ދިވެހިރާއްޖޭގައި ރަހީނުކުރުމުގެ މައްސަލަތއް އިތުރުވަމުންދާތީ ގޮތް ނޭނގޭ މީހުން އެދިގެން ތަންތަނަސް ނުދިއުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.
ފުލުހުންގެ އިދާރާއިން އާންމުކޮށްފައިވާ ތަފާސްހިސާބުތަކަށް ބަލާއިރު މިދިޔަ އަހަރުގެ ޑިސެމްބަރުގެ ފަހުން ފެށިގެން މި މަހުގެ 16 ވަނަ ދުވަހުގެ ނިޔަލަށް ރަހީނު ކުރުމުގެ 27 މައްސަލައެއް ހުށަހަޅާފައިވެއެވެ. އަދި މިއަހަރުގެ މިހާތަނަށް ވައްކަމުގެ 2952 މައްސަލައެއް ހުށަހަޅާފައިވާކަމަށް ދިވެހި ފުލުހުންގެ ހިދުމަތުން ވަނީ ހާމަކޮށްފައެވެ.
ފުލުހުން އާންމުކުރި ތަފާސް ހިސާބުތައް ދައްކާ ގޮތުން މިއަހަރުގެ މިހާތަނަށް އެންމެ ގިނައިން ރިޕޯޓުކޮށްފައިވަނީ ވައްކަމުގެ މައްސަލަތަކެވެ.
އެގޮތުން ޖަނަވަރީ މަހު 668 މައްސަލަ، ފެބުރުއަރީ މަހު 607 މައްސަލަ، މާޗު މަހު 701 މައްސަލަ، އޭޕްރީލް މަހު 620 މައްސަލައިގެ އިތުރުން މެއި މަހުގެ 16 ވަނަ ދުވަހާއި ހަމައަށް 356 މައްސަލަ ވައްކަން ކޮށްގެން ހުށަހަޅާފައިވެއެވެ. މިއާއެކު މިއަހަރުގެ މިހާތަނަށް ހުށަހެޅިފައިވާ ވައްކަމުގެ މައްސަލަތަކުގެ ޖުމްލަ އަދަދަކީ 2952 އެވެ.
މާރާމާރީގެ ކޭސްތަކަށް ބަލާއިރު ޑިސެމްބަރު މަހު 155 މައްސަލަ ރިޕޯޓްކޮށްފައިވާއިރު މި މަހުގެ 16 ވަނަ ދުވަހަށް ރިޕޯޓްކޮށްފައިވަނީ 62 މައްސަލައެވެ.
ފޭރުމުގެ 117 މައްސަލައެއް ޑިސެމްބަރު މަހު ރިޕޯޓްކޮށްފައިވާއިރު މި މަހުގެ 16 ވަނަ ދުވަހުގެ ނިޔަލަށް ރިޕޯޓްކޮށްފައިވަނީ 38 މައްސަލައެކެވެ.
