ޣައްޒާގެ ދެކުނަށް ވަނުމަށް ހުއްދަ ދީފައިވާ އިންސާނީ އެހީގެ ޓްރަކްތަކަކީމީހުންގެ ނިކަމެތި ބޭނުންތައް ފުއްދައިދޭ ޓްރަކްތަކެއް ނޫންކަމަށް އެސަރަހައްދުގައި ހަރަކާތްތެރިވަމުން އަންނަ ނޫސްވެރިން ބުނެފިއެވެ.

ބުދަ ދުވަހުން ފެށިގެން ގަތަރުގެ ބްރޯކަރެއްގެ ދަށުން މަދުވެގެން 10 ޓްރަކް ވަނީ ޣައްޒާއަށް ވަނުމަށް ދޫކޮށްލާފައެވެ. އެމީހުން ގެނައި ސަޕްލައިތަކުގެ ތެރޭގައި ހޮސްޕިޓަލްތަކަށް ބޭނުންވާ ސާމާނުގެ އިތުރުން ޣައްޒާގައި ބަންދުކޮށްފައި ތިބި އަސީރުންނަށް ބޭނުންވާނެ ބޭސް ވެސް ހިމެނެއެވެ.

ފަލަސްތީނުގެ ރައްޔިތުން ވަނީ ހަމައެކަނި އެހީ ނުވަތަ ފުޑް ސްޓޭމްޕް ހޯދުމަށް ބައި ދުވަހަށް ވުރެ ގިނަ ދުވަހު ކިއުގައި ތިބުމުގެ އާދައަކަށް އާދަވެފައި ކަމަށްވެސް ނޫސްވެރިންވަނީ ބުނެފައިއެވެ. އެއީ ގަބޫލުކުރަން ދަތި އުނދަގޫ ކަމެއް ކަމުގައި ވާއިރު، އިންސާނީ އެހީތެރިކަމުގެ ޓްރަކުތައް އަންނަނީ 1.9 މިލިއަނަށް ވުރެ ގިނަ ފަލަސްތީނުގެ ގެދޮރު ގެއްލިފައިވާ މީހުންގެ ބޭނުންތަކާ އަޅާބަލާއިރު ވަރަށް މަދުން ކަމަށްވުމުން ކަމަށްވެސް އެމީހުން ދަނީ ބުނަމުންނެވެ.

އިސްރާއީލުން ފަލަސްތީނަށް ދެމުން އަންނަ ހަމަލާތަކަށް އެއްވެސް މަޑުޖެހުމެއް އައިސްފައި ނުވާއިރު، ބޭސްފަރުވާ އާއި ސާފުބޯފެން ނުލިބުމުގެ ސަބަބުން އެގައުމުގެ ރައްޔިތުންގެ ތެރޭގައި އެކި ކަހަލަ ބަލިމަޑުކަން ދަނީ ފެތުރެމުންނެވެ.

މީގެ އިތުރުން ކާބޯތަކެތި ނުލިބުމުގެ ސަބަބުން ފަލަސްތީނުގެ ރައްޔިތުން ވަނީ ބަނޑައްޖެހިފައި ކަމަށްވެސް އެ ގައުމުގެ ހެލްތު މިނިސްޓްރީއިން ވަނީ ބުނެފައިއެވެ.

އޮކްޓޯބަރު މަހުގެ 7 ވަނަ ދުވަހުން އިސްރާއިލުން ފަލަސްތީނަށް ދެމުން އަންނަ ހަމަލާތަކުގައި ޝަހީދުވި މީހުންގެ އަދަދު 24،000 ވަނީ ވުރެން މައްޗަށްގޮސްފައިއެވެ.