ގުޅީފަޅު ހިއްކުން މަޑު ޖައްސާލަން ނެރުނު ކޯޓު އަމުރު ސުޕްރީމް ކޯޓުން ބާތިލު ކުރިއިރު، އެ ކޯޓުގެ ފަނޑިޔާރު، އީޕީއޭ ބާރުވެރިކޮށް ގާނޫނީ ގޮތުން މިނިވަންކުރަން ޖެހޭ ކަމަށް ވިދާޅުވެފައިވީ ނަމަވެސް އެކަމަށް އަމަލު ކުރުމުގެ ވިސްނުން ސަރުކާރުން ނުގެންގުޅޭ ކަމަށް ހަމަކޮށްފިއެވެ.

މިކަން ހާމަކޮށްފައިވަނީ، އެންވަޔަރަންމަންޓު މިނިސްޓަރު ތޯރިގު އިބްރާހިމު، ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.

ރައީސް އޮފީހުގައި ބޭއްވި ޕްރެސް ކޮންފަރެންސްގައި ތިމާވެށްޓާ ބެހޭ ވަޒީރު ތޯރިގް އާ ސުޕްރީމު ކޯޓުގެ ހުކުމާ ގުޅިގެން ސުވާލުކުރުމުން ވަޒީރު ވިދާޅުވީ ސުޕްރީމު ކޯޓުން އެހެން އެންގި ނަމަވެސް އެގޮތަށް ކަންކުރުމުގެ (އީޕީއޭ ގާނޫނީ ގޮތުން މިނިވަންކުރުމުގެ) ވިސްނުމެއް ސަރުކާރުގައި ނެތް ކަމަށެވެ.

އީޕީއޭ ގާނޫނީ ގޮތުން މިނިވަންކުރުމުގެ ވިސްނުމެއް ސަރުކާރުން ނުގެންގުޅޭ ކަމަށް ވަޒީރު ވިދާޅުވިއިރު އެއީ ގާނޫނީ ގޮތުން ސަރުކާރުން ޖުޑިޝީއަރީ ޖެހި ގޮންޖެހުމެއް ކަމަށް ބެލުމުގެ ފުރުސަތު އެބަ އޮތެވެ.

ގުޅީފަޅުގެ މައްސަލާގައި ސުޕްރީމް ކޯޓުގެ ފަނޑިޔާރު ސުއޫދު ވަނީ، މައްސަލަ ދަށު ކޯޓުގައި އަދިވެސް ހިނގަމުންދާއިރު ގުޅީފަޅުގެ ބިން އެއްކޮށް ހިއްކާ ނިމިފައިވާކަން ވެސް ފާހަގަ ކުރެއްވާފަ އެވެ. އެހެންކަމުން އެ މައްސަލައިގައި ވަގުތީ އަމުރެއް ނެރުމުގެ މުއާލާތް ކެނޑިފައިވާ ކަމަށް ވެސް ސުއޫދު ވިދާޅުވިއެވެ.

އެފަދަ މައްސަލައެއް އިތުރަށް ތަކުރާރު ނުކުރުމަށް މުޅި ދައުލަތް ޝާމިލުވެގެން ސްޓްރެޓެޖިކަލް އެންވަރަމެންޓަލް އެސެސްމަންޓެއް ހަދަންޖެހޭ ކަމަށް ސުއޫދު ވިދާޅުވިއެވެ.