ރަސްމާލެ ހިއްކުމުގެ ފުރަތަމަ ޕްލޭން ފައިލްވެ، ރައްޔިތުންގެ ޕްރެޝަރ ބޮޑުވުމުން އެއްބަސްވުން އުވާލަން ނިންމައިފިއެވެ.

މި ސަރުކާރުގެ އެންމެ ބިޔަ މަޝްރޫއުގެ ގޮތުގައި މިދިޔަ ޑިސެމްބަރު 18، ގައި ފެށި ރަސްމާލެ ހިއްކުމުގެ ޕްރޮޖެކްޓު ނިންމަން ރައީސް ޑރ. މުހައްމަދު މުއިއްޒު ކަނޑައެޅި ތާރީހަށް އެ މަޝްރޫއު ނުނިންމޭނެ ކަމަށާއި މިއަހަރު ނިމުމުގެ ކުރިން އެތަން ހިއްކުމުގެ މަސައްކަތް ނިންމައިލެވޭން އެހެން ގޮތެއް އޮތްތޯ ބަލަމުންދާ ކަމަށް އިންފްރާސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވިދާޅުވެފައިވެއެވެ.

އޭގެ މާގިނައިރުތަކެއް ނުވަނީސް ބޭއްވި ނޫސްވެރިންގެ ބައްދަލުވުމެއްގައި ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ވަނީ ރަސްމާލެ ހިއްކުމުގެ މަސައްކަތް މަޑުޖެހިފައިވާ ކަމަށް އެއްބަސްވެފައެވެ.

އެ ވާހަކަ ޝާއިއު ކޮށްފައިވާ ހަބަރެއް ހިއްސާކުރައްވާ އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ، އެއްބަސްވުމާ އެއްގޮތަށް ކޮންޓްރެކްޓަރަށް ނުކުރެވުމުން، އިތުރު ފުރުސަތު ނުދޭން ނިންމި މައިގަނޑު ސަބަބަކީ މާލެ ސަރަޙައްދުން ބިންތަކެއް ދިނުމަކާނުލައި ކޮންޓްރެކްޓަރުން މެދުވެރިވެގެން ފައިނޭންސް ހަމަޖައްސައިގެން ޕްރޮޖެކްޓް ކުރިއަށް ގެންދިއުމަށް ސަރުކާރުން ބޭނުންވާތީ ކަމަށެވެ.

މި ސަރުކާރުން ކުރިއަށްގެންދާނެ ކަމަށް އިއުލާންކުރި އެންމެ ބޮޑު އެއް މަޝްރޫއު ކަމަށްވާ ދެކުނު މާލެ އަތޮޅުގައި އޮންނަ ފުށިދިއްގަރު ފަޅު "ރަސްމާލެ" ގޮތުގައި ތަރައްގީކުރުމަށް ކުރިއަށްގެންދާ މަޝްރޫއުގެ ބިން ހިއްކުމަށް ހަވާލުކުރީ ކެޕިޓަލް މެރިން އެންޑް ސިވިލް ކޮންސްޓަރަކްޝަން ކުންފުންޏާއެވެ.

ނަމަވެސް އެ ކުންފުންޏަކީ ކަރުދާސް ކުފުންނެއް ކަމަށް އޭރުވެސް ގިނަ ބަޔަކު ބުނަމުން ގެންދިޔައެވެ. އަދި އެއީ އެ މަސައްކަތުގެ އަމަލީ އެއްވެސް ތަޖުރިބާއެއް ހުރި ކުންފުންޏެއް ނޫން ކަމަށްވެސް ބުނަމުން ދިޔައެވެ.

ސީއެމްސީސީއާއެކު ވެފައިވާ އެއްބަސްވުން އުވާލަން ސަރުކާރުން ނިންމާ އެޗްޑީސީއިން މިހާރު ގެންދަނީ އެކަމުގެ ގާނޫނީ މަރުހަލާތައް ފުރިހަމަ ކުރަމުންނެވެ. ނަމަވެސް މި މަޝްރޫއާއެކު ކުރިއަށް ދާނެ އިތުރު ޕްލޭނެއް އަދި ނެތެވެ.

މަސައްކަތް ފެށި ހަފުތާގައި ސައިޓު ޖޭ އިން ހިއްކި 10 ވަރަކަށް ހެކްޓަރު ފިޔަވާ އިތުރު އެއްވެސް ސަރަހައްދެއް މިއަދާ ހަމައަށް ހިއްކިފައި ނުވާއިރު މީގެ ކުރިން ސަރުކާރުން ތަކުރާރުކޮށް ބުނަމުން ދިޔައީ މަޝްރޫއު މަޑު ނުޖެހޭ ކަމަށެވެ.

މަޝްރޫއުގެ އަމަލީ މަސައްކަތް ފެށި ދުވަހު، މެދުކެނޑުމެއްނެތި އަށް މަސްދުވަހުގެ ތެރޭގައި ބިން ހިއްކުން ނިންމާލާނެ ކަމަށް ރައީސް މުއިއްޒު ވިދާޅުވި ނަމަވެސް، އަންްނަ އޮގަސްޓު މަހުގެ 18 އަށް އެ މުއްދަތު ހަމަވާނެއެވެ.

ޑިސެމްބަރު 18، 2023 ގައި އަމަލީ މަސައްކަތް ފެށި މި މަޝްރޫއަށް ދައުލަތުގެ ބަޖެޓުން އެއްވެސް ފައިސާއެއް ނުދާނެ ކަމަށް ރައީސް ޑރ. މުހައްމަދު މުއިއްޒު އޭރު ވިދާޅުވި އެވެ. ރައީސް އެފަދައިން ވިދާޅުވީ މި އަހަރުގެ ބަޖެޓުގައި މި މަޝްރޫއުގެ ބޭނުމަށް ހިމެނި 400 މިލިއަން ރުފިޔާ މަޖިލީހުން އުނިކުރުމާ ގުޅިގެންނެވެ.

އޭގެ ބަދަލުގައި ރަސްމާލެ މަޝްރޫއުގެ އަގުގެ ގޮތުގައި ނަގުދު ފައިސާ ދިނުމުގެ ބަދަލުގައި، އަގު އަދާކުރަނީ އެ ބިން ހިއްކަން ހަވާލުކޮށްފައިވާ ސްރީ ލަންކާގެ ކެޕިޓަލް މެރިން އެންޑު ކޮންސްޓަރަކްޝަން ކޮމްޕެނީ (ސީއެމްސީސީ) އަށް 70 ހެކްޓަރުގެ ބިން ދޫކޮށްލައިގެންނެވެ. އެއީ ހުޅުމާލެއިން 10 ހެކްޓަރާއި ފުށިދިއްގަރުފަޅުން ހިއްކާ 60 ހެކްޓަރު ބިމެވެ.

މާލޭގެ ދެކުނުގައި އޮންނަ 1280 ހެކްޓަރުގެ ފުށިދިއްގަރު ފަޅުން 1153 ހެކްޓަރުގެ ބިން އަށް މަސްދުވަހުގެ ތެރޭގައި ނިންމުމަށް އަމާޒު ހިފައި މަސައްކަތް ފެށީ މުޅި އެ ފަޅުގެ އެންވަޔަރަމަންޓު އިމެޕެކްޓު އެސެސްމެންޓު (އީއައިއޭ)ވެސް ނުހަދަ އެވެ. އީއައިއޭ ހަދާފައި ވަނީ ހަމައެކަނި 29 ހެކްޓަރުގެ ސައިޓު ޖޭ އަށް އެކަންޏެވެ.