މި އަހަރުގެ މިހާތަނަށް ރާއްޖޭގައި ގެވެށި އަނިޔާގެ 278 މައްސަލަ ރިޕޯޓުކޮށްފައިވާ ކަމަށް އާއިލީ ތަރައްގީއާ ބެހޭ ވުޒާރާގެ ފެލިމީ ޕްރޮޓެކްޝަން އޮތޯރިޓީގެ ސީއީއޯ އައިމިނަތު ޝިރާނީ ނައީމު ވިދާޅުވެއްޖެ އެވެ.

ފާއިތުވެދިޔަ ހަ މަސް ދުވަހު އާއިލީ ތަރައްގީއާ ބެހޭ ވުޒާރާއިން ކޮށްފައިވާ މަސައްކަތާއި ގުޅޭގޮތުން ނޫސްވެރިންގެ ބައްދަލުވުގައި އެ އިދާރާއިން ބުނެފައި ވަނީ ރާއްޖޭގައި މިފަދަ މައްސަލަތައް އިތުރުވަމުން އަންނަ ކަމަށެވެ.

މި މައްސަލަތަކުގެ ތެރޭގައި އަންހެނުން ޝާމިލުވާ 194 މައްސަލަ އާއި ފިރިހެނުންނަށް ގެވެށި އަނިޔާ ލިބިގެން ހުށަހަޅާފައިވާ 84 މައްސަލަ ހިމެނޭކަމަށް އެ އިދާރާއިން ވަނި ހާމަކޮށްފައިއެވެ.

ޒާތީ ގުޅުންތަކުގެ މައްސަލަތަކުގެ ތެރެއިން ދެވޭ އަނިޔާތަކުގެ ތެރޭގައި ނަފްސާނީ އަނިޔާތަކުގެ 162 މައްސަލައެއް އެ އިދާރާއަށް ރިޕޯޓުކޮށްފައިވާ ކަމަށްވެސް މި ބައްދަލުވުމުގައި ވަނީ ބުނެފައިއެވެ.

މިފަދަ މައްސަލަތަކުގެ ތެރޭގައި މައިންބަފައިން ނުވަތަ ބަލަދުވެރިންގެ ފަރާތުން 92 މައްސަލައެއް އަދި ކައިވެނިކޮށްގެން ނުވަތަ އިނދެވަރިކޮށްފައިވާ މައްސަލަތަކުގެ ތެރެއިން 123 މައްސަލަ ހިމެނޭކަމަށްވެސް އެ އިދާރާއިން ވަނީ ހާމަކޮށްފައިއެވެ.

މީގެ އިތުރުންނަފްސާނީ ގޮތުން އަދި އަނގަބަހުން ކުރާ އަނިޔާ އިތުރުވަމުންދާ ކަމަށާއި، މިފަދަ 162 މައްސަލައެއް އެ އިދާރާއަށް ވަނީ ހުށަހެޅިފައިއެވެ.