ނިމިދިޔަ މަހުގެ ކަރަންޓު ބިލުގެ އަދަދު އިންތިހާ ބޮޑުވެފައިވުމުން އަލީ ރަމީޒުވެސް ފާޑުކިޔައިފިއެވެ.
އަލީ ރަމީޒު އެކސްގައި ކުރި ޕޯސްޓެއްގައި ބުނެފައިވަނީ މި މަހުގެ ކަރަންޓު ބިލު އިންތިހާއަށް ބޮޑު ކަމަށާ މިވަނީ ކިހިނެއް ކަމެއް ނޭނގޭ ކަމަށެވެ.
އަލީ ރަމީޒުގެ އިތުރުންވެސް ގިނަ އާންމުން ވަނީ މިމަހުގެ ކަރަންޓު ބިލު ބޮޑުވާހަކަ ދައްކާ އެއީ ރައްޔިތުންނަށް ނިިދިޔަ ރޯދަމަހާ ދިމާކޮށް ދިން ޑިސްކައުންޓުގެ ބަދަލު ހޯދަނީ ކަމަށްބުނެފައެވެ.
މީގެ އިތުުރުންވެސް އާންމުންގެ ބައެއް ފަރާތްތަކުން ވަނީ ބޭންޑް އުވާލާ ހަމަހަމަކަމައެކު ކަރަންޓު މީޓަރުގެ ރީޑިން ނެގުމަށް ވެސް ގޮވާލާފައެވެ.
ސްޓެލްކޯއިން މިކަމާ ގުޅިގެން ބުނެފައިވަނީ ކަރަންޓު ބިލުތައް ބޮޑުވެފައިވަނީ ކަރަންޓު ބޭނުންކުރެވޭ މިންވަރު ގޭބިސީތަކުގައި އިތުރުވެފައިވަތީ ކަމަށެވެ.
ނަމަވެސް އާންމުން ހާމަކޮށްފައިވާ ގޮތުގައި ފާއިތުވި މަހުގެ ގިނަ ދުވަސްތަކަކީ ވިއްސާރަ މޫސުމުގެ ދުވަސްވަރެއްކަމުގައިވާއިރު ގިނަ ގޭގޭގައި އޭސީ އާ ފަންކާ ފަދަ އާލާތްތައް ބޭނުންކުރުން މަދުވާނެކަން ޔަގީން ކަމަށެވެ.
