މި ސަރުކާރުން އަބަދުވެސް ދައްކަމުން އައީ ރައީސް ސޯލިޙްގެ ސަރުކާރުން މަޢުލޫމާތު ސިއްރުކުރަމުންދާ މައްސަލައެވެ. ވީހާވެސް ބޮޑަށް މަޢުލޫމާތު ހާމަކުރުމުގެ ސިޔާސަތަކީ ރައީސް މުއިއްޒުގެ ވައުދުފުޅެކެވެ. ސަރުކާރުން ބާއްވާ އެކި އެކި ބައްދަލުވުންތަކުގައިވެސް އެންމެ ގިނައިން ދައްކާ ވާހަކައަކީ މިއީއެވެ. އެހެންނަމަވެސް، މައުލޫމާތު ހާމަކުރުމުގައި ސަރުކާރުން ދަނީ ވަރަށް ބޮޑަށް އިހުމާލުވެ ރައްޔިތުންނަށް އޮޅުވާލަމުންނެވެ.

މިފަދަ އޮޅުވާލުންތައް ގިނަވެ ގިނަ ބަޔެއްގެ ފާޑުކިޔުން ސަރުކާރަށް އަމާޒުވެފައިވަނިކޮށް، ރައީސް އޮފީހުން މައުލޫމާތު ހޯދާ ލިބިގަތުމުގެ ހައްގުގެ ގާނޫނަށް އަމަލުނުކުރާ މައްސަލަ ރަސްމީކޮށް ބަލައި ފިޔަވަޅު އަޅަންޖެހޭ ފަރާތްތަކަށް ފިޔަވަޅު އެޅުމަށް ނިންމާފައިވާ ކަމަށް އިންފޮމޭޝަން ކޮމިޝަނަރ އަހްމަދު އާހިދު ރަޝީދު ހާމަކޮށްފިއެވެ.

މި ސަރުކާރު ހަވާލުވިފަހުން ރައީސް އޮފީހަށް ހުށަހެޅިފައިވާ ގިނަ އާރްޓީއައި ތަކަށް ޖަވާބުދީފައި ނުވާއިރު، އައި.ކޮމް އިން ބާއްވާ އަޑު އެހުންތަކަށްވެސް ރައީސް އޮފީހުން ހާޒިރެއްނުވެއެވެ.

އަހްމަދު އާހިދު އިތުރަށް ވިދާޅުވީ ރައީސް އޮފީހުން މި ގާނޫނަށް އަމަލުނުކުރާ ސަބަބު ބަލަމުންދާކަމަށާއި އެކަމުގައި ޒިންމާވާ ފަރާތްތައް ހޯދައި އެކަށީގެންވާ ފިޔަވަޅު އަޅާނެކަމަށެވެ.

މި މައްސަލަ އާއި ގުޅިގެން ރައީސް އޮފީހުގެ ތަރުޖަމާނު ހީނާ ވަލީދު ސީދާ ޖަވާބެއް ދެއްވާފައިނުވެއެވެ. ހީނާ ވިދާޅުވީ މިނިވަން މުއައްސަސާތަކަށް ގާނޫނު އަސާސީން ލިބިފައިވާ ހުރިހާ ބާރެއް ނުވަތަ އިޚްތިޔާރެއް ބޭނުންނުކުރެވޭނެ ކަމަށެވެ. އެއީ ޑިމޮކްރަސީގެ ދަށުން ދަންނަ ހަމަ ކަމަށްވެސް ހީނާ ފާހަގަކޮށްފައިވެއެވެ.

މައުލޫމާތު ހާމަކުރުމުގެ ސިޔާސަތު ގެންގުޅުއްވާ ކަމަށް ކެނޑިނޭޅި ބުނަމުންދާއިރު، ފެނިގެން ދަނީ މުޅިން ތަފާތު މަންޒަރެކެވެ. ސަރުކާރަށް ފެންނަ އެމީހުން ބޭނުންވާ މައުލޫމާތުތަކާ، ބޭނުންވާ ވަކިވަކި ކަންކަން ޕްރޮމޯޓް ކުރާ މަންޒަރު ނޫން އެހެން މަންޒަރެއް ފެނިގެން ނުދެއެވެ.

ނޫސްވެރިންނަށް ހުރިހާ ކަމެއްގެ ފުރިހަމަ މައުލޫމާތު ލިބޭނެ ކަމަށް ވިދާޅުވެ ރައީސް މުއިއްޒު ވެރިކަމަށް ވަޑައިގެންނެވި ނަމަވެސް އަމަލުކުރައްވަނީ ދިމާ އިދިކޮޅަށެވެ. ރައްޔިތުންނާއި ގައުމުގެ މަސްލަހަތާއި ގުޅިފައިހުރި ބޮޑެތި މަޝްރޫއުތަކާއި ގުޅޭގޮތުން އާރްޓީއައި ހުށަހެޅި ނަމަވެސް މައުލޫމާތުތައް ނުދީ ހިފަހައްޓާ މައްސަލަ އިންތިހާއަށް ވަނީ ބޮޑުވެފައެވެ. އަދި ސަރުކާރު ޕްރޮމޯޓް ނުކުރާ ނޫސްތަކަށް ދަތިކުރުމުގެ ފިޔަވަޅު އަޅައި، ފިއްތުންތައް ކުރިމަތިކުރުވާ އެކި ކަހަލަ ގޮންޖެހުންތައް ދަނީ ކުރިމަތިކުރުވަމުންނެވެ.

މީގެ އިތުރުން ރައީސް އޮފީހަކީ ސަރުކާރުގެ އެންމެ އިސް އިދާރާއަށްވާއިރު، ނުވަތަ އެހެން މުއައްސަސާތަކަށް ނަމޫނާ ދައްކަން ޖެހޭ އޮފީހަކަށްވާއިރު، ފެންނަމުން މިދަނީ ވަރަށް ޒިންމާދާރުކުޑަ ގޮތެއްގައި އަމަލުކުރަމުންދާ މަންޒަރެވެ. އައިކޮމްގެ އަޑުއެހުންތަކަށް ހާޒިރުނުވާވުމަކީ އައިކޮމްގެ އަމުރުތަކަށް އިހުތިރާމް ނުކުރާކަމުގެ އެއް ހެކި ކަމަށް ބައެއް މީހުން ބުނެއެވެ. އަދި ރައީސް އޮފީހުން ގާނޫނަށް އަމަލުނުކޮށްގެން އިދާރާތަކުން މައްސަލަ ބަލާ ހިސާބަށް ދިއުމަކީ ހަގީގަތުގައި ވެސް ލަދުވެތިކަމެކެވެ.