މަސް ކިރާތާ 48 ގަޑި އިރު ނުވަނީސް މަސްވެރިންނަށް ފައިސާ ދޭނެ ކަމަށް ވަޢުދުވުމަށްފަހު، މަޖިލިސް އިންތިޚާބާއި ދިމާކޮށް މަސްވެރިން ގުނބޯ ހެއްދުމަށްފަހު ސުޕަރ މެޖޯރިޓީ ލިބުމާއި އެކު އަނެއްކާވެސް ފައިސާ ނުދީ އެއް މަސް ވެފައިވާ ކަމަށް މައުލޫމާތު ލިބިއްޖެއެވެ.

ޗެނަލް ތޭރަ އަށް މައުލޫމާތު ދެމުން ފިޝަރީޒް މިނިސްޓަރ ޝިޔާމް ވިދާޅުވީ އޭޕްރީލް 22 ހަމައަށް މަސްވެރިންނަށް ފައިސާ ދޫކޮށްފައިވާނެ ކަމަށެވެ.

ފައިސާ ނުލިބި އެތައް ދުވަހެއް ފާއިތުވެ، މަސްވެރިން އެކަމާ މުޒާހަރާ ކުރުމުން މަޖިލިސް އިންތިޚާބާއި ދިމާކޮށް މަސްވެރިން ހައްލާލަން ފައިސާކޮޅެއް ދިނުމަށް ފަހު އަނެއްކާވެސް މަސްވެރިން ނާށިގަނޑު ހިފައިގެން އުޖޫރަ ހޯދަން ނުކުންނަން ވަނީ ޖެހިފައެވެ.

މަސްވެރިން ބާނާ މަހަށް މަދުވެގެން ހަފްތާ އެއް ތެރޭ ފައިސާ ލިބޭނެ ކަމަށް ފެބްރުއަރީ މަހުގައި މިނިސްޓަރ ވިދާޅުވި ނަމަވެސް، އެއީ އިންތިޚާބާއި ދިމާކޮށް ޖެއްސި ސްޓަންޓްއެކެވެ.

މަސްވެރިންގެ ހަލާލު ފައިސާ ހިފެހެއްޓުމަށްފަހު ސަރުކާރުގެ މަތީ ފަނޑީގެ ބޭފުޅުންނާއި، ޚުދު ގައުމުގެ ވެރިމީހާ ދަނީ ފަސްޓް ކްލާހުގައި ދުނިޔޭގެ އެކި ގައުމުތަކަށް ބުރު ޖަހަމުންނެވެ.

މިކަމާއި ގުޅިގެން ގިނަ ބަޔެއްގެ ފާޑު ކިޔުން އަމާޒުވެފައިވާއިރު، މަސްވެރިންގެ އިތުރު މުޒާހަރާއެއް އޮތުމަކީ ދުރުގައި އޮތް ކަމެއް ނޫނެވެ.

ދިވެހީންގެ ރާއްޖޭގައި ދިވެހިންގެ ހައްގުވާ ފައިސާ ހޯދަން ސަލާންޖަހަން ޖެހުމުން، މިއީ ދިވެހީންގެ ރާއްޖެއޭ ބުނެވޭނެބާއެވެ!