އެޔެއް މިޔެއް ބަލާލުމެއްނެތި ދިރާސާއެއް ހަދާލުން ވެސް ބުރައަކަށް ވެގެން ފެށި މަޝްރޫއުގެ ވާހަކަ ދައްކާލުން މުހިންމެވެ. ގިނަ ބަޔަކަށް މި ސަރުކާރުން ދެއްކެވި އެންމެ ބޮޑު ހުވަފެނުގެ ވާހަކައެވެ.

އާދެ، ރާއްޖޭގައި ހިންގާ ބިން ހިއްކުމުގެ އެންމެ ބޮޑު މަޝްރޫޢު، އެ މަޝްރޫޢުއަކަށް "ރަސްމާލެ" ގެ ނަމުން ނަން ދެވިފައިވާ މަޝްރޫއު ރަސްމީކޮށް އިފްތިތާހް ކުރީ 18 ޑިސެމްބަރު 2023 ގައެވެ. 1153 ހެކްޓަރުގެ ބިމެއް ހިއްކާ ނިންމާލާނީ 8 މަސް ދުވަސް ތެރޭގައި ކަމަށް އެދުވަހު އެ ރަސްމިއްޔާތުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވިއެވެ.

ރަސްމާލެ ހިއްކުމުގެ މަޝްރޫޢު ހަވާލުކޮށްފައިވަނީ ސްރީލަންކާގެ "ކަރުދާސް" ކުންފުންޏެއްކަމަށްވާ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާއެވެ. 400 މިލިއަން ރުފިޔާގެ މި ޕްރޮޖެކްޓް ފެށީވެސް ދައުލަތުގެ ބަޖެޓުގައި ނުޖަހާކަން ހުރިހާ ފަރާތްތަކަށް ވެސް އެނގޭނެއެވެ. މަޖިލީހުން ބަޖެޓް އުނިކުރުމުންވެސް ތަނެއް ހިރުވާލިހެންވެސް ހީނުވެއެވެ. މަޝްރޫއުއާ ވެގެން ސަރުކާރުން އުޅުނެވެ. ދައުލަތުގެ ބަޖެޓުން ނޫނަސް 8 މަސް ދުވަސް ތެރޭގައި ބިން ހިއްކާނެ ކަމަށް ބުނުމުން ދޭހަވީ ބަޖެޓެއް އެކަމަށް ހަމަޖެހިފައި އޮތްކަމެވެ. އެހެންކަމުން ބަޖެޓަކާ ގުޅުމެއް ނެތެވެ.

ރަސްމާލޭގެ ދެތިން ހެކްޓަރު ހިއްކުމުން، ސަރުކާރުގެ ސިޔާސީ މަގާމްތަކުގައި ތިއްބަވާ ފަރާތްތަކަށް ހީވީ އީދެއް އައިހެންނެވެ. އެ ސަރަހައްދައް ގޮސް، ފޮޓޯ އަދި ވީޑިޔޯ ނަގާ ސޯޝަލް މީޑިޔާގައި އަޕްލޯޑް ކުރަމުން ގެންދެވި އިރު ހީވީ ހަގީގަތުގައިވެސް "ރަސްމާލެ" ހިއްކާ އެތަނުގައި މީހުން ދިރިއުޅެންވެސް ފެށިހެންނެވެ. ސަރުކާރު ޕްރޮމޯޓް ކުރަންވެއްޖާ ނިކަން ފޯރިހުރެއެވެ. އެތަނަށް ގޮސް ވްލޮގް ހަދައިގެން އުޅުއްވި ދެތިން ނައިބު ވަޒީރުންގެ ހާލަތު ހުންނެވީ ކިހިނެއްބާއެވެ.

