ރައީސް، ރައީސް އަބްދުﷲ ޔާމީންގެ ގެކޮޅުގައި ނަގާފައި ހުރި އިންޑިއާ އައުޓު ބެނަރ ފުލުހުން މެދުވެރިކޮށް ނެގުމުންނާ އަދި އިންޑިއާ އައުޓު ގޮވުން ހުއްޓުވަން ނެރުނު ގަރާރާ ގުޅިގެން ބަންޑަރަ ނައިބާ ދެކޮޅަށް އެމަނިކުފާނު ސިވިލް ކޯޓަށް ހުށަހެޅި މައްސަލައިގެ އަޑު އެހުންތައް ނިންމާލައިފިއެވެ.

ރައީސް ޔާމީންގެ ފަރާތްޕުޅުން ސިވިލް ކޯޓަށް ހުށަހެޅީ، އަސާސީ ހައްގެއް ނުވަތަ މިނިވަންކަމެއް ހިފެހެއްޓުމުގެ ދައުވާއާ އެކު ހުށަހެޅި މައްސަލައެކެވެ.

2022 ވަނަ އަހަރު އެމަނިކުފާނުގެ ފަރާތްޕުޅުން ހުށަހެޅި މައްސަލައިގެ އެންމެ ފަހުގެ އަޑުއެހުން އޮތީ އާދިއްތަ ދުވަހުގެ ހެނދުނު11 ޖެހިއިރުއެވެ. މި މައްސަލައިގައި އާދިއްތަ ދުވަހު އޮތީ ދެ ފަރާތުންވެސް ޚުލާސާކޮށް ދައްކަން ހުރި ވާހަކަ ދެއްކުމެވެ. އެ ފުރުސަތު ދިނުމަށް ފަހު ސިވިލް ކޯޓުން މިއަދު ވަނީ މައްސަލައިގެ އަޑު އެހުންތައް ނިންމާލާފައެވެ. އެހެންކަމުން އިތުރު ކަމެއް ސާފުކުރަން ނެތްނަމަ ދެން އޮންނާނީ ހުކުމް ކުރުމުގެ މަޖިލީހެވެ.

އެ މައްސަލާގައި ރައީސް ޔާމީނުގެ ފަރާތްޕުޅުން އެދިވަޑައިގެންފައިވަނީ އެ ގަރާރަކީ ޣައިރު ގާނޫނީ ގަރާރެއްކަމަށް ނިންމައި، އެ ގަރާރު ބާތިލުކުރުމަށެވެ.

މި މައްސަލައިގައި ދައުލަތުން މީގެ ކުރިން ބުނަމުން އައީ އިންޑިއާ އައުޓު ގޮވުން މަނާކުރީ ގަރާރަކުން ކަމަށް ވީ ނަމަވެސް މިއަދުގެ މަޖިލީހުގެ ދައުލަތުން ބުނެފައިވަނީ އެކަން ކޮށްފައިވަނީ ރައީސުލްޖުމްހޫރިއްޔާގެ ސިޓީފުޅަކުން ކަމަށެވެ. އެހެންކަމުން މިހާރު ވަނީ އިންޑިއާ އައުޓޫ ގޮވުން މަނާ ކުރީ ގަރާރަކުން ތޯ ނުވަތަ ސިޓީއަކުންތޯ ކަށަވަރުކުރަން ޖެހިފައެވެ.

އިންޑިއާ އައުޓު ގޮވުމަކީ މަނާ ކަމެއްކަމަށް ކަނޑައަޅަ އޭރުގެ ރައީސް، އިބްރާހިމު މުހައްމަދު ސޯލިހު ގަރާރެއް ފާސްކޮށް ތަސްދީގުކުރުމުން ރައީސް ޔާމީން އެމަނިކުފާނުގެ ގެކޮޅުގައި ނަގާފައި ހުރި އިންޑިއާ އައުޓު ބެނަރ އަކީ ޣައިރު ގާނީނީ އަމަލެއްކަމަށް ބުނެ ސިވިލް ކޯޓުގެ އަމުރަކާ އެކު ފުލުހުން ވަނީ އެ ގެއަށް ވަދެ އެ ބެނާރ ފުލުހުންގެ ބެލުމުގެ ދަށަށް ގެންގޮސްފައެވެ.

