ފަލަސްތީނުގެ ރަފާޙް އަށް އިޒްރޭލުން ދެމުންދާ ހަމަލާތަކާއި ގުޅިގެން "ރަފާޙް އަނދަނީ" ގެ ނަމުގައި ބޮޑު އެއްވުމެއް މާލޭގައި ކުރިއަށް ގެންގޮސްފިއެވެ.

އިސްރާ އެސޯސިއޭޝަން އިން އިސްވެ ކުރިއަށް ގެންގޮސްފައިވާ މި އެއްވުން ބާއްވާފައިވަނީ މާލޭގެ އާޓިފިޝިއަލް ބީޗްގެ ސަރަހައްދުގައެވެ.

މި އެއްވުމުގައި ކުރީގެ ނައިބު ރައީސް ފައިސަލް ނަސީމް އާއި އަދި ކުރީގެ ހޯމް މިނިސްޓަރު އުމަރު ނަޞީރުވެސް ބައިވެރިވެފައިވާކަން ފާހަގަކުރެވިފައިވެއެވެ. އަދި އެހެން ޖަމިއްޔާތުކުންވެސް މި އެއްވުމުގައި ބައިވެރިވެ ހަރަކާތްތެރިވެފައިވެއެވެ.

މީގެ އިތުރުން. މިދިޔަ ހަފްތާ ތެރޭގައި ރާއްޖެ ގެނައި އިސްލާމިކް ޔުނިވާސިޓީގެ ލެކްޗަރާ ޑރ ހަސަން އަލް ކުރުދީގެ އާއިލާއިންވެސް ވަނީ މި އެއްވުމުގައި ބައިވެރިވެފައެވެ. މިސްރު ސަރުކާރު މެދުވެރިކޮށް މި އާއިލާ ރާއްޖެ ގެނެސްފައިވާއިރު، މި ފަރާތްތަކުން ގެނައުމަށް އިސް ރޯލެއް އަދާކޮށްފައިވަނީ އިންޓަނޭޝަނަލް އެއިޑް ކެމްޕެއިންގ ޖަމިއްޔާ އިންނެވެ.

އިސްރާ އެސޯސިއޭޝަން އަދި އައި.އޭ.ސީ ގުޅިގެން އިޒްރޭލަށް ދެކޮޅަށް ބޮޑު ގައުމީ ކެމްޕޭނެއް މީގެ ކުރިންވެސް ވަނީ ބާއްވާފައެވެ.

ރަފާހް އަށް ދެމުންދާ ހަމަލާތައް ވަރުގަދަވެ، ކުޑަކުދިން ހިމެނޭ ގިނަ ބަޔަކު ދަނީ ކޮންމެ ދުވަހަކު ޝަހީދުވަމުންނެވެ. އާންމުންގެ މި އެއްވުންތަކުގައި އިޒްރޭލުގެ ޕާސްޕޯޓް އަދި އިޒްރޭލުގެ ވިޔަފާރިތައް ބަންދުކުރުމަށް ގޮވާލާ ގޮވާލުންތަކަށް ސަރުކާރުން އެއްވެސް ފިޔަވަޅެއް އަޅާފައިނުވާތީ ގިނަ ބަޔަކު އަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.