އެހެންއުޅެނިކޮށް ދެން އިވުނީ އާދަޔާ ޚިލާފް ވާހަކައެކެވެ. އެގޮތުން ރަސްމާލެ ހިއްކުމުގައި ކޮރަޕްޝަން ހިމެނޭކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އިން މައްސަލައެއް ބަލަންފެށި ވާހަކައެވެ. ދެން އަނެއް ވާހަކައަށް ބަލާލާއިރު ށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ދައްކަވާ ވާހަކައަކާއި ރައީސް މުއިއްޒު ދައްކަވާ ވާހަކައަކާ ދިމައެއް ނުވެއެވެ. އެކުގައި ހޯމްވޯކް ނުހަދާ މީޑިޔާގެ ކުރިމައްޗައް ނިކުމެވުނީމާ ދެ ބޭފުޅުންނަށް ވިދާޅުވެވުނީ ދެއެއްޗެކެވެ.

މެއި މަހުގެ 30 ވަނަ ދުވަހު އިންފްރާސްޓްރަކްޗާރ މިނިސްޓްރީން ކުރިޔަށް ގެންދިޔަ ނޫސްވެރިންގެ ބައްދަލުވުމުގައި މިނިސްޓާރ މުއްތަލިބު ވަނީ ރަސްމާލެ 8 މަސްދުވަސް ތެރޭގައި ހިއްކާ ނުނިންމޭނެކަމަށް ވިދާޅުވެފައެވެ. އަނހަ މިޖެހުނީ ކޮންތާކުހެއްޔެވެ. ކުރިން ބުނި އެތި އެވީ ކެންސަލެވެ.

އެކިފަހަރު ސަރުކާރުން ދައްކަނީ އެކި ވާހަކައެވެ. އެއްފަހަރު ބުނީ ތިމާވެއްޓަށް ގެއްލުން ލިބޭތީ މަޑުޖައްސާލި ވާހަކައެވެ. އަނެއްފަހަރު މިބުނަނީ އެ ޕްރޮޖެކްޓް ހަވާލުކޮށްފައިވާ ކުންފުންޏަށް 70 ހެކްޓަރުގެ ބިން ދޭން ޖެހޭތީ އެ ނޫންގޮތެއް ހޯދަނީކަމަށެވެ. އޭރު 70 ހެކްޓަރު ދޭން ވެސް ތިބީ ތައްޔާރަށް، މީހުން ބިން ވިއްކަނީ އޭ ކިޔަންފެށީމާ ދެން އަނެއްކާވެސް ކުރިން ބުނި އެތި ކެންސަލްކޮށްފިއެވެ. އަޖައިބެއް ނޫންހެއްޔެވެ. މި މީހުންނަށް ހީވަނީ ކުޅޭކުޅޭ ކަންކަން ހެންނެވެ. އެންމެ ފަހުން މިއޮތީ އަތައް ގޮވާފައެވެ.

ރައީސް އަބްދުﷲ ޔާމީން އަބްދުލްގައްޔޫމް "ރަސްމާލެ" ސިފަކުރެއްވީ ހަމަ އެންމެ ރަނގަޅަށެވެ. މިސަރުކާރުން ހިންގާ އެންމެ ބޮޑު މަޝްރޫޢުކަމަށް ވާ ރަސްމާލެ މަޝްރޫޢުން ހަމައެކަނި ކަރުދާހުގައި އޮތް ކުންފުންޏަކަށް ހުޅުމާލެއިން ބޮޑު ބިމެއް ވިއްކާލުމަކީ މަރިޔަނބާއި ކަތިވަޅި އާއި ކޮށި ދަނޑު ގެއްލިގެންދާ ކަމެކެވެ. މިއަދު ސަރުކާރަށް ވެސް އެކަން މިއޮތީ ގަބޫލުކުރެވިފައެވެ. ވަގުތު ފާއިތުނުވަނީހެން ވިސްނުން ކަމީ ނަސީބެވެ.

މުސްކުޅިން ބުނެ އުޅޭތީ އަޑުއިވެއެވެ. އެކަކުންޏެއްގެ ހަރުކޮންނާނީ އެކަކުންޏެއްގެ ވަރުންނެވެ. ރަސްމާލެ މަޝްރޫއު މިވީ ބިލާހަކަށެވެ.