އެއްވެސް މީހަކާއި މެދު އިމިގްރޭޝަން ގާނޫނު ތަފާތުކުރުމެއް ނުގެންގުޅޭނެ ކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވެއްޖެއެވެ.

ޝަމްއާން މިހެން ވިދާޅުވެފައިވަނީ އިމިގްރޭޝަންގެ ގާނޫނުގެ 08 ވަނަ މާއްދާގެ ދަށުން ރާއްޖެ އެތެރެވުމުގެ ހުއްދަނެތް މީހަކު ރާއްޖެ އެތެރެވުން ހުއްޓުވުމުން އޭނާގެ ޤާނޫނީ ވަކީލުން ޝަކުވާ ކުރަމުން ދަނިކޮށް ކުރެއްވި ޓްވީޓެއްގައެވެ.

މައުލޫމާތު ލިބިފައިވާ ގޮތުގައި ރާއްޖެ އެތެރެވާން އުޅުމުން އެތެރެވުމުގެ ހުއްދަ ނުދިން މީހަކީ އިމިގްރޭޝަން ގާނޫނުގެ 20 ވަނަ މާއްދާ އަށް ރިޢާޔަތްކޮށް އެޤާނޫނުގެ 33 ވަނަ މާއްދާގެ ދަށުން މިމަހުގެ 04 ވަނަ ދުވަހުން ފެށިގެން ވަކިމުއްދަތަކަށް ދިވެހިރާއްޖެ ނާދެވޭގޮތަށް ޑީޕޯޓް ކޮށްލާފައިވާ މީހެކެވެ. އޭނާ އަކީ ކުރިން ދިވެއްސަކާއި ކައިވެނި ކޮށްގެން އުޅުނު މީހެކެވެ. މި ބިދޭސީ މީހާގެ މައްޗަށް ޖިނާއީ ގިނަ ކުށްތަކެއްގެ ތުހުމަތު ވެސް ކުރެވިފައިވާކަމުގެ މައުލޫމާތުވެސް ލިބިފައިވެއެވެ.

ޝަމްއާން ކުރެއްވި ޓްވީޓްގައި އިތުރަށް ފާހަގަކޮށްފައިވަނީ  ރާއްޖެ އިން ފުރައިގެން ދާން ބޭނުންވާ މީހުންނާއި، ރާއްޖެއަށް އެތެރެވާ މީހުންނާއި އަދި ރާއްޖެ އެތެރެވެ ރާއްޖޭގައި ތިބި ބިދޭސީންގެ މައްޗަށް ވެސް އިމިގްރޭޝަން ގާނޫނު ހިންގުމުގައި އޭނާ ފަސް ޖެހިވަޑައި ނުގަންނަވާނެ ކަމަށާއި ހުރިހާ އެންމެންގެ މައްޗަށް އެއްވެސް ތަފާތު ކުރުމެއްނެތި އިމިގްރޭޝަން ޤާނޫނު ތަންފީޒު ކުރައްވާނެ ކަމަށެވެ.