ތިލަމާލެ ބުރިޖުގެ މަސައްކަތްތައް ކުރުމަށް އެފްކޮންސް ކުންފުނިން ބޭނުން ކުރަމުންދިޔަ ޕްލެޓްފޯމެއް ބޮޑު ކަޅިއާ ހަމައަށް އޮޔާ ގެންގޮސްފި އެވެ.
އެ ޕްލެޓްފޯމު އޮޔާ ގެންގޮސްފައި ވަނީ އޭތި އޮތް ތަނުން ނަގައިގެން އެހެން ތަނަކަށް ބަދަލު ކުރަން އުޅުމުގެ ތެރޭގައި މީގެ ހަތަރު ވަރަކަށް ދުވަސް ކުރިން ކަމަށް މައުލޫމާތު ލިބިފައިވެއެވެ.
އެ ޕްލެޓް ފޯމު މިހާރު އޮތް ތަނުން ވީހައިވެސް އަވަހަކަށް ނެގުމަށް އެންވަރަމަންޓް ޕްރޮޓެކްޝަން އޭޖެންސީ (އީޕީއޭ) އިން އިންފްރާސްޓްރަކްޗާ މިނިސްޓަރީއަށް އަންގައިފައި ވާނެ ކަމަށް އެ އޭޖެންސީން މައުލުމާތު ހާމަކޮށްފައިވާއިރު، އެކަމާ ގުޅޭގޮތުން އިންފްރާސްޓްރަކްޗާ މިނިސްޓަރީއިން ހާމަކޮށްފައިވަނީ އެފަދަ މައުލޫމާތެއް އަދި ލިބިފައި ނުވާ ކަމަށާއި "ޗެކް" ކޮށްލުމަށްފަހު މައުލޫމާތު ދޭނެ" ކަމަށެވެ.
ތިލަމާލެ ބުރިޖު އެޅުމަށް ބޭނުން ކުރި ޕްލެޓްފޯމެއް މީގެ ކުރިން ވެސް ވަނީ އޮޔާ ގޮސް ވިލިމާލެ ފަރަށް އަރައިފަ އެވެ. އޯގަސްޓު 16، 2022 ގައި ހިނގި އެ ހާދިސާއާ ގުޅިގެން އެފްކޮންސް އެފަހަރު 69.4 މިލިއަން ދިވެހި ރުފިޔާއިން ޖޫރިމަނާ ކުރި އެވެ. ނަމަވެސް އެ ފައިސާ މިއަދާ ހަމައަށް ވެސް އެ ކުންފުނިން ދައްކައިފައި ނުވާއިރު މި ހާދިސާ އާއި ގުޅިގެން ލިބިފައިވާ ގެއްލުމުގެ މައުލޫމާތެއް އަދި މީޑިޔާ ތަކާއި ހިއްސާކޮށްފައިނުވެއެވެ.
