މަސްވެރިކަމުގެ ދާއިރާއަށް ގިނަ ޚިދުމަތްތަކެއް ކޮށްދެއްވައިފާ އަހްމަދު ހާފިޒު މިއަދު ނިޔާވެއްޖެއެވެ.
ހާފިޒަކީ މަސްވެރިކަމުގެ ސިޔާސަތު ރޭވުމާއި މަސްވެރިކަމާ ގުޅޭ ގޮތުން އާންމުން ހޭލުންތެރި ކުރުވުމުގެ ގޮތުން ވަރަށް ގިނަ މަސައްކަތްތަކެއް ކުރެއްވި ބޭފުޅެކެވެ. ރާއްޖޭގެ މެރިން ރިސާޗް ސެންޓަރު އުފެދުނީއްސުރެ އެ ތަނުގައި ހާފިޒު ވަނީ ވަރަށް އިސް ދައުރެއް އަދާކުރައްވައިފައެވެ. މަސްވެރިކަމާ ގުޅޭ ގިނަ ލިޔުންތަކެއް އިނގިރޭސި ބަހުންނާއި ދިވެހި ބަހުން ލިޔުއްވި ހާފިޒު ވަނީ ރަސްއައިން"ގެ އެޑިޓަރުކަން ވަރަށް ގިނަ ދުވަހު ކުރައްވައިފައެވެ.
ބާސްކެޓް ބޯޅަ އެސޯސިއޭޝަންގެ ރައީސްކަން ވެސް ކުރެއްވި ހާފިޒަކީ ކުޅިވަރާއި ތައުލީމަށް ވެސް ގިނަ ހިދުމަތްތަކެއް ކުރެއްވި ބޭފުޅެކެވެ. އެގޮތުން ހާފިޒު ޔޫތު މިނިސްޓްރީގެ ސްޓޭޓް މިނިސްޓަރުކަން ވެސް ކުރެއްވިއިރު، އަހުމަދިއްޔާ ސްކޫލަށް 20 އަހަރެއްހާ ދުވަހު ހިދުމަތް ކުރައްވައި އެ ސްކޫލުގެ ސީނިއާ އެސިސްޓެންޓް ޕްރިންސިޕަލް ކަން ވެސް އޭނާ ކުރެއްވިއެވެ.
ރާއްޖޭގެ ކަނޑުތަކުގައި އުޅޭ މަސްމަހާ ބެހޭ މައުލޫމާތު ވަރަށް ރަނގަޅަށް އެނގިވަޑައިގަންނަވާ ހާފިޒުގެ ނަމާ ގުޅުވައިގެން މަހަކަށް "ހާފިޒް"ގެ ނަން ދިން ހަމައެކަނި ބޭފުޅަކީ ވެސް ހާފިޒެވެ.
ކެންސަރު ބަލީގައި ދިގު މުއްދަތެއް ވަންދެން ފަރުވާ ހޯއްދަވަމުން ގެންދެވި ހާފިޒް 66، އަވަހާރަވީ އައިޖީއެމްއެޗްގައި ކަމަށް މައުލޫމާތު ހޯދިފައިވެއެވެ.
