މަސްވެރިންނަށް ފައިސާ ނުދީ ގައުމުގެ ވެރިން ބޭރުގެ ގައުމުތަކަށް ދަތުރުކުރައްވާތީ މަސްވެރިން ކަންބޮޑުވުން ފާޅުކޮށްފިއެވެ.

މަސްވެރި އެއް އެކްސްގައި ކުރެއްވި ޕޯސްޓެއްގައި ބުނެފައިވަނީ މަސްވެރިންގެ 62 މިލިއަން ރުފިޔާ ސަރުކާރުން ހިފަހައްޓާފައިވާކަމަށެވެ.

މި މަސްވެރިޔާ އެހެން ފާހަގަކޮށްފައިވާއިރު، ފިޝަރީޒް މިނިސްޓާރ އަހުމަދު ޝިޔާމް ދާދި ފަހުން ބޭއްވި ނޫސްވެރިންގެ ބައްދަލުވުމުގައި ވެސް ވަނީ މަސްވެރިންނަށް ދޭން ޖެހޭ 62 މިލިއަން ރުފިޔާ ހުރިކަމަށް ވިދާޅުވެފައެވެ.

މަސްވެރިންނަށް 48 ގަޑިއިރު ތެރޭގައި ފައިސާ ދޭނެކަމަށް ބުނެ އައި ސަރުކާރުން މަސްވެރިންނާ ދޭތެރޭ ކަންތައް ކުރައްވަމުން ގެންދަވަނީ ވަރަށްވެސް އިހާނާތެކޮށްކަމަށް ގިނަ މަސްވެރިން އަންނަނީ ބުނަމުންނެވެ.

އެގޮތުން މަސްވެރިންނަށް ފައިސާ ނުދީ ހުރުމަށްފަހު މަސްވެރިން އިހުތިޖާޖް ކުރުމުން ފައިސާ ދީފައިވަނީ 20 ވަނަ ރައްޔިތުންގެ މަޖިލިސް އިންތިޚާބާ ދިމާކޮށް އެ މަސްވެރިން "ގުނބޯ" ހެއްދުމަށެވެ.

މަޖިލިސް އިންތިޚާބް ބާއްވާފައިވަނީ އޭޕްރިލް މަހުގެ 21 ވަނަ ދުވަހުއެވެ. މަސްވެރިންނަށް އެންމެ ފަހުން ފައިސާ ދީފައިވާނީ އޭޕްރިލް މަހުގެ 22 ވަނަ ދުވަހާ ހަމައަށް ކަމަށް މިނިސްޓާރ ޝިޔާމް ވަނީ ވިދާޅުވެފައެވެ.

އެހެންކަމުން ދޭހަވެގެންދަނީ މަސްވެރިންނަށް މަޖިލިސް އިންތިޚާބަށްފަހު ފައިސާ ދީފައިނުވާކަމެވެ.

އެ މަސްވެރިޔާ އިތުރަށް އެކްސްގައި ކުރި ޕޯސްޓްގައި ބުނެފައިވަނީ ދައުލަތުގެ ވެރިން ބޭރުގެ ގައުމުތަކަށް ދަތުރު ކުރަނީ މަސްވެރިންނަށް ފައިސާ ނުދީކަމަށެވެ. އެގޮތުން ރައީސް ޑރ މުހައްމަދު މުއިއްޒު އާއި، ހާރިޖީ ވަޒީރު މޫސާ ޒަމީރު އަދި އެންވައިރަމަންޓް މިނިސްޓާރ ތޯރިގް ބާބުޑާއަށް ވަޑައިގެންފައިވާއިރު، ފާއިތުވި ހަފްތާގައި ފިޝަރީޒް މިނިސްޓާރ ޝިޔާމް ހުންނެވީ ތައިލެންޑްގައި ކަމަށެވެ. އަދި އޭގެއިތުރުން އެޑިޔުކޭޝަން މިނިސްޓާރ ހުންނެވީ އިނގިރޭސި ވިލާތުގައި ކަމަށެވެ.

މަސްވެރިން ބާނާ މަހުގެ އުޖޫރަ ނުދީ ސަރުކާރުގެ އިސް ފަޑީގައި ތިއްބަވާ ފަރާތްތަކުން ހަނު ހުންނަވާ ދައުލަތުގެ ފައިސާ ނަހަމަގޮތުގައި ބޭނުންކުރަމުން ގެންދަވާތީ ގިނަ ބަޔެއްގެ ނުރުހުން ސަރުކާރަށް އަންނަނީ އަމާޒުވަމުންނެވެ.