މާލޭގެ ގެއެއްގެ ތެރޭގައި މަރުވެފައި އޮތް މީހަކު ފެނިއްޖެއެވެ.

ދިވެހި ފުލުހުންގެ ހިދުމަތުން މީިޑިޔާތަކާ ހިއްސާކުރި މައުލޫމާތުގައި ބުނެފައިވަނީ މާފަންނުގެ ގެއެއްގެ ގްރައުންޑް ފްލޯގައި ފިރިހެނަކު މަރުވެފައި އޮތްކަމަށް މެންދުރު 2:20 އެހާ ކަން އިރު އެ ހިދުމަތަށް މައުލޫމާތު ލިބިފައިވާ ކަމަށާ ލިބުނު މައުލޫމާތާ އެކު މިހާރު އެ ސަރަހއްދުގައި ފުލުހުން ހަރަކާތްތެރިވަމުން ގެންދާ ކަަމަށެވެ.

މިކަމާ ގުޅޭ ގޮތުން އިތުރު މައުލޫމާތު ލިބޭ މިންވަރަކުން ހިއްސާކުރަމުން ގެންދާނެކަމަށް ފުލުހުން ހާމަކޮށްފައިވެއެވެ.

ފުލުހުން އިތުރަށް ބުނެފައިވަނީ މަރުވެފައި އޮތް މީހާ ފެނިފައިވަނީ މ. ރަބީއުވިލާގެއިން ކަމަށެވެ. ރަބީއު ވިލާއަކީ މީހުން ދިރިނޫޅޭ ފަޅު ގެއެކެވެ. ދާދި ފަހުން އަލިފާނުގެ ހާދިސާއެއްވެސް އެ ގޭގައި ހިނގާފައިވެއެވެ.

ފާހަގަކޮށްލެވޭ ގޮތުގައި މިދިޔަ ބުދަ ދުވަހު ވެސް ހުޅުމާލޭގައި ވޭނެއް ތެރޭގައި މަރުވެފައި އޮތް މީހަކު ފެނިފައިވެއެވެ. އެ ދުވަހު މަރުވެފައި އޮއްވައި ފެނުނީ ބަންގްލަދޭޝްއަށް ނިސްބަތްވާ ފިރިހެނެކެވެ. އެ މީހާގެ މަރުގައި ތުހުމަތުކުރެވޭ ކަންތައްތަކެއް ނެތް ކަމަށް ފުލުހުން މީގެ ކުރިން ވަނީ ބުނެފައެވެ.

އަދި، އޭގެ ކުރިން މި މަހު 13 ވީ މިދިޔަ ހޯމަ ދުވަހު ބަނޑޭރިކޮށީގެ އެޕާޓްމަންޓެއްގައި މަރުވެފައި އޮތް ދިވެހި ފިރިހެނެއް ވެސް ވަނީ ފެނިފައެވެ. އެ ދުވަހު މަރުވެފައި އޮއްވައި ފެނުނީ 30 އަހަރުގެ ދިވެހި ފިރިހެނެކެވެ.

އެ މީހާގެ މަރުގެ މައްސަލަ އިތުރަށް ބަލަން، އެ މީހާގެ އޮޓޯޕްސީއެއް ހެދުމުގެ މަސައްކަތް ފުލުހުން އަންނަނީ ކުރަމުންނެވެ.