މަގާމްތަކަށް ބަދަލު ގެންނަނީ ސަރުކާރުގެ ހިންގުން ހަރުދަނާ ނޫންކަމަށް ސަރުކާރަށް ގަބޫލުކުރެވިގެންކަން ރައީސް އޮފީހުގެ އިސްތަރުޖަމާނު ހީނާ ވަލީދުގެ ވާހަކައިން ދޭހަވެއްޖެއެވެ.

ރައީސް އޮފީހުގައި ބުރާސްފަތި ދުވަހު ބޭއްވި ޕްރެސް ބްރީފިންގައި ނޫސްވެރިއަކު ސިޔާސީ މަގާމުތަކަށް ގެންނަ ބަދަލުތަކާއި ގުޅުވައި ސުވާލުކޮށް، ސަބަބު އޮޅުންފިލުވައިދޭން އެދުމުން ހީނާ ވިދާޅުވީ ސަރުކާރު ހިންގުމުގައި ފަސޭހަ ގޮތަކަށް ކަންކަން ބައްޓަން ކުރެއްވުމުގެ ބާރު ރައީސުލްޖުމްހޫރިއްޔާ ޑރ މުހައްމަދު މުއިއްޒަށް ލިބިވަޑައިގަންނަވާ ކަމަށެވެ.

އެއީ ކުންފުނިތަކަށް މީހުން އައްޔަންކުރުމާއި ބަދަލުކުރުން ފަދަ ކަންކަންވެސް ހިމެނޭ ކަމަށް ހީނާ ވަނީ ވިދާޅުވެފައެވެ.

އެހެންކަމުން ރައީސް މުއިއްޒު، ސަރުކާރާ ސަރުކާރު ހިއްސާވާ ކުންފުނިތަކުގެ މަގާމުތަކަށް ބަދަލުތަކެއް ގެންނަވަމުންދާ ކަމަށެވެ. ނަމަވެސް ސަބަބު ބަޔާންކޮށްދިނުމަށް ހީނާ ވަނީ އުޒުރުވެރިވެ ވަޑައިގެންފައެވެ.

ހީނާގެ ވާހަކަތަކުން ދޭހަވެފައި ވަނީ ސަރުކާރުގެ ހިންގުން ހަރުދަނާ ނޫންކަމަށް ރައީސް މުއިއްޒަށް ގަބޫލުކުރެވިފައިވާކަމެވެ.

ވެރިކަމަށް އައުމުގެ ކުރިން ރިޔާސީ އިންތިޚާބްގެ ކެމްޕެއިން ދުވަސްވަރު ރައީސް މުއިއްޒު ޕޯޑިއަމްތަކަށް އަރައިވަޑައިގެން ވާހަކަދައްކަވަމުން ވިދާޅުވެފައިވަނީ އެމަނިކުފާނުގެ ވެރިކަމުގައި މަގާމްތަކަށް އައްޔަންކުރައްވާނީ އިލްމީ ގާބީލް އަދި ތަޖުރިބާ ހުރި ފަރާތްތައް ކަމަށެވެ.

ނަމަވެސް ވެރިކަމަށް އައުމަށްފަހު ސަރުކާރުގެ ވުޒާރާތަކަށާއި ކުންފުނިތަކަށް ރައީސް މުއިއްޒު އައްޔަންކޮށްފައިވަނީ އެ މަގާމްތަކަށް އެއްވެސް ވަރަކަށް ކުފޫ ހަމަނުވާ ފަރާތްތަކެވެ.

އެހެންކަމުން ގިނަ ބަޔަކު ވަނީ އަދުގެ ސަރުކާރަށް ވަރަށް ބޮޑަށް ފާޑުކިޔާފައެވެ. ނަތީޖާއެއްގެ ގޮތުން ފެނިގެންދިޔައީ ރައީސް މުއިއްޒަށް ވެސް އެ ފަރާތްތަކާއެކު ސަރުކާރުގެ ހިންގުން ހަރުދަނާ ނުކުރެވޭނެ ކަމަށް ގަބޫލުކުރެވި އެ ފަރާތްތައް މަގާމްތަކުން ވަކިކޮށް އެ ފަރާތްތަކުން ތިއްބެވި މަގާމްތަކަށް ވުރެ ދަށް މަގާމްތަކަށް އެ ބޭފުޅުން އައްްޔަންކުރެއްވި މަންޒަރެވެ.