ސޯޝަލް އެންޑް ފެމެލީ ޑިވެލޮޕްމެންޓް މިނިސްޓްރީގައި ތިބި ސިޔާސީ މުވައްޒަފުންގެ އަދަދު ހޯދަން ނޫހަކުން އެދުމުން، ސިޔާސީ މުވައްޒަފުންގެ އަދަދު ނޭނގޭ ކަމަށް ޖަވާބު ދެވުނީ އޮޅުމަކުން ކަމަށް އެ މިނިސްޓްރީން ބުނެފިއެވެ.

ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު މެއި މަހުގެ ފުރަތަމަ ދުވަހާ ހަމައަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓަށް އައްޔަންކުރި ސިޔާސީ މުވައްޒަފުންގެ އަދަދު ހާމަކޮށްދިނުމަށް އެދި "އަދަދު" ނޫހުން އެދުމުން އެ ވުޒާރާއިން ބުނެފައިވަނީ، ލިޔެކިޔުންތަކެއް ގެއްލިފައިވާތީ އެ މައުލޫމާތު ހިއްސާކުރެވެން ނެތް ކަމަށެވެ.

ނަމަވެސް އަދަދު ނޫހުން އެ ޚަބަރު ޝާއިއު ކުރުމުން ކުރިން ބުނި އެތި ކެންސަލްކޮށް މިނިސްޓްރީއިން ވަނީ މައުލޫމާތު ފޯރުކޮށްދީފައެވެ.

އެ މިނިސްޓްރީއިން ހާމަކުރި ގޮތުގައި އެފަދައިން ޖަވާބު އެރުވުނީ ފަހުމުވުމުގައި އެރި "އޮޅުމަކުން"ނެވެ.

މިނިސްޓްރީން ވަނީ ބަޔާނެއް ނެރެފައެވެ. އެ ބަޔާނުގައި ބުނެފައި ވަނީ، އެ ނޫހުން އެދިފައި ވަނީ 2013 ވަނަ އަހަރާއި 2023 ވަނަ އަހަރު އެ މިނިސްޓްރީގައި ތިބި ސިޔާސީ މުވައްޒަފުންގެ އަދަދު ހޯދުމަށް ކަމަށެވެ.

ދެ ހުށަހެޅުމެއް އައިސްފައި ވާތީ، ދެ ފަހަރު ވެސް ޖަވާބު ފޮނުވުނީ 2013 ވަނަ އަހަރު ތިބި ސިޔާސީ މުވައްޒަފުންނާ ގުޅޭ ގޮތުން ކަމަށް މިނިސްޓްރީން ބުންޏެވެ. ނޫހަށް ފޮނުވި ޖަވާބުގައި މިނިސްޓްރީން ބުނެފައި ވަނީ އެކި ފަހަރު މަތިން އެކި އިމާރާތްތަކަށް މިނިސްޓްރީގެ ހިންގުން ބަދަލު ކޮށްފައިވާތީ ލިޔެކިޔުންތައް ގެއްލިފައި ވާތީ އެ އަދަދު ނޭންގޭ ކަމަށެވެ.

މިނިސްޓްރީން ބުނެފައި ވަނީ އެ ޖަވާބު ފޮނުވުނީ އޮޅުމަކުން ކަމަށާއި، މިފަދަ ކަންކަމުގައި މިނިސްޓްރީން އަބަދުވެސް ކަން ކުރާނީ ޑރ. މުހައްމަދު މުއިއްޒު ގެންގުޅުއްވާ، ހާމަކަންބޮޑު ގޮތެއްގައި މައުލޫމާތު ހާމަކުރުމުގެ ސިޔާސަތު ކަމަށެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން މިނިސްޓްރީތަކުން މިފަދަ މައުލޫމާތު ހޯދެއެވެ. ނަމަވެސް ގިނަ އިދާރާތަކުން މައުލޫމާތު ހޯދަން ވަރަށް އުނދަގޫކަން ފާހަގަކޮށްލެވެއެވެ.