ހުކުރު ދުވަހު ހެނދުނު ތިން މީހުންނާއެކު ތިލަފުށިން ފުރައިގެން މ. އަތޮޅުގެ ރިސޯޓަކަށް ދަތުރުކުރަމުން ދަނިކޮށް ގެއްލުނު ދޯނި އަދިވެސް ފެނިފައިނުވާއިރު އެ ދޯނި ހޯދުމަށް އެމްއެންޑީއެފްގެ އަސްކަރީ ޑްރޯންތައް ބޭނުން ނުކުރާ ސަބަބު އެމްއެންޑީއެފް އަށް ބުނެނުދެވޭކަން ހާމަވެއްޖެއެވެ.

އެމްއެންޑީއެފް އިން ބުނީ ގެއްލުނު ދޯނި ހޯދަން ވައިގެ މަގުން ބޭނުންކުރަނީ މޯލްޑިވިއަންގެ މަތިންދާބޯޓެއް ކަމަށެވެ.

ނަމަވެސް މައުލޫމާތު ލިބުނު ގޮތުގައި ބޭނުންކުރީ މޯލްޑިވިއަންގެ ސީޕްލޭނެކެވެ.

ޗެނަލް 13 ގެ ފަރާތުން ގެއްލުނު ދޯނި ހޯދުމަށް ޑްރޯން ބޭނުން ނުކުރާ ސަބަބު ހޯދުމަށް އެމްއެންޑީއެފް އަދި ރައީސް އޮފީޯހުގެ އިސް ތަރުޖަމާނު ހީނާ ވަލީދަށް ކުރި ސުވާލަށް އަދިވެސް ޖަވާބު ދީފައިނުވާކަން ފާހަގަކޮށްލެވެއެވެ.

މިއަދު ހެނދުނު އެމްއެންޑީއެފް އިން ބުނި ގޮތުގައި ގެއްލިގެން ހޯދަމުން ދަނީ މ. އަތޮޅު މެދުފުށި އައިލެންޑް ރިޒޯޓަށް ދަތުރުކުރަމުން ދިޔަ “AAA-37” ނަމަކަށް ކިޔާ ދޯންޏެކެވެ.

އެ ދޯނީގައި ތިބީ ދިވެއްސަކާއި ތިން ބަންގްލަދޭޝް މީހުން ކަމަށް ވެސް އެމްއެންޑީއެފް އިން ވަނީ ބުނެފައެވެ.

އެ ދޯނި ހޯދުމަށް ހިންގާ އޮޕަރޭޝަނާ ގުޅިގެން ސިފައިންގެއިން އިއްޔެ ބުނީ، ކަނޑުމަގުން ދޯނި ހޯދުމަށް އެމްއެންޑީއެފް ކޯސްޓްގާޑު ޝަހީދު އަލީ އާއި މޯލްޑިވިއަންގެ ސީޕްލޭނުން ކަނޑާއި ވައިގެމަގުން، މ. ރަތްމަންދޫގެ އިރުމަތީ ބިތުން ބޮޑު ސަރަހައްދެއް ބަލާފައިވާ ކަމަށެވެ.

މިއަދު ހެދުނާ ހަމައަށް އެ ސަރަހައްދުގެ 4519 ސްކެއަ ނޯޓިކަލް މޭލު ބަލާފައިވެ އެވެ.