ ޓްރެޝަރީ ބޮންޑު އެސްބީއައި އިން ގަނެފައި ބާކީ ހުރި 150 މިލިއަން ޑޮލަރު އަނބުރާ ދައްކަން ޖެހޭ މުއްދަތުގައި ލޯނުތައް ނުދެއްކިގެން ދިވހެި ސަރުކާރުން ވަނީ އިންޑިއާ ސަރުކާރުގައި އާދޭސް ދަންނަވައިގެން އެ މުއްދަތު އިތުރުކުރުވާފައެވެ.

މިއީ އިންޑިއާ އާ ދެކޮޅަށް އެންމެ ގަދަ ބަސް ވިދާޅުވި ލީޑަރުން ތިބި ސަރުކާރަށް ވާއިރު، އިންޑިއާގެ ލޯނުތައް އަދާކޮށް އަޅުވެތިކަމުގެ ހުރިހާ ދޮރެއް ބަންދުކުރާނެ ކަމުގެ ވަޢުދުވީވެސް ހަމަ މި ސަރުކާރުގެ ވެރިންނެވެ. ރައީސް މުއިއްޒު ރިޔާސީ އިންތިހާބުގެ ކެމްޕެއިންގައި އެންމެ ގިނައިން ވިދާޅުވީ އެ ވާހަކައެވެ.

ދިވެހީންގެ ރާއްޖެއެއް ގާއިމުކޮށް، ވަކި ގައުމެއްގެ ގޮނޑިކޮއްކޮ ސަރުކާރެއް އޮތް އޮތުން ނިމުމަކަށް ގެންނާނެ ވާހަކައާ އިންޑިއާ އުނގަށް ނުވެއްޓޭނެ ވާހަކައަކީ އޭރު އިވިގެން ދިޔަ ވާހަކަތަކެވެ.

މިހާރު ކުރިން ބުނި ހުރިހާ އެއްޗެއް ކެންސަލްވެ އިންޑިއާ ފައިބުޑަށް ސަލާމުގެ ނާށިގަނޑު ދެއްވުމަށްފަހު ޚާރިޖީ ވަޒީރު ފޮނުވުމުން ހަމައެކަނި އެ ގައުމުގެ އެކްސްޓަނަލް މިނިސްޓަރު ބައްދަލުކުރައްވާ އަނބުރާ ފޮނުވާލެއްވިއިރު ޖަވާބެއްވެސް އެކަމުގައި ނުދެއްވައެވެ.

ކަނޑައެޅީ ޝަރުތުތަކެކެވެ. އެ ޝަރުތުތަކަށް ދިވެހި ސަރުކާރުން އެއްބަސްވާ ނަމަ ލޯނު ދެއްކުމުގެ މުއްދަތު އިތުރު ކޮށްދޭ ގޮތަށެވެ. "ވަރްނާ ބޫލު ޖާއޯ" އޭ ބުންޏެވެ. ކަނޑައެޅި ޝަރުތުތަކަށް އާނ ބަސްބުނެ އިންޑިއާ ސިފައިންގެ ނަން މަދަނީންނަށް ބަދަލުކޮށް އިންޑިއާ އަސްކަރީ އުޅަނދުތައް ދުއްވަން ބައި ތިއްބަން އެއްބަސްވީއެވެ.

ދަރަނި ޚަލާސްކުރުމަށް އުފެއްދުންތެރިކަން އިތުރުކުރަން ޖެހޭއިރު 6 މަސް ދުވަސް ވެރިކަމުގައި ހޭދަވިއިރު ގައުމުގެ އުފެއްދުންތެރިކަން އިތުރުކުރަން ރައީސް މުއިއްޒަށް ކުރެއްވުނު ކަމެއް ނެތެވެ. ފަރސްޓު ކިލާހުގައި އައްޔާރުން ގޮވައިގެން ދަތުރުފުޅު ކުރެއްވުމުގައި ނަމަވެސް އުޅުއްވީ ވަރަށް ކުރީގައެވެ.

އެހެންކަމުން ނެތް އެއްޗަކުން ދެއްކޭނެ ލޯނެއް ނޯންނާނެ އިރު ދެން ގަސްކުރެއްވީ ދިވެހިން ލަދު ގަންނަވާލަންށެވެ.

އެގޮތުން ސަލާމުގެ ނާށިގަނޑު ދިއްކޮށް އެހެން ބާރެއް މިގައުމުގައި އޮތުމަށް މަރުހަބާ ކިއެވެ. މިއާއެކު އިންޑިއާގެ ނޫސްތަކާ މީސްމީޑިޔާގައި ދިވެހިންނަށް މަލާމާތާ ފުރައްސާރަވެސް އަމާޒުކުރަން ފެށިއެވެ. ޚުދު ރައީސް މުއިއްޒުވެސް ހިމެނިވަޑައިގަންނަވާ ގޮތަށެވެ.

