އިންޑިއާ އައުޓު ގޮވުން ގާނޫނީ ކުށަކަށް ހަދާ، ދިވެހިންގެ ޚިޔާލު ފާޅުކުރުމުގެ މިނވަންކަމަށް ނިމިދިޔަ ސަރުކާރުން އަރައިގެންފައިވުމަކީ އަދުގެ ވެރިންނަށްވެސް ޖާއިޒު ކަމަކަށް ވެއްޖެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ރައީސް އަބްދުﷲ ޔާމީންގެ ގެކޮޅުގައި ނަގާފައި ހުރި އިންޑިއާ އައުޓު ބެނަރ ފުލުހުން ޣައިރު ގާނޫނީ އަމުރަކާ އެކު ވަދެ ގެންދިއުމުން އެމައްސަލައިގައި އެމަނިކުފާނުގެ ފަރާތްޕުޅުން ދައުލަތާ ދެކޮޅަށް ހުށަހެޅުއްވި މައްސަލަައިގެ އަޑުއެހުންތައް ނިންމާލާފައިވާ އިރު އެކަމުގެ މައުލޫމާތު ތޭރަ އޮންލައިންއާ ހިއްސާ ކުރައްވަމުން ޑރ. ޖަމީލު ވިދާޅުވީ، އިންޑިއާ އައުޓު ގަރާރަކީ މީގެ ކުރިން ޣައިރު ގާނޫނީ ގަރާރަކަށްވެ އެ ވާހަކަ އެންމެ ހަރު އަޑުން ދެއްކެވި ބޭފުޅުން ވެރިކަމުގައި ތިއްބަވައިގެން އެކަން ދިފާއުކުރައްވަމުން ގެންދަވާ މަންޒަރު ފެންނަމުން ދާ ކަމަށެވެ.

އެގޮތުން އެމަނިކުފާނު ވިދާޅުވީ އެކަން ދިފާއު ކުރައްވާ ކަމަށް ވިދާޅުވަނީ، ވެރިކަމަށް އައިސް ވެސް އެ ގަރާރު ހަތް މަސްވެގެން ދާއިރުވެސް ބާތިލުކޮށްލަން ސަރުކާރަށް ނުކެރުމުން ކަމަށެވެ.

އޭގެން ހާމަވަނީ އިބްރާހިމު މުހައްމަދު މުހައްމަދު ސޯލިހު ކުރީ ޣައިރު ގާނޫނީ އަމަލެއް ކަމަށް ބުނި ބުނުން އެއީ ހަމަ ރަގަޅު އެއްޗެއްކަމަށް މިއަދުގެ ވެރިން ގަބޫލުކޮށް ދިފާއުކުރަމުން ގެންދާ ކަމަށެވެ.

ޑރ. ޖަމީލު މިފަދައިން ވިދާޅުވެފައިވާއިރު، އިންޑިއާއާއިމެދު ނަފްރަތު އުފެއްދުމަށް ހިންގާ ކަމަށް ބުނާ “އިންޑިއާ އައުޓް” ކެމްޕެއިންއަކީ ގައުމީ ސަލާމަތައް ނުރައްކާވާ ކަމެއްކަމަށް ގައުމީ ސަލާމަތާ ބެހޭ މަޖިލީހުން ކަނޑައެޅުމާއިއެކު ރައީސް އިބްރާހިމު މުހައްމަދު ސޯލިހު އޭރު ވަނީ އެ ހަރަކާތް ހުއްޓުވަން އަންގާ ގަރާރެއް ނެރުއްވާފައެވެ.

ގަރާރުގައި ބުނެފައިވަނީ، އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރާވައިގެން ހިންގާ ކެމްޕޭންތަކަކީ، ގައުމީ ސަލާމަތާ ގުޅުން ހުރި އަދި ނުރައްކާ އޮތް ކަމެއް ކަމަށެވެ.

އަދި ވަކިވަކި ގައުމުތަކާ ދެކޮޅަށް ނަފްރަތު އުފެއްދުމަށް ހިންގޭ މިފަދަ ހަރަކާތްތަކަކީ ގާނޫނު ތަންފީޒު ކުރާ އިދާރާތަކުން ހުއްޓުވަން ޖެހޭނެ ހަރަކާތެއް ކަމުގައި ކަނޑައެޅުމަށް ގައުމީ ސަލާމަތާ ބެހޭ މަޖިލީހުން ނިންމާފައިވާ ހިނދު، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީން ރައީސުލްޖުމްހޫރިއްޔާ އަށް މަތިކޮށްފައިވާ ބާރުތަކާއި މަސްއޫލިއްޔަތުތަކުގެ ދަށުން، އެފަދަ ހަރަކާތްތައް ހުއްޓުވުމަށް ކަނޑައަޅައި، އެކަން އެގޮތުގެ މަތިން ތަންފީޒު ކުރުމަށް ދައުލަތުގެ ކަމާބެހޭ އެންމެހައި އިދާރާތަކަށް އަންގައި، ގަރާރު އެކަށައެެޅީ ކަމަށް އެ ގަރާރުގައި ވެއެވެ.

މީގެ އިތުރުން އިންޑިއާ އައުޓް ހަރަކާތަކީ ގައުމީ ސަލާމަތައް ނުރައްކާވާ ހިސާބަށް ގޮސްފައިވާ ކަމެއްކަން ސާފުކޮށް އެނގެން އޮތް ކަމަށް ބުނެ އެ ހަރަކާތުގެ ސަބަބުން ރާއްޖޭގެ އެކި ކަންކޮޅުތަކުގައި އޮތް ސުލުހަ މަސަލަސްކަން ނަގައިލައި، ސަރަޙައްދީ ސަލާމަތާއި ރައްކަތެރިކަން ގެއްލުވައިލައި، ރާއްޖޭގެ އިޤްތިޞާދީ
ރައްކައުތެރިކަމާއި އިޖުތިމާޢީ ނިޒާމުތަކަށް ބޮޑު ބުރައެއް އުފުލަންޖެހޭނެ ކަމެއް ކަމުގައި
ގަބޫލުކުރެވޭ ކަމަށް ގަރާރުގައިވެއެވެ. އަދި ހާއްސަކޮށް ބައިނަލްއަޤްވާމީ މައިދާނުގައި އެކަހެރިވެދާނެކަމުގެ ބިރުވެރިކަންވެސް އެގަރާރުގައި ވަނީ ފާހަގަކޮށްފައެވެ.