ނަމަވެސް ސިވިލް ކޯޓުގެ އަމުރު އޮތީ ގޯސްކޮށް ކަމަށް ނިންމާ ރައީސް ޔާމީންގެ ފަރާތްޕުޅުން ހައިކޯޓަށް މައްސަލައެއް ހުށަހެޅުއްވުމުން ހައިކޯޓުން ނިންމާފައިވަނީ ރައީސް ޔާމީންގެ ގެކޮޅުގައި ދެމި ބެނާ ނެގުމަށް ކްރިމިނަލް ކޯޓުން އަމުރު ނެރުނީ ގާނޫނާ ހިލާފަށް، ކޯޓުން އެފަދަ އަމުރެއް ނެރެދިނުމުގައި ބަލަން ޖެހޭ ކަންކަމަށް ނުބަލާކަމަށެވެ.

އެގޮތުން އަމުރު ދިނުމަށް ފަނޑިޔާރު ނިންމެވި ނިންމުމަށް ވާސިލްވި ގާނޫނީ ސަބަބެއް ބަޔާންކޮށްފައި ނެތްކަމަށާއި، ހަމައެކަނި ފަނޑިޔާރު ގަބޫލު ކުރާ ގޮތް ކޯޓު އަމުރުގައި ލިޔެގެން ނުފެދޭނެކަމަށް ހުކުމްގައިވެއެވެ. އަދި އަމުރު ނެރުނު ސަބަބު ސާފުކޮށްދީފައިނުވާނަމަ އެ ޝަރީއަތަކީ ސައްހަ ޝަރީއަތެއް ވެސް ނޫންކަމަށް ހައިކޯޓުގެ އަމުރުގައިވެއެވެ.

އިންޑިއާ އައުޓު ގަރާރަކީ ގާނޫނީ ޚިޔާލުފާޅުކުރުމުގެ މިނިވަންކަމަށް ހުރަސް އަޅަން ފާސްކޮށްފައި އޮތް ގާނޫނެއް ކަމަށް އޭރު ޕީޕީއެމް ޕިއެންސީގައި ތިއްބެވި ހުރިހާ ލީޑަރުން އިއްތިފާގުވީއިރު މިއަދު އެ ބޭފުޅުންގެ ވެރިކަމެއްގައި އަދިވެސް އެ ގަރާރު ބާތިލުނުކުރާކަން ފާހަގަކޮށްލެވެއެވެ. ނަމަވެސް އެ ގަރާރު ބާތިލްކުރާނެ ކަމުގެ ރިޔާސީ އިންތިޚާބު ތެރޭގައި އަދުގެ ރައީސުލްޖުމްހޫރިއްޔާ ވައުދުވެވަޑަިއގެންފައިވެއެވެ.

ސަރުކާރު ބަދަލުވުމަށްފަހު އެ ގަރާރު ބާތިލުނުކުރާތީ ރައީސް ޔާމީންވަނީ ކަންބޮޑުވުން ފާޅުކުރައްވާފައެވެ. އެމަނިކުފާނު ވިދާޅުވާ ގޮތުގައި އިންޑިއާ އައުޓް ހަރަކާތް ހިންގެވުމަށް މިހާރުވެސް އޮތް ހުރަހަކީ އެ ގަރާރެވެ. އެހެންކަމުން އެ ގަރާރު ބާތިލުކުރަން ސަރުކާރުން ފަސްޖެހޭކަމަށް އެމަނިކުފާނު ތުހުމަތުކުރައްވައެވެ.