އިންޓެލިޖެންސަށް ލިބުނު މައުލޫމާތަކާ ގުޅިގެން މެއި 14 ވަނަ ދުވަހު މާލޭގައި ހިންގި މަސްތުވާތަކެތީގެ އޮޕަރޭޝަނުގައި ފަސްމީހުން ހައްޔަރުކޮށްފައިވާކަމަށް ކަމަށް ފުލުހުން ބުނެފިއެވެ.
ޑްރަގް އެންފޯސްމަންޓާއި އިންޓެލިޖެންސް ގުޅިގެން ހިންގި އެ އޮޕަރޭޝަނުގައި ހައްޔަރުކޮށްފައިވަނީ 27 އަހަރާއި 45 އަހަރާ ދެމެދުގެ ފަސް ފިރިހެނުންކަމަށާއި، ކޯޓު އަމުރެއްގެ ދަށުން އެ މީހުން ހައްޔަރުކޮށް އެ މީހުންތިބި އެޕާޓްމަންޓު ބަލައިފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއް ހުރި 29 ރަބަރު ޕެކެޓު ފެނިފައިވާކަމަށްވެސް ފުލުހުން ވަނީ ބުނެފައިއެވެ.
އިތުރަށް ފުލުހުން ބުނެފައި ވަނީ މި މައްސަލައާ ގުޅިގެން އެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައި ކަމަށެވެ.
ޑްރަގް އެންފޯސްމަންޓުން މި މައްސަލަ ތަހުގީގު ކުރަމުން އަންނައިރު ރާއްޖޭގައި ދުވަހަކަށް ވުރެ ދުވަހެއް މަސްތުވާތަކެތީގެ މިފަދަ މައްސަލަތައް އަންނަނީ އިތުރުވުމުންކަން ފާހަގަކޮށްލެވެއެވެ.
