ފަލަސްތީނާ ދެކޮޅަށް ނިރުބަވެރި އިޒްރާއިލުން ހިންގަމުން ގެންދާ ޖަރީމާތަކާ ދިވެހި ސަރުކާރާ ރައްޔިތުންވެސް ދެކޮޅު ކަމަށް ރައީސް ޑރ. މުހައްމަދު މުއިއްޒު ވިދާޅުވަމުން ގެންދަވާއިރު، އެމަނިކުފާޏުގެ އަމަލުފުޅުން އެކަން ނުފެންނަކަމީ އެކަމުގައި އެމަނިކުފާނުގެ ނިޔަތާ މެދު ސުވާލު އުފައްދަން ޖެހޭ ހިސާބެވެ.

އެގޮތުން އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ގުޅިގެން އިޒްރޭލުގެ ޕާސްޕޯޓު މަނާކުރަން އެދި ރައްޔިތުންގެ މަޖިލިސްކުރާ ގޭގެ ކައިރިއަށް އާންމުން ފުރަތަމަ އެއްވީ މިދިޔަ ނޮވެމްބަރު 15، ގަ އެވެ. އެއީ މީގެ 7 މަހެއްހާ ދުވަސްކުރިއެވެ.

ސިލްސިލާ އަޑުއުފުލުންތަކަށްފަހު ޕްރެޝަރު ބޮޑުވެ މަޖިލީހަށް ބިލުތަކާއި ގަރާރުތައް ހުށަހެޅި އެވެ. އިޒްރޭލުގެ ޕާސްޕޯޓު މަނާކުރުމަށް ލަފާދީ މަޖިލީހުގެ ހާރިޖީ ކޮމިޓީން ނޮވެމްބަރު 16، ގައި ރައީސަށް ސިޓީއެއް ވެސް ވަނީ ފޮނުވާފައެވެ.

އެއާއެކު އޭރު ރައީސް އޮފީހުގެ ޕްރެސްތަކަށް އަރުއްވަމުން ގެންދެވި ރައީސް އޮފީހުގެ އަންޑަ ސެކެރެޓަރީ ފޯ ޕަބްލިކް ޕޮލިސީ، މުހައްމަދު ފިރުޒުލް ވިދާޅުވެފައިވަނީ، ޕާސްޕޯޓު މަނާ ކުރުމާ ގުޅޭ މަސައްކަތްތައް ކަމާބޭހޭ އިދާރާތަކުން ކުރަމުންދާ ކަމުގައެވެ.

އެހެންނަމަވެސް މިހާތަނަށްވެސް އިޒްރޭލު ރައްޔިތުން ރާއްޖެއައުން މި ސަރުކާރުން މަނާކޮށްފައެއް ނުވެއެވެ.

މިކަމާ ގުޅިގެން މިހާރުގެ ޗީފު ސްޕޯކްސްޕާސަން ހީނާ ވަލީދު ވިދާޅުވެފައިވަނީ ދިވެހި ސަރުކާރުން ދެމި އޮންނާނީ ފަލަސްތީނާ އެކު ކަމަށެވެ. ނަމަވެސް އިޒްރޭލު ޕާސްޕޯޓު ބޭންކުރުން ލަސްވާ ސަބަބެއް ވިދާޅުވެފައި ނުވެއެވެ.

މައުލޫމާތު ލިބިފައިވާ ގޮތުގައި އިޒްރޭލް ޕާސްޕޯޓް ބޭން ކުރުމަށް ސަރުކާރުން ބިރުން އުޅެނީ އެމެރިކާއިން އިންޒާރު ދިނުމާއި ގުޅިގެންނެވެ. އިޒްރޭލް ޕާސްޕޯޓް ބްލޮކް ކުރުމަށް ރައްޔިތުން މަޖިލީހުން ފާސްކޮށް އެކަން ކޮށްދިނުމަށް މުއިއްޒަށް އެންގުމުން، އެމެރިކާއިން މުއިއްޒަށް އިޒްރޭލާއި ދެކޮޅަށް އެއްވެސް ކަމެއް ނުކުރުމަށް އެންގިއެވެ.

ރައީސް މުއިއްޒު ސަރުކާރު އައުމަށް ފަހު އިޒްރޭލުން ހިންގާ ލާއިންސާނީ އަމަލަށް ގަތުލުއާންމު ނުވަތަ އެއީ ޖެނަސައިޑެއް ކަމަށް ބުނުން ވަނީ ހުއްޓާލާފައެވެ. ކުރީ ސަރުކާރުން، އިޒްރޭލުން ހިންގާ ގަތުލުއާންމު އެއީ ޖެނަސައިޑް ނުވަތަ ގަތުލު އާންމެއް ކަމަށް ވަނީ ބުނެފައެވެ. ނަމަވެސް މި ސަރުކާރުން ދަނީ އިޒްރޭލާއި މެދު އެފަދައިން މުހާތަބު ނުކުރަން އެމެރިކާގެ ނިވްޔޯކުގައި ހުންނަ ރާއްޖޭގެ އެމްބަސީއަށް އަންގާފައެވެ.

