ސަރުކާރު ހިއްސާވާ ގިނަ ކުންފުނިތައް ހިންގަނީ ހާމަކަން ކުޑަ ގޮތަކަށް ކަމަށް ޓްރާންސްޕޭރެންސީ މޯލްޑިވްސްގެ ތަފާސްހިސާބުތަކުން ދައްކައިފިއެވެ.

ކޯޕަރޭޓް ގަވަނަންސް ޓްރާންސްޕޭރެންސީ އިންޑެކްސް 2023 (ސީޖީޓީއައި 2023)ގެ ރިޕޯޓު ވަނީ އާންމުކޮށްފައެވެ.

އެ ރިޕޯޓްގައި ޓްރާންސްޕޭރެންސީން ވަނީ ސަރުކާރު ހިއްސާވާ ކުންފުނިތަކާއި އަމިއްލަ ބައެއް ކުންފުނިތަކުން ވެސް މައުލޫމާތު ހާމަކުރާ މިންވަރު ބެލުމަށް އެސެސްމަންޓެއް ހަދާފައެވެ.

އެގޮތުން ޓްރާންސްޕޭރެންސީގެ ސީޖީޓީއައި ރިޕޯޓު އެކުލަވާލާފައި ވަނީ ފިނޭންސް މިނިސްޓްރީގެ ދަށުން މިދިޔަ އަހަރަށް ލިސްޓުކޮށްފައިވާ 32 އެސްއޯއީ ކުންފުނިތައް އެސެސް ކުރުމަށް ކުރި މަސައްކަތުގެ މައްޗަށެވެ.

މި އެސެސްމަންޓް ކުރިޔަށް ގެންގޮސްފައިވަނީ މިދިޔަ އަހަރުގެ އޮގަސްޓު 14 އިން ސެޕްޓެމްބަރު 3 ނިޔަލަށެވެ.

މިދިޔަ އަހަރުގެ ސީޖީޓީއައި އިން ދައްކާ ގޮތުގައި 32 އެސްއޯއީގެ ތެރެއިން 20 އެސްއޯއީއަށް ވުރެ ގިނަ އެސްއޯއީއަށް ވަނީ 40 އިންސައްތައަށް ވުރެ ދަށުން މާކްސް ލިބިފައެވެ.

އަދި އެއްވެސް އެސްއޯއީއަކަށް 80 އިންސައްތައަށް ވުރެ މަތިން މާކްސް ލިބިފައެއް ނުވާކަން ފާހަގަކޮށްލެވެއެވެ.

އަދި 6 އެސްއޯއީ ރަނގަޅު ކަމަށް ރޭޓް ކޮށްފައިވާއިރު 5 އެސްއޯއީ އަކީ އިމްޕްރޫވަބަލް ކަމަށް ރޭޓްކޮށްފައިވާ އެސްއޯއީތަކެވެ.

ޓްރާންސްޕޭރެންސީން ވަނީ މި ރިޕޯޓްގައި އިވެލުއޭޓްކޮށްފައިވާ ގިނަ އެސްއޯއީތަކުގައި ދެފުއް ފެންނަ ނިޒާމުގެ ފެންވަރަކީ އެކަށީގެންވާ މިންވަރެއް ނޫން ކަމަށް ފާހަގަކޮށްފައެވެ.

އެއީ ބައިނަލްއަގްވާމީ ބެސްޓް ޕްރެކްޓިސްތަކަށް ފެތޭ މިންވަރެއް ނޫން ކަމަށް ޓްރާންސްޕޭރެންސީން ވަނީ ފާހަގަކޮށްފައެވެ.