ތިމާ މީހާގެ ދަރިފުޅު ބަކަރި އެއްހެން ގުރުބާން ކުރުމަށްފަހު، 20 ވަނަ ރައްޔިތުންގެ މަޖިލީހުގެ ރައީސް ކަމުގެ ތަހުތު އަބްދުއްރަހީމް އަބްދުﷲ ހޯދެއްވި ކަމީ އޭގައި އެއްވެސް ޝައްކެއް އޮތްކަމެއް ނޫނެވެ. ދަރިފުޅު އިބްރާހިމް ފައިސަލް ޓުއަރިޒަމް މިނިސްޓްރީގެ މިނިސްޓަރަކަށް ރައީސް ޑރ މުހައްމަދު މުއިއްޒު އައްޔަން ކުރެއްވީ ވެސް އަދުރޭ ސަލާމުގެ ނާށިގަނޑު ހިއްޕަވައިގެން މުއިއްޒުގެ އަރިހަށް ވަޑައިގަތުމުންނެވެ.

ނަމަވެސް ދަރިފުޅު މިވީ ފެއިލެވެ. ވެރިކަމުގެ 6 މަސް ދުވަސް ތެރޭގައި ފައިސަލްގެ ސަބަބުން ރައީސް މުއިއްޒަށް އިސް އުފުލާލަން ވެސް ބޭރުގެ ފަރާތްތަކުގެ ކުރިމަތީގައި ނުކެރެނީއެވެ. ދެން އަދުރޭ ތިމަންނާ މަޖިލީހުގެ ރައީސަކަށް ހަދައިދޭށޭ ބުނުމުން ރައީސް މުއިއްޒަށް ވެސް ޝަރުތު ކުރެވެން އޮތްގޮތަކަށް ޝަރުތުކޮށް ފައިސަލް އެ މަގާމުން ވަކި ކުރުން އޯކޭ ކަމުގައި ވާނަމަ މަޖިލިސް ރައީސްގެ މަގާމް ދެވިދާނެ ކަމަށް ބަސް އިއްވީއެވެ. އަދުރޭ ހިތްޕުޅާ ވިޔަސް ނުވިޔަސް ހެޔޮކަމުގައެވެ. އިތުރުގޮތެއް އަދުރޭގެ ވަކި އެބައޮތް ހެއްޔެވެ. ފައިސަލްގެ ނާގާބިލްކަން އަދުރޭ އަށް ވެސް އެނގެއެވެ.

ނިމިދިޔަ ފަސް އަހަރު ޕޯޑިއަމްތަކަށް އަރައިވަޑައިގެން ކުރީގެ ރައީސް އިބްރާހިމް މުހައްމަދު ޞާލިހަކީ ނުކިޔަވާ ހުރި ނާގާބިލު ވެރިޔެކޭ ކަރުބުޑުން ހަޅޭލަވާފައި ގޮވި އިރު އެއީ ގަނާ ކުރުމެއް ނޫނެވެ. އެއީ އަދުރޭ ހިޔާލު ފާޅުކޮށްލީއެވެ. ނަމަވެސް މިއަދު ތިމާ މީހާގެ ދަރިފުޅުގެ ނާގާބިލްކަމުގެ ވާހަކަތައް އެކި އެކި ފަރާތްތަކުން ދެެއްކީމާ ތިމަންނާ ދަރިފުޅު ފަގީރު އާދައިގެ ރަށަކުން އައީމާހޭ ގަނާ ކުރަނީ ކިޔާފައި އަނގަ ހުޅުވަން އަދުރޭގެ ލަދެއް ހަޔާތެއް ހަމަ ނެތީއެވެ.

އަދުރޭ މަޖިލީހުގެ ރައީސް ކަމަށް، ރައީސް ޑރ މުހައްމަދު މުއިއްޒު ނިންމެވި ގޮތް މިހާރު ވަރަށް ސާފެވެ. އަދުރޭ އަށް މި ލިބުނީ އެއް ބާރުގެ ވެރިކަމެވެ. ފޮނިފަށެއް ވާނެތާއެވެ. ވެރިކަމުގައި ރައީސް ޑރ މުހައްމަދު މުއިއްޒު ހުންނެވި ނަމަވެސް ހާއްސަ މުޝީރުގެ މަގާމުގައި ހުންނަވާ ވެރިކަން ވެސް ހަގީގަތުގައި ކުރަނީ އަދުރޭއޭ ކިޔާތީ އަޑުއިވެއެވެ. އަދުރޭ މަޖިލީހުގެ ރައީސް ކަމަށް ހަމަޖެއްސުން މިއީ ރައީސް މުއިއްޒު އަމިއްލަ އަތައް ގޮވުން ފަދަ ކަމެއް ނޫންބާއެވެ.

މަޖިލީހުގައި އަދުރޭ މީގެ ކުރިން އުޅެފައިވާ ގޮތް އަޅުގަނޑު ދުށީމެވެ. ހައިރާންވެ އަންތަރީސްވެފައި ހިތައް އެރީ 20 ވަނަ ރައްޔިތުންގެ މަޖިލީހުގެ ރައީސް ކަމުގެ ތަހުތުގައި އިންނަވާ އެފަދަ ކަމެއް ކޮށްފާނެބާއެވެ. އަދުރޭގެ ގޮތެއް ނޭނގޭނެއެވެ. ދުލައް އައިހާ އެއްޗެއް ކިޔާފާނެއެވެ. ހެޔޮ އެއްޗެއް ވިޔަސް ނުވިޔަސް އަދުރޭ އަށް ހެޔޮވާނެއެވެ.

ދެން މަޖިލީހުގެ މެމްބަރުންނަށް "އިއްޒަތްތެރި" ކިޔާނެ ކަމަށް އަދުރޭ ބުނުމުން ހައިރާންވެއްޖެއެވެ. އެހެން މެމްބަރުންނަށް އިއްޒަތްތެރި ކިޔިދާނެއެވެ. ނަމަވެސް އަދުރޭ އަށް އިއްޒަތްތެރި ކިޔާނީ ކޮން ބައެއްބާއެވެ؟ މަޖިލިސް އިންތިޚާބާ ދިމާކޮށް ބަހާލި ރިޝްވަތުގެ ތެލި ސެޓް ލިބުނު ދެތިން ކުދިން ކިޔާފާނެއެވެ.

މީގެ ކުރީ މަޖިލިސްތަކުން ފެނިގެން ދިޔައީ ބަކަރިތަކެކެވެ. ކޮށްޓެއް ތެރޭގައި އުޅެން ނޭނގިގެން އުޅުެއްވި މަންޒަރުތަކެވެ. ސުވާލު އުފައްދަމުން ދިޔައީ މި ދައުރުގެ މަޖިލިސް ވެސް ވެގެންދާނީ އެފަދައިންބާއެވެ. މިއަދު މިއޮތީ ޔަގީންވެފައެވެ. އަދުރޭ މަޖިލީހުގެ ރައީސް ކަމަށް ރައީސް މުއިއްްޒު އައްޔަން ކުރެއްވުމާއެކު މިކަން ސާފުވެއްޖެއެވެ. އަދުރޭ މަޖިލީހުގެ ރައީސް ކަމުގައި މަޖިލީހަކީ ބަކަރިކޮށްޓެއްކަން ޔަގީނެވެ.