މަސްވެރިންނަށް އޭޕްރިލް 22 ގެ ފަހުން ފައިސާ ދީފައިނުވާތީ މަސްވެރިކަމާ ބެހޭ ވުޒާރާގެ ވަޒީރު، އަހުމަދު ޝިޔާމަށް މަސްވެރިއެެއް ސުވާލު އަމާޒުކޮށްފިއެވެ.

ޒުވާން މަސްވެރިޔެއް އެކްސްގައި ކުރެއްވި ޕޯސްޓެއްގައި ބުނެފައިވަނީ ސަރުކާރުގެ ސިޔާސީ މަގާމްތަކުގައި ތިއްބަވާ މުވައްޒަފުންނަށް މުސާރަ ދެވޭއިރު ނިކަމެތި މަސްވެރިންނަށް ބާނާ މަހުގެ ފައިސާ ނުދެވެނީ ކީއްވެތޯއެވެ.

އެ މަސްވެރިޔާ ވަނީ މިނިސްޓާރ ޝިޔާމް އެ ޕޯސްޓްގައި ޓެގް ވެސް ކުރައްވާފައެވެ.

އަދި އޭގެއިތުރުން މިފްކޯ އަށް ފައިދާނުވާކަމަށް ސަރުކާރުން ބުނަމުން ގެންދާތީ މަސްވެރިޔާ ވަނީ މިފްކޯ ފައިދާނުވެ އެ ކުންފުނީގެ ސިޔާސީ މުވައްޒަފުންނަށް މުސާރަ ދެނީ ކިހިނެއްތޯ އަހާފައެވެ.

މަސްވެރިންނަށް ފައިސާ ނުދެވި ލަސްވަނީ އެކަން ކުރުމަށް ނުކުޅަދޭތީކަމަށް ވަންޏާ މަގާމުން އިސްތިއުފާ ދެއްވުމަށް ވެސް އެ މަސްވެރިޔާ ވަނީ ގޮވާލާފައެވެ.

މަސްވެރިން ބާނާ މަހުގެ އުޖޫރަ 24 ގަޑިއިރުގެ ތެރޭގައި ދޭނެ ކަމަށް ވައުދުވެގެން އައި ސަރުކާރުން މަސްވެރިންނަށް ފައިސާ ދިނުމުގައި އަންނަނީ ފަރުވާކުޑަކުރަމުންނެވެ.

އެގޮތުން އެންމެ ފަހުން މަސްވެރިންނަށް ފައިސާ ދީފައިވަނީ އޭޕްރިލް މަހުގެ 22 ވަނަ ދުވަހުއެެވެ. އޭގެ ފަހުން މަހެއް ވެގެންދިޔައިރު މަސްވެރިންނަށް ދޭން ޖެހޭ 62 މިލިއަން ރުފިޔާގެ ބެކްލޮގެއް އެބަހުރިކަމަށް ހުދު މިނިސްޓާރ ޝިޔާމް ވަނީ ދާދި ފަހުން އެ ވުޒާރާއިން ބޭއްވި ނޫސްވެރިންގެ ބައްދަލުވުމުގައި ވިދާޅުވެފައެވެ.

މަސްވެރިންނަށް ފައިސާ ދިނުމުގައި ސަރުކާރުން އިހުމާލުވަމުން އަންނާތީ ގިނަ ބައެއްގެ ފާޑުކިޔުން އަންނަނީ ސަރުކާރަށް އަމާޒުވަމުންނެވެ.