ބެންކޮކަށް މިއަދުގެ މެންދުރު ވަގުތެއްގައި އައި ބާރުގަދަ ބިންހެލުމާއެކު ގިނަ އިމާރާތްތަކެއް ބިމާ ހަމަވެފައިވާއިރު އެ ތަނުގައި ދިރިއުޅެމުންދާ ގިނަ ދިވެހިންނާ އަދި އެ ގައުމަށް ކަނޑައަޅުއްވާފައި ހުންނަވާ ދިވެހި ސަފީރު، ފުއާދު ތައުފީގުގެ އާއިލާވެސް ތިބި މަގުމަތިވެފައި ކަމަށް މައުލޫމާތު ލިބިއްޖެއެވެ.

ބެންކޮކުގައި ހުރި ދިވެއްސަކު "ތޭރަ އޮންލައިން" އަށް މައުލޫމާތު ދެމުން ބުނެފައިވަނީ ބިން ހެލުމުގެ އަސަރު ކުރި ވަގުތަކީ ބިރުވެރި ވަގުތުކޮޅެއް ކަަމަށާ ގިނަ ބަޔަކު ތިބީވެސް އުސް އިމާރާތްތަކުގެ އެތެރޭގައި ކަމަށެވެ. ބިން ހެލުން އައުމާ އެކު އިމާރާތްތަކުން ނުކުންނަން އެންމެން ވެސް ބޭނުން ކުރަން ޖެހުނީ ސިޑި ކަމަށަ އެހެންކަމުން ތަނުން ނުކުންނަން ގިނަ އިރުތަކެއް ހޭދަވީ ކަމަށްވެސް އެ މިހާ ބުނެފައިވެއެވެ.

އިތުރަށް ކިޔައިދެމުން އެމީހާ ބުނެފައިވާ ގޮތުގައި ސަފީރު ފުއާދުއާ އަނބިކަނބަލުން ޒީދާ ހުސެއިންވެސް ތިއްބެވީ މަގުމަތީ ކަމަށާ ސަފީރު ގެންދަވަނީ ގާތުން ދިވެހިންގެ ހާލު ބަލާ އޮޅުންފިލުވުމަށް މަސައްކަތްކުރައްވަމުން ކަމަށެވެ.

މައުލޫމާތު ލިބިފައިވާ ގޮތުގައި ސަފީރު ފުއާދު ހުންނެވީ ބިންހެލުން އައި ވަގުތު ތައިލެންޑް އެމްބަސީ ހުންނަ އިމާރާތުގައި އޭނާގެ އޮފީހުގައެވެ.

މިކަމާ ގުޅިގެން ފުއާދު ވިދާޅުވެފައި ވަނީ އެއީ ބާރު ގަދަ ބިންހެލުމެއް ކަމަށާ ބިރުވެރި ވަގުތުކޮޅެއް ކަމަށެވެ. އަދި މިވަގުތު ހުރިހާ ދިވެހިންގެ ހާލުވެސް ރަގަޅު ކަމަށާ ވަރަށް ގާތުން ދިވެހިންގެ ހާލު ބަލަމުން ގެންދާ ކަމަށްވެސް ފުއާދު ވިދާޅުވިއެވެ.

މިޔަންމާ އަށާ ތައިލެންޑް އައި ބިންހެލުމާ ގުޅިގެން ތައިލެންޑްގެ ސަރުކާރުން ވަނީ ކުއްލި ނުރައްކަލުގެ ހާލަތު އިއުލާނުކޮށްފަ އެވެ. ތައިލެންޑުގެ ބޮޑު ވަޒީރު ޕެޓޮންގްޓަރން ޝިނާވަޓްރާ ވަނީ ސްޓޭޓް އޮފް އިމަޖެންސީ އިއުލާނުކޮށްފައެވެ.

މިކަމާ ގުޅިގެން ފޮރިން މިނިސްޓްރީއިން ބުނެފައިވަނީ މިހާތަނަށް ލިބުނު މައުލޫމާތަށް ބަލާއިރު ތައިލެންޑުގައި ތިބި ދިވެހިންގެ މީހަކަށް ގެއްލުމެއް ލިބިފައި ނުވާ ކަމަށެވެ. އަދި މިޔަންމާ ގައި ދިވެއްސަކު ހުރިތޯއާ އަދި ހުރިނަމަ ހާލުވެސް އޮޅުން ފިލުވުމުގެ ަމސައްކަތް ސަރުކާރުން ކުރަމުން ގެންދާ ކަމަށްވެސް ބުނެފައެވެ.

މީގެ އިތުރުން އެ ގައުމުތަކުގައި ކުއްލި ނުރައްކަލުގެ ހާލަތު އިއުލާންކޮށްފައިވާއިރު އެ ގައުމުތަކުގެ ސަރުކާރުތަކުގެ އެންގުންތަކަށް އަމަލުކުރުމަށް ވަނި އިލްތިމާސްކޮށްފައެވެ. އަދި ތައިލެންޑުގައި ތިބި ދިވެހިންގެ ތެރެއިން އިތުރު އެހީ ނުވަތަ މައުލޫމާތު ސާފުކުރަން ބޭނުންވާ ފަރާތްތަކުން ތައިލޭންޑް އެންބަސީ ނަންބަރު: +66611766502 އަދި ޚާރިޖީ ވުޒާރާގެ ނަންބަރަށް +9607983400 ގުޅުމަށް އެދިފައެވެ.

މައުލޫމާތު ލިބިފައިވާ ގޮތުގައި ބެންކޮކުގައި އެއްވެސް އިމާރާތެއްގެ ތެެރެއަށް ވަނުމުގެ ހުއްދައެއް ނެތުމުން ހުރިހާ އާއިލާތައްވެސް ތިބީ މަގުމަތީގައެވެ.

އިންޑިއާގެ ބިންހެލުންތައް މޮނިޓަރ ކުރާ އިދާރާއިން ބުނެފައިވާ ގޮތުގައި މިޔަންމާއަށް ގިނަ ބިންހެލުންތަކެއް ވަނީ އައިސްފައެވެ. 5.0 އިން 7.0 އާއި ދެމެދުގެ ބިންހެލުންތައް އައިސްފައިވާއިރު، އެ އިދާރާއިން ބުނި ގޮތުގައި އެންމެ ބާރު ބިންހެލުމަކީ 7.2 މެގްނިޓިއުޑް ބާރުމިނުގައި އައިސްފައިވާ ބިންހެލުމެކެވެ.

ނަމަވެސް އެމެރިކާއާއި ޗައިނާގެ ބިންހެލުންތައް މޮނިޓަރ ކުރާ އިދާރާތަކުން ބުނީ ބިންހެލުން އައިސްފައިވަނީ 7.7 މެގްނިޓިއުޑް ބާރުމިނުގައި ކަމަށެވެ