ތ.ވޭމަންޑޫގައި ގާއިމުކުރެވިފައިވާ ކުޑަކުދިންގެ ސެންޓަރުގައި ހުރި އަންހެން ކުއްޖެއް އެ ތަނަގައި މަސައްކަތް ކުރަމުން ދިޔަ ސްޓާފަކަށް ހަމަލާދީފިއެވެ.

އެ ރަށަށް ނިސްބަތްވާ މި މުވައްޒަފަށް ހަމަލާ ދިނުމާއި ގުޅިގެން އެ ރަށު ރައްޔިތުން ވަނީ ރޭގެ ވަގުތެއްގައި މުޒާހަރާވެސް ކޮށްފައެވެ.

އެ ރަށުން މައުލޫމާތު ހިއްސާކޮށްފައިވާ ގޮތުގައި އުމުރުން 15 ނުވަތަ 16 އަހަރުގެ މި އަންހެން ކުއްޖާއަކީ އެހެން ކުދިންނަށް އަނިޔާ ކުރުމުގެ ރިކޯޑް މީގެ ކުރިންވެސް އޮންނަ ކުއްޖެއް ކަމުގައެވެ. އަދި މިކަމާއި ބެހޭ މައްސަލަ މީގެ ކުރިންވެސް އާންމުންގެ ފަރާތުން ވަނީ ކަމާއި ބެހޭ އިދާރާތަކަށް ހުށަހަޅާފައިކަމަށެވެ.

މި މައްސަލަތަކަށް ހައްލެއް މިހާތަނަށް ލިބިފައިނުވާއިރު، އަންހެން ކުއްޖާގެ ސަބަބުން އާންމުން ބޮޑު ބިރުވެރިކަމެއްގެ ތެރެއަށް ވެއްޓިފައިވާ ކަމަށް އެ ރަށުގެ ގިނަ ބަޔަކު ވަނީ ސިފަކޮށްފައެވެ.

މި މައްސަލައާއި ގުޅިގެން ކުރި މުޒާހަރާގައި އެ ރަށު ރައްޔިތުން ވަނީ އަންހެން ކުއްޖާ ރަށުން ބޭލުމަށް ގޮވާލާފައެވެ.

މީގެ އިތުރުން، މި މައްސަލަ މިހާރު ބަލަމުން އަންނަ ކަމަށް ޖެންޑާ މިނިސްޓްރީ އިން ވަނީ ބުނެފައެވެ.