މަޖީދިއްޔާ ސްކޫލްގެ ދަރިވަރަކު ޓީބީއަށް ޕޮސިޓިވް ވެއްޖެއެވެ.
އެ ސްކޫލްގައި ކިޔަވަމުންދާ ދަރިވަރަކު ޓީބީއަށް ފައްސިވުމާއި ގުޅިގެން ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ޕްރޮޓޮކޯލް ފޮލޯކޮށް، އެޗްޕީއޭގެ ލަފާޔާ އެއްގޮތަށް އެ ވޭދަނައިގެ ކަންތައް ބަލަމުން ގެންދާ ކަަމަށް އެޑިޔުކޭޝަން މިނިސްޓްރީން ވަނީ ހާމަކޮށްފައެވެ.
ޓީބީ އަކީ ނުރައްކާތެރިކަން ބޮޑު ބަލިތަކުގެ ތެރެއިން ދުނިޔޭގައި އެންމެ ގަދައަށް ފެތުރޭ އެއް ބައްޔެވެ.
މީގެ 2 ވަރަކަށް އަހަރު ކުރިން ޓީބީ ޖެހިފައިވާ ސްކޫލް ކުއްޖެއް ވަނީ ފެނިފައެވެ.
އަނެއްކާވެސް މި ބަލި ފެނިފައި މިވަނީ ދުވަސްތަކަކަށް ފަހުގައެވެ.
މިއީ ފަސޭހައިން ފެތުރޭ ބައްޔަކަށް ވާއިރު ދުނިޔޭގެ ގިނަ ގައުމުތަކުގައި އެއީ ނައްތާލަން އުނދަގޫވެފައިވާ ބައްޔެއް ކަން ވެސް ފާހަގަކޮށްލެވެއެވެ.
ދުނިޔޭގައި ނިސްބަތުން ޓީބީ ޖެހޭ މީހުންގެ އަދަދުގެ 43 ޕަސެންޓު މީހުން ނިސްބަތްވަނީ ރާއްޖެ ހިމެނޭ އޭޝިއާ ބައްރަށެވެ. އެބަލި ޖެހި ރަނގަޅުނުކުރެވޭ މީހުންގެ 3/2 އަކީ ވެސް މި ސަރަހައްދުގެ މީހުން ކަމަށް ތަފާސް ހިސާބުތައް ދައްކައެވެ.
