ބޮސްނިއާގެ ގަތުލްއާންމު ބައިނަލްއަޤްވާމީ ގޮތުން ފާހަގަކުރުމަށް ދިވެހިރާއްޖެއިން ވޯޓު ދީފައިނުވާ ސަބަބު ސަރުކާރުގެ ތަރުޖަމާނަށް ސާފުކޮށްނުދެވުނެވެ. އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވެއްގައި ނޫސްވެރިއެއް މި މައްސަލައާއި ގުޅިގެން ކޮށްފައިވާ ސުވާލުގެ ޖަވާބުގައި ހީނާ ވަލީދު ވިދާޅުވީ ބޮސްނިއާގެ ގަތުލްއާންމު ހަރުކަށި އިބާރާތުން ދިވެހި ސަރުކާރު ކުށްވެރިކުރާ ކަމަށެވެ. ކުރިއަށްތަނުގައިވެސް ދިވެހިރާއްޖެއިން މަސައްކަތް ކުރާނީ ބޮސްނިއާގެ މުސްލިމުންގެ ދިފާޢުގައި ކަމަށްވެސް ހީނާ ވިދާޅުވެފައިވެއެވެ.

މި މައްސަލާގައި ރާއްޖެއިން ވޯޓު ނުދިން ސަބަބު ހާމަކުރެވޭނީ އިތުރަށް ބަލާފައި ކަމަށް ބުނެ ހީނާ ވަނީ ވާހަކަ ކުރުކޮށްލާފައެެވެ. ބޮސްނިއާގެ މައްސަލާގައި ހުށަހެޅި ގަރާރު ބަލައިގަތުމަށް ވޯޓު ނެދޭ ހަމައެކަނި މުސްލިމް ގައުމަކީވެސް ދިވެހިރާއްޖެއެވެ.

އިސްލާމީ ރިވެތި ވެރިކަމަކަށް ހުވާ ކޮށްގެން، 100 އިންސައްތަ މުސްލިމް ގައުމަކުން ގަތުލްއާންމާ ދެކޮޅު ހެދުމުގެ ގޮތުން ވޯޓު ނުދިނުމުގެ ސަބަބުން ޑރ މުއިއްޒަށް އާންމުން އަންނަނީ ވަރަށް ބޮޑަށް ފާޑުކިޔަމުންނެވެ. މިގޮތުން ދުނިޔޭގެ އިސްލާމީ ގައުމުތަކުގެ ކުރިމަތީގައި މުއިއްޒު ވަނީ ދިވެހިން ލަދުގަންނުވާލާ އަގު ވައްޓާލައިފައިވާ ކަމަށް ގިނަ ފަރާތްތަކުން ދަނީ ބުނަމުންނެވެ.