އެންވަޔަރަމެންޓަލް ރެގިއުލޭޓަރީ އޮތޯރިޓީ (އީއާރުއޭ) ގެ ޒިންމާދާރު އެންމެ އިސްވެރިޔާގެ މަގާމަށް މީހަަކު ހޯދަން އިއުލާނުކުރިތާ އެއް ދުވަސް ފަހުން، އެމަގާމަށް ތިމާވެއްޓާ ބެހޭ މިނިސްޓްރީގެ ކުރީގެ ޑެޕިއުޓީ މިނިސްޓަރ ހައްސާން މުހައްމަދު އައްޔަންކޮށްފި އެވެ.
ޗީފް އެގްޒެކެޓިވްގެ މަގާމަށް ހައްސާން އައްޔަނު ކުރިކަން އިއުލާނުކޮށް ސޯޝަލް މީޑިޔާގައި ކުރި ޕޯސްޓެގައި އީއާރުއޭ އިން ވަނީ މަރުހަބާ ކިޔާފައެވެ. އެއީ ސިޔާސީ މަގާމެއް ކަމަށް ވާއިރު، އީއާރުއޭ ހިންގުމުގައި އެންމެ އިސްކޮށް ހުންނަވާނީ ހައްސާން އެވެ.
ނަމަވެސް އީޕީއޭގެ ނަން އީއާރުއޭ އަށް ބަދަލުކުރުމާ އެކު، އެ ތަނުގެ އެންމެ އިސްވެރިޔާގެ މަގާމަކީ ޗީފް އެޑްމިނިސްޓްރޭޓަރު ކަމަށް ރައީސް އޮފީހުން ވަނީ ކުރިން އަންގާފައި ވެއެވެ. ނަމަވެސް ޗީފް އެގްޒެކެޓިވްގެ މަގާމަށް ބޭފުޅަކު އައްޔަން ކުރެއްވުމުން އެންމެ އިސްވެރިޔާއަކީ ހައްސާން ކަމަށް ވެއެވެ.
ކުރިން މިނިވަން އިދާރާއެއްގެ ގޮތުގައި އޮތް އީޕީއޭގެ ނަން ބަދަލުކޮށް، ސިޔާސީ ފަރާތްތަކުގެ ބާރު ހިނގާ ގޮތަށް އުފެއްދި އީއާރުއޭ އަށް ވެރިޔަކު ހޯދަން ކުރި އިއުލާނުގެ މުއްދަތު ހަމަވާނީ މި އޮގަސްޓް މަހުގެ 26 ވަނަ ދުވަހަށެވެ. ނަމަވެސް އިއުލާނު ކުރިތާ 48 ގަޑި އިރުވެސް ހަމަ ނުވަނީސް މިވަނީ އީއާރުއޭ އަށް ވެރިޔަކު އައްޔަނު ކޮށްފައެވެ.
އީޕީއޭގެ ބާރު ކެނޑޭ ގޮތަށް ރައީސް މުއިއްޒު ގެންނެވި ބަދަލު ތަކުގެ ސަބަބުން ގިނަ ބަޔަކު ވަނީ ކަންބޮޑުވުން ފާޅު ކޮށްފައެވެ.