ކަންކަން މިހެން ހުރިއިރު ދާދި އިހަކަށް ދުވަހު އަނެއްކާވެސް އެހެން މައްސަލަ އެއް ފެންމަތިވެފައެވެ. އެގޮތުން ބޮސްނިއާގެ ގަތުލުއާންމު ބައިނަލް އަޤްވާމީ ގޮތުން ފާހަގަކުރުމަށް ފެންނަކަމަށް 84 ގައުމަކުން ވޯޓު ދީފައިވެއެވެ. އަދި ނުފެންނަ ކަމަށް ވޯޓު ދީފައިވަނީ 19 ގައުމަކުންނެވެ. ވަކި ގޮތަކަށް ނުފެންނަ ކަމަށް 68 ގައުމަކުން ވޯޓު ދީފައިވާއިރު، ދިވެހިރާއްޖެ ހިމެނެނީ އޭގެ ތެރެއިންނެވެ.

ބޮސްނިއާ ގަތުލުއާއްމު ފާހަގަކުރަން ވޯޓުނުދިން ސަބަބު ހާމަކުރުމަށް ކުރީގެ ރައީސް، ރައީސް މައުމޫނު އަބްދުލްގައްޔޫމު ސަރުކާރަށް ގޮވާލެއްވުމުން އެކަމުގެ ޖަވާބު ޚާރިޖީ ވަޒީރު މޫސާ ޒަމީރަށް ނުދެއްވުނު ނަމަވެސް ސަރުކާރު ދިފާއުކުރައްވާ ޕަލަސްތީނުގެ ނަން ބޭނުންކޮށް އަނެއްކާވެސް މެޑަލް ޖަހަން މަސައްކަތްކުރައްވާފައިވެއެވެ.

އެގޮތުން ސަރުކާރުގެ އިސް އޮފިޝަލަކު މެދުވެރިކޮށް އޮންލައިން ނޫހަކަށް ދިން ބަސްދީގަތުމުގައި ވިދާޅުވި ގޮތުގައި ބޮސްނިޔާ މައްސަލައިގައި ވަކި ފަރާތަކަށް ޖެހި ވޯޓު ނުދިނީ އެ ގަރާރުގެ ކަންކަމުގައި އިސްކޮށް އުޅުނީ އިޒްރޭލަށް ފާޅުގައި ވާގިވެރިވާ ގައުމުތައް ކަމަށް ވާތީ އެ ފަރާތްތަކަށް ވާގިވެރި ނުވުމަށް ކަމަށެވެ.

މީގެ އިތުރުން ފަލަސްތީނުގެ މައްސަލަ އެންމެ މުހިންމު ކަމެއްގެ ގޮތުގައި އޮއްވާ އެ ގަރާރުގެ ކަންކަން ކުރިއަށް ނެރެގެން އުޅެނީ ފަލަސްތީނުގެ މައްސަލައަށް، އދ.ގައި ލިބޭ ސަމާލުކަން ކުޑަކުރަން ކަމުގެ ތުހުމަތު އޮތް ކަމަށް ވެސް އޮފިޝަލް ވިދާޅުވިއެވެ.

އެންމެ ރަގަޅެވެ. ކަން އޮތީ މިހެން ކަމަށްވެ އަދި މި ސަރުކާރަކީ އިޒްރޭލުގެ ލާއިންސާނީ އަމަލުތަކާ އެހާ ދެކޮޅު ސަރުކާރަކަށް ވަންޏާ އިޒްރޭޅު ޕާސްޕޯޓު ބޭންކުރަން މަޖިލީހުން ފޮނުވި ގަރާރު ފާސްކުރަން ރައީސް މުއިއްޒަށް ކެރިވަޑައިނުގެން އުޅުއްވަނީ ކީއްވެބާއެވެ؟ އެ ޕާސްޕޯޓުގައި ރާއްޖެ އެތެރެވާ ގިނަ މީހުންނަކީ ފަތުތުރުވެރިންގެ ގޮތުގައި އަންނަ އިޒްރޭލުގެ ނިރުބަވެރި ސިފައިން ވިއްޔާއެވެ.

ފަލަސްތީނުގެ ރައްޔިތުން ދެކެ ތިހާ ލޯބި ވަންޏާ ގަަލަންކޮޅު ނަންގަވާ އެ ބިލު އޮތް ކަރުދާހުގައި ސޮއި ކޮށްލެވުމަށް މިހާ ގިނަ ދުވަސް ނަގަނީ ކީއްވެ ބާއެވެ؟ ކޮންމެ ތަނެއްގައިވެސް ތިޔަ މަސައްކަތްކުރައްވަނީ ބޯވައެއްގެ ގޮތުގައޭ ބުނަން މިހާރު މަޖްބޫރުވެއްޖެއެވެ.