ފަތުރުވެރިކަމުގެ ސިނާއަތް ދަށަށް ދާ ދަނޑިވަޅުގައި ރާއްޖޭގެ ޓޫރިޒަމް މިނިސްޓަރު އިބްރާހިމް ފައިސަލް އުޅުއްވަނީ 6 މަސްދުވަހުގެ ވާހަކަދެއްކުމުގެ ކޯހެއް ފުރިހަމަ ކުރުމުގައި ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި މަލީހު ވިދާޅުވީ، ނިމިދިޔަ މޭ މަހަކީ ފާއިތުވި ތިން އަހަރާއި އަޅާބަލާއިރު ރާއްޖެއަށް އެންމެ މަދުން ފަތުރުވެރިން ޒިޔާރަތްކުރި މަސް ކަމަށެވެ.

އިތުރުން މިފަދައިން ފަތުރުވެރިކަމުގެ ސިނާއަތަށް މިހާ ބޮޑު ބަދަލެއް އައި އިރު ރާއްޖޭގެ ފަތުރުވެރިކަމާއި ބެހޭ ވަޒީރު ނެތްކަން މަލީހު ވަނީ ފާހަގަކުރައްވާފައިއެވެ.

މުޅި މެއި މަހަށް ބަލާނަމަ ޖުމްލަ 120،000 ފަތުރުވެރިންވެސް ރާއްޖެއަށް ޒިޔާރަތްކޮށްފައި ނުވާއިރު، ދުވާލެއްގެ މައްޗަށް ރާއްޖެއަށް ޒިޔާރަތް ކުރި ފަތުރުވެރިންގެ އަދަދު 2،000 ހަށް ވެސް ނާރާކަމަށް މަލީހު ވަނީ ފާހަގަކުރައްވާފައިއެވެ.

މަލީހު ވިދާޅުވީ މިއީ ވަރަށް ދެރަ ކަމެއް ކަމަށެވެ. އަދި ފަތުރުވެރިކަމުގެ ސިނާއަތް މިފަދައިން ދަށަށް ގޮސްފައިވާ ދަނޑިވަޅެއްގައި މި ސިނާއަތުގައި އިސް ރޯލެއް އަދާ ކުރާ އެމްއެމްޕީއާރުސީ މެނޭޖިން ޑިރެކްޓަރެއް ނެތްކަމަށްވެސް މަލީހު ވަނީ ފާހަގަކުރައްވާފައިއެވެ.