ރާއްޖޭގެ ކުރީގެ ތައުލީމީ މަންހަޖު ކަމުނުގޮސްގެން އައު މަންހަޖެއް ތައާރަފުކޮށް ކިޔަވާން ދޭން ފެށިތާ ގާތްގަނޑަކަށް 8 އަހަރު ވެފައިވާއިރު އަދިވެސް އެބުނާފަދަ ގާބިލް ދަރިންތަކެއް އުފެދިގެން އަންނަ ތަނެއް ނުފެނެއެވެ.

އައު މަންހަޖުގެ ހުރި މޮޅުކަން މިނިސްޓްރީ އޮފް އެޑިޔުކޭޝަނުން ހާމަ ކުރިއެއް ކަމަކު ގިނަ ސްކޫލްތަކުގެ ގިނަ ޓީޗަރުންނާ ޕްރިންސިޕަލުން އެކަން ގަބޫލެއް ނުކުރެއެވެ. ބައެއް ޓީޗަރުންނާ ޕްރިންސިޕަލުން ބުނަމުންދަނީ އައު މަންހަޖުގެ ސަބަބުން ބެލެނިވެރިންނާ ދަރިވަރުން ފަރުވާ ކުޑަވެފައިވާ ކަމަށެވެ.

މަންހަޖު ތަންފީޒު ކުރަން ތިބި ފަރާތްތަކުން ތަފާތު ބަހަނާތައް ދައްކަމުން ދާއިރު މިނިސްޓްރީ އޮފް އެޑިޔުކޭޝަން ހަމަޖެހިލައިގެން ސިޔާސީ ޕާޓީތަކުގެ ކެމްޕެއިންތަކުގައި ބައިވެރިވެ ތައުލީމީ ދާއިރާގެ ކަންކަން ހަނދާން ނައްތާލުމުގެ ނަތީޖާއަކަށް ވެގެން ދިޔައީ ސްކޫލްތަކުގެ ހިންގުން ބޮއްސުންލައިގެން ގޮސް އެތަންތަނުގެ މުވައްޒަފުންވެސް  ވާދަވެރި ސިޔާސީ ހަރަކާތްތަކުގައި ބައިވެރިވެ އެބޭފުޅުންގެ ޒިންމާ ހަނދާން ނައްތާލާ ކެމްޕެއިން މެނޭޖަރުންގެ ގޮތުގައި ހަރަކާތްތެރިވާން ފެށުމެވެ.

ދެކުނުގެ ސްކޫލެއްގެ ބެލެނިވެރިޔަކު މައުލޫމާތު ދެމުން ބުނީ ނިމިދިޔަ މަޖްލިސް އިންތިޚާބުގައިސް އެސްކޫލްގެ ބައެއް ޓީޗަރުން ކެމްޕެއިން މެނޭޖަރުންގެ ގޮތުގައި މަސައްކަތް ކޮށްފައިވާ ކަމަށެވެ. އަދި އެބޭފުޅުންގެ ރަސްމީ ގަޑީގައި ޑޯ ޓު ޑޯ ގައި ބައިވެރި ސެޝަން ފެށޭގަޑިއަށް ކުލާހަށް ވެސް ނުދެވޭ ކަމަށެވެ. މިކަންތައް މި ބޭފުޅުން ކުރަނީ މިބޭފުޅުންނާ ސިޔާސީ ފިކުރު އެއްގޮތް ލީޑިންގ ޓީޗަރުންނާ ގުޅިގެން ކަމަށެވެ.

މިދެންނެވި ސްކޫލްގެ ޕްރިންސިޕަލް ރަށުގައި ނެތި އެތައް މަސްތަކެއް ވެފައިވުމުން އެސްކޫލް ވަނީ ބޮއްސުން ލައިގެން ގޮސްފައި ކަމަށެވެ. މިނިސްޓްރީ އޮފް އެޑިޔުކޭޝަނަށް އެކަން އެނގޭއިރުވެސް އެސްކޫލަށް ޕްރިންސިޕަލެއް ނުފޮނުވައި މިހާރު އެގޮތުގައި 7 މަސް ދުވަސް ވެފައިވާ ކަމަށެވެ.

އޭގެ އިތުރުން މިދެންނެވި ސްކޫލްގައި ތައުލީމީ މަންހަޖާ ރައްޓެހި ލީޑިންގ ޓީޗަރުން މަދު ވުމުގެ ސަބަބުން ކިޔަވާ ދިނުން އިންތިހާއަށް ދަށް ވެފައިވާ ކަމަށެވެ. ވާހަކަ ދެއްކި ބެލެނިވެރިޔާ ބުނެފައިވަނީ އިގިރޭސި މީޑިއަމަށް ކިޔަވާދޭ މިދެންނެވި ސްކޫލްގެ ބައެއް ލީޑިންގ ޓީޗަރުންނަކީ އިގިރޭސި ނުވެސް ދަންނަ ލީޑިންގ ޓީޗަރުން ކަމަށެވެ. އެ ބެލެނިވެރިޔާ އިތުރަށް ބުނީ އެސްކޫލްގެ ޕްރިންސިޕަލް،ފެންވަރު ދަށް ލީޑިންގ ޓީޗަރުން ހޮވަނީ ސިޔާސީ ގޮތުން އެޑިޔުކޭޝަނާ ގުޅިގެން ކަމަށެވެ.

އަދި އެސްކޫލާ ދޭތެރޭ މިނިސްޓްރީ ވަނީ އިހްމާލު ވެފައިކަމަށެވެ. އެއީ އެކިފަހަރުމަތިން ބެލެނިވެރިން މިނިސްޓްރީއަށް އަންގާ އެއްވެސް ފިޔަވަޅެއް އަޅާފައި ނުވުމުންނެވެ. އަދިވެސް ބެލެނިވެރިޔާ ބުނެފައިވަނީ އެސްކޫލްގެ ޕްރިންސިޕަލް ވަނީ އެޑިޔުކޭޝަންގެ ބައެއް ބޭފުޅުންގެ ހިމާޔަތް ހޯއްދަވާފައި ކަމަށެވެ.

އެހެންނަމަވެސް މިގޮތަށް މިކަންތައް ވަމުން ދާނަމަ ބެލެނިވެރިން މަޑުން ނުތިބޭނެ ކަމަށްވެސް އެ ބެލެނެވެރިޔާ ވަނީ ބުނެފައެވެ.