ނިމިދިޔަ މެއި މަހު ވެސް އެންމެ ގިނައިން ފުލުހުންނަށް ރިޕޯޓުކޮށްފައިވަނީ ވައްކަމުގެ މައްސަލަތައް ކަމަށް އެ އިދާރާއިން މިއަދު ހާމަކޮށްފިއެވެ.

ކޮންމެ މަހެއް ނިމުމުން ފުލުހުންގެ އިދާރާއިން ޝާއިއުކުރާ ތަފާސްހިސާބުތަކުން މެއި މަހަށް ބަލާއިރު ޖުމްލަ 795 މައްސަލައެއް ވަނީ ރިޕޯޓުކޮށްފަ އެވެ. އޭގެ ތެރޭގައި ވައްކަމުގެ 244 މައްސަލައެއް ހިމެނެ އެވެ. އޭޕްރީލް މަހު ރިޕޯޓުކުރީ ވައްކަމުގެ 285 މައްސަލަ އެވެ.

އޭގެ އިތުރުން އެންމެ ގިނައިން މެއި މަހު ރިޕޯޓު ކުރީ މަގުމަތީގެ އެކްސިޑެންޓުތަކުގެ މައްސަލަތަކެވެ. މިދިޔަ މަހު 169 މައްސަލައެއް ރިޕޯޓުކޮށްފައިވެ އެވެ. އޭޕްރީލް މަހުގެ ތެރޭގައި އެކްސިޑެންޓުގެ 219 މައްސަލައެއް ރިޕޯޓުކޮށްފައިވެ   އެވެ.

މެއި މަހު ފުލުހުންނަށް ރިޕޯޓުކޮށްފައިވާ އެހެން މައްސަލަތަކުގެ ތެރޭގައި ގެއްލޭތަކެތީގެ 78 މައްސަލަ، މުދަލަށް ގެއްލުން ދިނުމުގެ 45 މައްސަލަ، ފޭރުމުގެ 36 މައްސަލަ، މާރާމާރީގެ 30 މައްސަލަ އަދި މަކަރާއި ހީލަތުގެ 25 މައްސަލައިގެ އިތުރުން ގެވެށި އަނިޔާގެ 18 މައްސަލަ ހިމެނެ އެވެ.

ތަފާސްހިސާބުތަކުން ދައްކާ ގޮތުގައި ބަދުއަހުލާގީ އަމަލުގެ 13 މައްސަލައަކާއި، ފޯޖަރީގެ 12 މައްސަލަ އަދި ޗެކް ބައުންސްވުމުގެ އެއް މައްސަލަ މިދިޔަ މަހު ފުލުހުންނަށް ރިޕޯޓުކުރި އެވެ.

ކުށުގެ އެކި އެކި މައްސަލަތައް ހުއްޓުމެއް ނެތި ދުވަހަކަށް ވުރެ ދުވަހެއް އިތުރުވަމުންދާއިރު، ކުށްވެރިންނަށް ހައްގު އަދަބު ދީ އިންސާފު ގާއިމުކުރަން މަސައްކަތްތަކެއް ކުރެވިގެންދާ ތަނެއް ނުފެނެއެވެ.