އެގޮތުން މީގެ ކުރިން އިންޑިއާއަކީ ބައެއް ނޫންކަމަށް ދެކެމުން އައި ބަޔަކު މިއަދު އިންޑިއާ ފައިބުޑަށް ވެއްޓި ސަލާން ޖަހަނީ ދަރަނި ނުދެއްކިގެން ކަމަށް ބުނަމުން ދެއެވެ. ދިވެހިން އަތުން ރުފިޔާ ހުސްވެ ބޭންކްރަޕްސީއާ ދިމާއަށް މިސްރާބު ޖަހައިފި ކަމަށްބުނެ އިންޑިއާގެ ޔޫޓިއުބަރުންވެސް ގެންދަނީ ރިޕޯޓުކުރަމުންނެވެ.

ރައީސް މުއިއްޒުގެ ފޮޓޯއާ އެކު ކުރަމުން އެ ޕޯސްޓުތަކުގައި ދިވެހި ސަރުކާރުގެ އިސް އޮފިޝަލުންވެސް އިންޑިއާއާ އެގައުމުގެ ވެރިންނަށް މަލާމާތާ ފުރައްސާރަ ރައްދު ކުރި ކަމަށާ ނަމަވެސް މިއަދު ޖެހުނީ އެމީހުން ކައިރިއަށް ސަލާން ޖަހަން އަންނަން ކަމަށް ބުނެފައިވެއެވެ.

މިއީ ދިވެހިންގެ ހަޔާތުގައި ލަދުވެތި ދުވަހެކޭ ބުނަން ޖެހެނީ މިހެންވެއެވެ. އެގޮތުން ރައީސް އަބްދުﷲ ޔާމީންގެ ޒައާމަތުގައި އިންޑިއާ ސިފައިން ބާލަން މަސައްކަތް ފެށުމުންނާ އަދި ދިވެހީންގެ އެއާޕޯޓު ދިވެހީންނަށް ހޯދައިދޭން މަސައްކަތް ފެށުމުން ދިވެހި ސަރުކާރަށް ފިއްތުންތައް ކުރިމަތިކުރުވި ހަނދާން އައުކޮށްލަމާ ތޯއެވެ؟

ނަމަވެސް ރައީސް ޔާމީން ކަންކުރެއްވީ ކިހިނަކުންތޯއެވެ؟ ދިވެހީން އެކަމުގައި ކޮމްޕްރޮމައިޒްވާން ޖެހޭ ފަދަ އެއްވެސް ފިޔަވަޅުފުޅެއް ނުނަގަންވައެވެ.

ހިކުމަތާއެކު ދަރަނިވެސް ދެއްކެވިއެވެ. މުއްދަތު އިތުރުކުރައްވަން އާދޭސް ނުދަންނަވައެވެ. އޭރުވެސް ބައިތުލްމާލު އޮތީ ކްލީން ކްލީނާ ސާފު ލައިގެން ދޮވެ ހިއްކަން އަޅާފައެވެ. ނަމަވެސް ފައިސާ ހޯއްދެވި ގޮތަކަށް ހޯއްދަވައިގެން ދިވެހީންގެ މިނިވަންކަމާ އިސްތިގުލާލު ވެސް ހިމާޔަތްކުރެއްވިއެވެ.

މިއަދު ފެނިގެން މިދިޔައީ ނަމަވެސް ދިމާ އިދިކީލަ މަންޒަރެވެ. ބަހާ އަމަލާ ދިމާނުވެ ނަމުން ބޮޑު ބޭބެއިން ކުރިމަތީ ކުޑަކަކޫ ޖެހި މަންޒަރެވެ. އޭގެ ސަބަބުން ހުރިހާ މަލާމާތަކާ ފުރައްސާރައެއް ދިވެހީންނަށެވެ. މިއީ ދިވެހީންގެ ރާއްޖޭގައި ދިވެހީން ލަދުގަންނަވާލި ކަމެކެވެ.

"ވީ މައިޓް ބީ ސްމޯލް ބަޓް ދެޓް ޑަޒަންޓް ގިވް ޔޫ ދި ލައިސެންސް ޓު ބުލީ އަސް" އޭ ވިދާޅުވުމަށްފަހު "ސަރ ޔޫހޭވް ގިވަން ދެމް އޯލް ދަ ލައިސަންސް ޓު ބުލީ އަސް"އެވެ.

އުނބަށް ޖައްސަވާ ތިޔަ ދުއްވާލީ ދިވެހީންގެ ދުވަހެވެ. މިއީ ދެރަ ވަރުގެ ދެރަ ފެންވަރުގެ ކަންކަމެވެ.