ކުށްމަދު އަމާން މާހައުލެއް ރަށްރަށުގައި ގާއިމުކޮށް ރައްޔިތުން ހޭލުންތެރިކުރުވުމަށް މައުލޫމާތު ދިނުމަށް ފުލުހުން ކުރަމުންދާ މަސައްކަތްތަކުގެ ތެރެއިން ގއ. ކޮލަމާފުށި ގޭބިސީތަކަށް ޒިޔާރަތްކޮށް މައުލޫމާތު ދިނުމުގެ ޕްރޮގްރާމެއް ކުރިއަށް ގެންގޮސްފިއެވެ

މި ޕްރޮގްރާމާއި ބެހޭގޮތުން ފުލުހުންގެ ވެބްސައިޓުގައި ބުނެފައި ވަނީ، އަވައްޓެރި ފުލުހުންގެ ފަލްސަފާގެ ދަށުން ކޮލަމާފުށި ޕޮލިސް ސްޓޭޝަނުން މި މަހު 4 ވަނަ ދުވަހު ކުރިއަށް ގެންދިޔަ އެ ޕްރޮގްރާމްގައި، ވައްކަމާއި މަކަރާއި ހީލަތުން ފައިސާ ހޯދުމަށް މުއައްސަސާތަކުގެ ނަމުގައި ގުޅައިގެންނާއި މީސްމީޑިއާ މެދުވެރިކޮށް ފައިސާ ހޯދުމަށް ބޭނުންކުރާ އުކުޅުތަކާއި އެފަދަ ކަންކަމުން ސަލާމަތްވުމަށް ކުރެވިދާނެ ކަންކަމާ ގުޅޭގޮތުން މައުލޫމާތުދީފައިވެއެވެ.

މީގެއިތުރުން، މީސްމީޑިއާ އަދި އީމެއިލް އައިޑީ ބޭނުން ކޮށްގެން ފޯނަށް އަންނަ މެސެޖު އެހެން މީހުންނަށް ހިއްސާނުކުރުމަށް މި ޕްރޮގްރާމުގައި ނަސޭހަތްތެރިވެފައިވާއިރު، މި ޕްރޮގްރާމްގެ ތެރެއިން، ކޮލަމާފުށީގެ ގޭބިސީތަކުގެ އިތުރުން މީހުން ގިނައިން އެއްވާ ސަރަހައްދުތަކަށް ޒިޔާރަތްކޮށްވެސް ފުލުހުން ވަނީ މައުލޫމާތު ހިއްސާކޮށްފައިއެވެ.

މަކަރާއި ހީލަތުގެ މައްސަލަތަކުން ރައްޔިތުން ރައްކާތެރިކުރުމަށް މައުލޫމާތު ދިނުމުގެ ޕްރޮގްރާމްތައް ފުލުހުން އަންނަނީ ހިންގަމުންނެވެ.