އިޒްރޭލު ޕާސްޕޯޓުގައި ރާއްޖެއަށް ފަތުރުވެރިން އެތެރެ ނުވެވޭނެ ގޮތަށް ގާނޫނު އިސްލާހު ކުރުމައްޓަކައި، ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ރައްޔިތުންގެ މަޖިލީހަށް ހުށަހަޅުއްވައިފި އެވެ.

މީކާއިލް މަޖިލީހަށް ހުށަހެޅުއްވީ ގާނޫނު ނަންބަރު 1/2007 (ދިވެހިރާއްޖޭގެ އިމިގްރޭޝަންގެ ގާނޫނު) ގެ 8 ވަނަ މާއްދާގެ ހ ގެ 7 ވަނަ ނަމްބަރުގެ ފަހަތަށް ނަމްބަރެއް އިތުރު ކުރުމަށެވެ.

އެ އިސްލާހުގައި ބުނެފައި ވަނީ ރާއްޖެ އެތެރެ ނުވެވޭނެ މީހުންގެ ތެރޭގައި އިޒްރޭލު ޕާސްޕޯޓު ގެންގުޅޭ މީހުން ކަމަށެވެ.

އެގޮތުން މި ގާނޫނަށް އަމަލުކުރަން ފަށާނީ ގާނޫނު ތަސްދީގުކޮށް ދިވެހިރާއްޖޭގެ ގެޒެޓުގައި ޝާއިއު ކުރާ ދުވަހުން ފެށިގެން ކަމަށް ވެސް އެ އިސްލާހްގައި ވަނީ ބަޔާންކޮށްފައެެވެ.

އިޒްރޭލުގެ ފަތުރުވެރިން ރާއްޖެ އައުން މަނާކޮށް އިޒްރޭލުގެ އުފެއްދުންތައް ރާއްޖެ ގެނައުން މަނާކުރަން ގޮވާލާ ގަރާރު މަޖިލީހުން ފާސްކުރީ އެޕްރިލް 1 ގައެވެ.

ނަމަވެސް އަދިވެސް ސަރުކާރުން އަންނަނީ ޕާސްޕޯޓް މަނާ ނުކުރާ ސަބަބު ހާމަ ނުކުރަމުންނެވެ.

މިކަމާ ގިނަ ބައެއްްގެ ފާޑުކިޔުން ސަރުކާރަށް ވަނީ އަމާޒުވެފައެވެ.