މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (ޕލޑ)ގެ ސީއީއޯގެ މަގާމުގައި ހުރި ރައީސް މުހައްމަދު މުއިއްޒުގެ ގާތް އެކުވެރިޔާ އަހުމަދު ސަމާޙު ރަޝީދުގެ ކޮރަޕްޝަންގެ މައްސަލަތަކެއް ފެންމަތިވެފައިވަނިކޮށް އެ މަގާމުން އޭނާ ވަކިކޮށް އެއަށް ވުރެ ދަށް މަގާމަކަށް އައްޔަންކޮށްފިއެވެ.

ސަމާހު މިފްކޯގެ ސީއީއޯކަމުގެ މަގާމުން ވަކިކޮށްފައިވަނީ އެ ކުންފުނީގެ ހިންގުމުގެ ތެރެއަށް މެންޑޭޓުން ބޭރުން އަތް ގަދަކޮށް މުޅި ކުންފުނި ތެރޭގައި ހަންފަތުރަން އުޅޭ ހިންގި ޖަރީމާތަކާ އެކު ޕީސީބީއިންވެސް އޭނާއަށް ފިޔަވަޅުތަކެއް އަޅާ ސަސްޕެންޝަން ވެސް ކޮށްފައިވަނިކޮށެވެ.

ސަމާހު އައްޔަންކޮށްފައިވަނީ ކުރިން ހުރި މަގާމަށް ވުރެ މަގާމު ދަށްކޮށް ފިޝަރީސް މިނިސްޓްރީގެ ސްޓޭޓު މިނިސްޓަރަކަށެވެ.

މައުލޫމާތު ލިބިފައިވާ ގޮތުގައި ސަމާހުއަށް މަގާމެއް ދޭން ރައީސް މުހައްމަދު މުއިއްޒަށް މަޖްބޫރުވެފައިވަނީ ރައީސް މުއިއްޒު މޭޔަރުކަމުގައި ހުންނެވި ދުވަސްވަރު ސިޓީ ކައުންސިލް ތެރެއިން ހިންގަވާފައި ހުރި ކޮރަޕްޝަންގެ އެކި ޖަރީމާތަކުގައި ސަމާހުގެ ބައިވެރިވުންވެސް އޮވެ ރައީސް މުއިއްޒު ފަލީހަތްވެ ވަޑައިގެންފައިނެތީއެވެ.

ސަމާހު ވަނީ މިފްކޯގެ ފައިސާ އަމިއްލަ ކަންކަމަށް ޚަރަދުކޮށްފައި ކަމަށް އަޑުތައް ފެތުރިފައިވެއެވެ. މީގެ އިތުރުން އޭނާގެ ނުފޫޒުން އެތައް ބަޔަކަށް މިފްކޯއިން ވަޒީފާވެސް ދީފައިވެއެވެ. އެގޮތުން އޭނާގެ ނުފޫޒުން މިފްކޯގެ ޖެނެރަލް މެނޭޖަރު ކަމަށް އައްޔަންކުރި މުއާޒު އަލީއަކީ އޭނާ އެ ކުންފުނީގެ ތެރެއިން ހިންގި ހުރިހާ ޖަރީމާއެއްގެ މުގުލުގައި ހުރި ފަރާތް ކަމަށްވެސް ގިނަ ބަޔަކު ތުހުމަތު ކުރެއެވެ.

ސަމާހުގެ މަގާމު ގެއްލުމާއެކު، މިފްކޯއަށް ސަމާހު ގެ ނުފޫޒުން ވަޒީފާ ދީފައިވާ 105 މީހެއްގެ މައްސަލަވެސް އަންނަނީ ތަހުގީގް ކުރަމުންނެވެ. ނަމަވެސް މި 105 މީހުން މިހާރު ވަނީ ވަޒީފާގެ ދަހިވެތިކަމުގައި ސަމާހުއާ ދެކޮޅަށް ހެކިބަސްދީފައެވެ. ޚުދު މުއާޒު އަލީވެސް މިހާރު ބުނަނީ ސަމާހުއަކީ ވަރަށް ކޮރަޕްޓު މީހެއްކަމުގައެވެ.

މައުލޫމާތު ލިބިފައިވާ ގޮތުގައި ސަމާހު މަގާމުން ވަކިކޮށްފައިވަނީ, އޭނާ ހިންގި ކޮރަޕްޝަންގެ އަމަލުތައް، މުއިއްޒުއަށް ނޭނގި ނުވަތަ ރައީސް މުއިއްޒު ބައި ނޭޅޭގޮތަށް ހިންގަމުންދާކަމުގެ ހެކި ރައީސް މުއިއްޒުއާއި ހަމައަށް ދިއުމުންނެވެ.