އަންގާރަ ދުވަހު ހުވާ ކުރި 20 ވަނަ ރައްޔިތުންގެ މަޖިލީހުގެ ކޮމިޓީތަކުގައި މެމްބަރުން ތިބޭނެ އަދަދު ފާސްކޮށްފިއެވެ.

އެގޮތުން އަންގާރަ ދުވަހު އައު މަޖިލިސް ހުވާ ކުރުމަށް ފަހު ބޭއްވި ފުރަތަމަ ޖަލްސާގައި، މަޖިލީހުގެ ދާއިމީ ކޮމިޓީތައް އެކުލަވައިލުމާ ގުޅޭ ގޮތުން ޕީއެންސީގެ ޕާލިމަންޓްރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހީމް ފަލާހު ވަނީ މައްސަލައެއް ހުށަހަޅާފައެވެ.

އެގޮތުން ރައްޔިތުންގެ މަޖިލީހުގެ 241 ކޮމިޓީއަށް 13 މެންބަރުން އަދި މަޖިލީހުގެ އެހެން ދާއިމީ ކޮމިޓީތަކަށް 11 މެންބަރުން ކަނޑައަޅަން ފަލާހު ހުށަހެޅުއްވި ހުށަހެޅުން ފާސްކުރީ މަޖިލީހުގެ 88 މެންބަރުންގެ ވޯޓުންނެވެ. އެ ހުށަހެޅުން ފާސްކުރަން ނުފެންނަ ކަމަށް އެއްވެސް މެންބަރަކު ވޯޓު ދީފައެއް ނުވެއެވެ.

ނަމަވެސް ފަލާހުގެ ހުށަހެޅުމުގައި ކޮމިޓީތަކުގައި ހިމެނޭ މެންބަރުންގެ ނަންތައް ފާސްކުރުމެއް ނެތެވެ.

ފަލާހު ހުށަހެޅުއްވީ އަންނަ އާދީއްތަ ދުވަހުގެ ނިޔަލަށް ޕާޓީތަކަށް ނަން ހުށަހަޅަން ފުރުސަތު ހުޅުވާލުމަށެވެ. މަޖިލީހުގެ ތަޅުމުން އަންގާރަ ދުވަހު ފާސްކުރީ ފަލާހުގެ އެ ހުށަހެޅުއްވުމަށެވެ.

ކޮމިޓީތަކުގައި ޕާޓީތައް ތަމްސީލްވާނެ ގޮތެއް ވެސް އަދި ފާހެއް ނުކުރެއެވެ. މަޖިލީހުގެ ބޮޑު މެޖޯރިޓީއެއް ޕީއެންސީއަށް އޮތުމުން ބެލެވޭ ގޮތުގައި އެ ނިސްބަތަށް ކޮމިޓީތަކުގެ މެޖޯރިޓީ ދޭނީ އެ ޕާޓީއަށެވެ. އެއީ ރާއްޖޭގެ ތާރީހަށް ބަލާއިރު، މަޖިލިސްތަކުގައި އާންމުކޮށް އަމަލުކުރާ ވެސް ގޮތެވެ.