ހައުސިން މިނިސްޓްރީގައި ހިނގި އަލިފާނުގެ ހާދިސާގައި ހަތަރު އިދާރާއެއްގައި ހުރި މުހިއްމު މައުލޫމާތު ގެއްލިގެން ދިޔައީ އިސްވެރިންގެ އިހުމާލުން ކަމަށް ކުރީގެ ޓެކްނޮލޮޖީ މިނިސްޓަރު އަދި ޕީޕަލްސް ނެޝަނަލް ފްރޮންޓް (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

މަލީހު މިފަދައިން ވިދާޅުވީ ރޭ ޕީއެންއެފްއިން ބޭއްވި ޖަލްސާގައި ވާހަކަ ދައްކަވަމުންނެވެ.

މަލީހު ވިދާޅުވީ އޭނާގެ މިނިސްޓަރުކަމުގައި ޑޭޓާ ރައްކާކުރަން ގޮތް ފަހިކޮށްދީ ޚިޔާލާ މަޝްވަރާ ސަރުކާރުގެ ވެރިންނާ ރައީސް އޮފީހާވެސް ހިއްސާކުރެއްވި ކަމަށާ ނަމަވެސް އެކަން ބޮލާލާ ޖެއްސެވީ ކަމަށެވެ. މަލީހު ތުހުމަތު ކުރައްވާ ގޮތުގައި އެގޮތަށް ޑޭޓާ ރައްކާކުރަން ވެރިން އެއްބަސްނުވަނީ އެކަމުގެ ފަހަތުގައި ކޮރަޕްޝަނާ ވައްކަމުގެ ބޮޑެތި ކަންކަން ފަޅާއަރާފާނެ ތީ ކަމަށެވެ.

މީގެ އިތުރުން މިއަދު ރައްޔިތުންނާ ގުޅުން ހުރި މުހިއްމު ލިޔެކިޔުންތަކެއް ގެއްލިފާވާނެކަން ހާމަވާ ކަމަށާ އެގޮތުން މި ސަރުކާރު އައިސް ކޮރަޕްޝަނަށް މަގު ފަހި ގޮތަށް ފެށި ރަސްމާލެ ޕްރޮޖެކްޓްގެ ވެސް މައުލޫމާތު ހުންނާނެކަން ޔަގީނާ ގާތަށް ވިދާޅުވާން ކެރޭ ކަމަށާ އެގޮތުން އެ ކޮރަޕްޝަން ވެސް ދެން ބެލޭ ގޮތެއް ނޯންނާނެ ކަމަށް ވެސް މަލީހު ވިދާޅުވިއެވެ.

މަލީހު ވިދާޅުވި ގޮތުގައި، ރައްޔިތުންނާ ގުޅުން ހުރި އެކި ކަހަލަ ކަންކަމުގައި ދެން ސަރުކާރު ޖަވާބުދާރީ ކުރުވުން ވެގެން ދާނީ އުނދަގޫ ކަމަކަށެވެ.