ދިވެހިރާއްޖޭގެ ކަނޑުގެ ސަރަހައްދުގައި މަސްވެރިކަން ކުރި އިންޑިއާގެ މަސް ބޯޓަކަށް ކުރި ޖޫރިމަނާ މައާފްކޮށްދިން ސަބަބު ސަރުކާރަށް ބުނެނުދެވުނުކަން ހާމަވެއްޖެއެވެ.

"ހޮލީ ސްޕިރިޓް" ނަމަަކަށް ކިޔާ އިންޑިޔާގެ އެ މަސް ބޯޓު އޮޕަރޭޓު ކުރި އެންތަނީ ޖަޔަބަލަން، މިނިސްޓްރީ އޮފް ފިޝަރީޒް އިން ވަނީ 4.2 މިލިއަން ރުފިޔާއިން ޖޫރިމަނާ ކޮށްފައެވެ.

މަސް ބޯޓުގެ ޖޫރިމަނާ މައާފު ކުރީ ކީއްވެތޯ އެހުމުން ސަރުކާރުގެ އިސް ތަރުޖަމާނު ހީނާ ވަލީދު އެކަމަށް އެއްވެސް ޖަވާބެއް ދެއްވާފައިނުވެއެވެ.

އިންޑިއާގެ މަސް ބޯޓު ކޯސްޓު ގާޑުން އަތުލައިފައިވަނީ މިދިޔަ އަަހަރުގެ އޮކްޓޯބަރު މަހުގެ 22 ވަނަ ދުވަހުއެވެ.

އަދި އެ ބޯޓު 4.2 މިލިއަން ރުފިޔާއިން ޖޫރިމަނާ ކުރީ އޮކްޓޯބަރު 28 ވަނަ ދުވަހުއެވެ.

އެ ބޯޓަށް މައާފުކުރުމަކީ ގާނޫނީ ގޮތުން ރައީސް އޮފީހަށް ލިބިގެންވާ ބާރެއް ނޫން ކަމަށް ގިނަ ފަރާތްތަކުން ބުނި ނަމަވެސް ރައީސް އޮފީހުން ވަނީ އެ ބޯޓަށް މައާފްދީ ފުރުވާލާފައެވެ.

ގިނަ ފަރާތްތަކުން ގަބޫލު ކުރާގޮތުގައި ސަރުކާެރުން އެކަން ކޮށްފައިވަނީ އިންޑިޔާގެ ފިއްތުންތައް ބޮޑުވެގެންނެވެ.