ދިވހެި ރައްޔިތުންގެ ޑިމޮކްރަސީއަށް އޮންނަ ޝައުގުވެރިކަން ކުޑަވާކަމަށް އިލެކްޝަންސް ކޮމިޝަން- އީސީގެ ރައީސް ފުއާދު ތައުފީގު ވިދާޅުވެއްޖެއެވެ.

ޕީއެސްއެމް ނިއުސްގެ ޕުރޮގްރާމެއްގައި ވާހަކަފުޅުދައްކަވަމުން ފުއާދު ވިދާޅުވީ ކޮންމެ އިންތިޚާބެއްގައި ވޯޓުލާމީހުންގެ އަދަދު މަދުވަމުން އަންނަ ކަމަށެވެ.

މިކަމާ މެދު ކަންބޮޑުވުން ފާޅުކުރައްވާ ފުއާދު ވިދާޅުވީ މިކަމަށް ހައްލު ގެނައުމަށް މަސައްކަތް ކުރަން ޖެހޭކަމަށާއި މިކަމާމެދު ރައްޔިތުންގެ ޝައުގު އަލުން އާލާކުރަން ޖެހޭކަމަށެވެ.

އެގޮތުން ވޯޓާސް ޓާންއައުޓް އިތުރު ކުރުމަށްޓަކައި، ވޯޓުލާ ރައްޔިތުންނަށް ފަސޭހަވާނެ ގޮތަށް އިންތިޒާމުތައް ހަމަޖެއްސުމުގެ މަސައްކަތް އީސީން ކުރަމުން އަންނަ ކަމަށް ފުއާދު ވިދާޅުވިއެވެ.

އަންނަ މާޗު މަހު ބޭއްވުމަށް ހަމަޖެހިފައިވާ، މަޖިލިސް އިންތިހާބު ރޯދަ މަހާ ދިމާވާތީ ވޯޓުލާން ކަނޑައަޅާފައި އޮންނަ ވަގުތާ ގުޅޭގޮތުން އަންނަ ހަފުތާގައި ގައުމީ ލަފާދޭ ކޮމިޓީއާއި ބައްދަލުކޯށް އެކަމާގުޅޭޮތުން މަޝްވަރާ ކުރުމަށް އެ ކޮމިޝަނުން ނިންމާފައިވާކަންވެސް ފުއާދު ވަނީ ހާމަކޮށްފައިއެވެ.

އެންމެ ފަހުން ރާއްޖޭގައި ބޭއްވުނު މާލެ ސިޓީ ކައުންސިލްގެ ބައި އިލެކްޝަން އިންތިހާބުގައި ވޯޓުލުމުގެ ހައްގު 54،680 މީހުންނަށް ލިބިފައިވީނަމަވެސް، ވޯޓުލާފައި ވަނީ 17،410 މީހުންނެވެ.

މިއީ އެ އިންތިޚާބުގައި ވޯޓު ލެވޭ އާބާދީގެ 31.84 އިންސައްތަ މީހުންނެވެ. އަދި 17،410 މީހުންގެ ތެރެއިން 402 މީހެއްގެ ވޯޓު ވަނީ ބާތިލްވެފައެވެ.