20 ވަނަ ރައްޔިތުންގެ މަޖިލިސް އަށް ހޮވުނު މެމްބަރުން މި މަހުގެ 28 ވަނަ ދުވަހު މެމްބަރު ކަމުގެ ހުވާ ކުރަން އަންނަނީ ތައްޔާރުވަމުންނެވެ. މި ދަނޑިވަޅުގައި ގިނަ ފަރާތްތަކުން އަންނަނީ ސޯޝަލް މީޑިޔާގައި ސުވާލުތަކެއް ކުރަމުންނެވެ. އެގޮތުން ދެން ވެސް ފެނިގެންދާނީ ހަމަ ބަކަރި ކޮށި މަޖިލީހެއްބާއޭ އެވެ.

ބަކަރި ކޮށި މަޖިލީހޭ އެންމެވެސް ކިޔަނީ އެއްވެސް ސަބަބެއް ނެތި ނޫނެވެ. ރައްޔިތުން ތަމްސީލް ކުރުމަށްޓަކައި ގޮނޑި ކޮޅުގައި ތިއްބަވާ މަޖިލިސް މެމްބަރުންގެ ފަރާތުން ފެންނަ އަމަލުތަކުގެ ސަބަބުން "ބަކަރި" ތަކެއްގެ ގޮތުގައި އާންމުން ވަނީ އެބޭފުޅުން ސިފަކޮށްފައެވެ. އަދި މަޖިލިސް ކުރާ ކޮޓަރި ކޮޅަކީ "ބަކަރި ކޮށްޓެއް" ކަމަށް ވެސް ގިނަ ފަރާތްތަކުން އަންނަނީ ބުނަމުންނެވެ.

ނިމިދިޔަ 19 ވަނަ ރައްޔިތުންގެ މަޖިލީހުން އަޅުގަނޑުމެންނަށް ތަފާތު މަންޒަރުތަކެއް ފެނިގެންގޮސްފައިވެއެވެ. އެގޮތުން ރިޔާސަތުގައި އިންނަވާ މަޖިލީހުގެ ރައީސްގެ އަމުރަށް ކިޔަމަން ނުވެ އަމިއްލަ އަމިއްލަ އަށް މެމްބަރުންތައް މަޖިލިސް ކުރާ ކޮޓަރިކޮޅުގައި އުޅުއްވި މަންޒަރުތަކެވެ. ރައްޔިތުންގެ ކަންކަން ނިންމަން ލިބުނު ފުރުސަތުގައި އެބޭފުޅުން ކުޅުނީ ނާޗަރަންގީއެވެ.

އެއް މެމްބަރު އަނެއް މެމްބަރަށް އަނިޔާކޮށް، ހޮސްޕިޓަލްގައި އެޑްމިޓް ކުރަންޖެހުނު ހާލަތައް ވެސް ނިމިދިޔަ ދައުރުތަކުގައި ވަނީ ކަންކަން ގޮސްފައެވެ. ބޭރުގެ މީޑިޔާތަކުގައި ވެސް އެ ހަޑިހުތު މަންޒަރުތައް ވަނީ އާންމުވެފައެވެ. މިކަމުގައި ލަދު ގަންނަން ޖެހުނީ އާންމުންނެވެ. ބޭރުގެ ބަޔަކާ ދިމާވެގެން، މިއީ ދިވެއްސެކޭ ބުނަންވެސް ބައެއް ފަރާތްތަކުން އެދުވަސް ވަރު ޖެހިލުންވިއެވެ.

ކަންކަން މިހެންހުރި އިރު، މިފަދަ އަމަލުތައް އާންމުކޮށް ފެނިފައި ވެސް ވަނީ އޭރުގެ އޮންނަ ސަރުކާރުގެ މެމްބަރުންގެ ފަރާތުންނެވެ. އެގޮތުން 19 ވަނަ މަޖިލީހުގައިވެސް މަޖިލިސް ރައީސް ކަމަށް ކުރީގެ ރައީސް މުހައްމަދު ނަޝީދު ހުންނެވި އިރު ނަޝީދުގެ އިތުބާރުނެތް މައްސަލައެއް ހުށަހަޅައިގެން އެކަމާ އަރައިރުންވެގަތީ އޭރު ވެރިކަން ކުރި މައި ޕާޓީ އެމްޑީޕީ އަށް ނިސްބަތްވާ މެމްބަރުންނެވެ.

އަދި އޭގެ ފަހުން މިހާރުގެ ސަރުކާރު އައިސް ސަރުކާރުގެ ވަޒީރުންނަށް މަޖިލީހުން ރުހުން ދޭން އުޅުނު ދުވަހު ހީވީ އެހެންފަދަހެންނެވެ. އޭރުގެ އެމްޑީޕީއަށް ނިސްބަތްވި މެމްބަރުންތައް މަޖިލިސް ތަޅުމުގައި އުޅުއްވީ ތުއްތު ކުދިން ވެސް އެފަދައިން ނޫޅޭނެގޮތަކަށެވެ.

މިފަހަރު އަނެއްކާ މިއޮތީ އަދުގެ ސަރުކާރަށް 20 ވަނަ ރައްޔިތުންގެ މަޖިލީހުގެ ސުޕާރ މެޖޯރިޓީ ލިބިފައެވެ. ފެެންނާނީ ހަމަ އެފަދަ މަންޒަރުތަކެއްބާއޭ ވެސް ހިތައް އަރައެވެ. މަޖިލިސް އިންތިޚާބްގައި ވޯޓު ލުމުގެ ހައްގު ލިބިފައިވާ ފަރާތްތަކުގެ ތެރެއިން ވޯޓު ލާން ނިކުތީވެސް ނިސްބަތުން މަދު އަދަދެއްްގެ ބައެކެވެ. ސަބަބެއް ވެސް ނެތި ނޫނެވެ. ވޯޓުލާން ނުނިކުން މީހުންގެ ތެރޭގައި ގިނައީ ޒުވާނުންނެވެ. ވޯޓު ނުލީ ކީއްވެތޯ އެހުމުން ޖަވާބުގައި ބުނަމުން ގެންދިޔައީ "ވީ ޑޯންޓް ވޯންޓް އަނަދާރ ކްލައުންސް ޓު ޕަފޯމް އިން އަ ސާކަސް" މިފަދައިންނެވެ. ޒުވާނުންގެ މި ޖޯކުން ފުރިފައިވާ ޖުމުލައިންވެސް ދޭހަވީ މަޖިލިސް މެމްބަރުންނާ މެދު އެމީހުން ޑިސްއަޕޮއިންޓްވެފައިވާ މިންވަރެވެ.

މަޖިލީހަކީ ގާނޫނު ހަދާ ތަނެކެވެ. ރައްޔިތުންގެ ހައްގުގައި އަޑުއުފުލަން ޖެހޭ ތަޅުމެކެވެ. ރައްޔިތުންނަޓަކައި އަތު ކުރި އޮޅާލާފައި ނިކުންނަން ޖެހޭނެވަރުގެ ތަނެކެވެ. އެފަދަ ތަނަކުން ދެންވެސް ފެނިގެންދާނީ ހަމަ ބަކަރި ކޮށްޓެއްބާއޭ؟