20 ވަނަ ރައްޔިތުންގެ މަޖިލިސް ފެނިގެން ދަނީ 19 ވަނަ ރައްޔިތުންގެ މަޖިލީހުގެ ކޮޕީއެއްގެ ގޮތުގައި ކަމަށް ޕީއެންއެފްގެ ސެނެޓާރ ޑރ. އަބްދުﷲ އިބްރާހިމް ވިދާޅުވެއްޖެއެވެ.

ޑރ. އަބްދުﷲ މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

20 ވަނަ ރައްޔިތުންގެ މަޖިލީހުގެ ސުޕަރ މެޖޯރިޓީ ލިބިގެން މެނުވީ ރައްޔިތުންނަށް ކޮށްދޭން ޚިދުމަތަށް ބޭނުންވާ ގާނޫނުތަކާ ބިލުތައް ފާސްނުވާނެ ކަމަށަ އެހެން ކަމުން ރައީސް ޑރ. މުހައްމަދު މުއިއްޒުގެ ރިޔާސީ ވައުދުތައް ފުއްދުމަށް މަޖިލިސް މެޖޯރިޓީ ބޭނުންވާނެ ކަމަށް ސަރުކާރުން ބުނުމުން ރައްޔިތުންވަނީ މަޖިލިސް އިންތިޚާބުގައި މެޖޯރިޓީ ޕީއެންސީއަށް ދީފައެވެ.

ނަމަވެސް އެ މެޖޯރިޓީ އޮވެ ބޭއްވި ރައްޔިތުންގެ މަޖިލިހުގެ ހަތަރު ވަނަ ޖަލްސާގައިވަނީ ދިރިއުޅުމަށް ދޫކުރާ ބަންޑާރަ ގޯތި ލިބޭ ފަރާތްތައް ކަނޑައަޅައި ގޯތި ލިބޭ ފަރާތްތަކުގެ ދާއިމީ ލިސްޓު ގެޒެޓްކުރާ ތާރީހުން ފެށިގެން ގިނަވެގެން ހަ މަސްދުވަހުގެ ތެރޭގައި ގޯތި ލިބުނު ފަރާތްތަކަށް އެ ގޯތި ދޫކުރި އިދާއަކުން ގޯތި ހަވާލުކުރަންވާނެ ކަމަށް ބުނެ ހުށަހެޅި ބިލު ބޭރުކޮށްލާފައެވެ.

އެކަމަށް އިޝާރާތްކުރައްވާ ޑރ. އަބްދުﷲ ކުރެއްވި ޕޯސްޓުގައި ވަނީ، އެމްޑީޕީގެ ސްޕަރމެޖޯރިޓީއާ މިއާހުރި ތަފާތަކީ ކޮބައިތޯ ސުވާލު އުފައްދާފައެވެ.

ޑރ. އަބްދުﷲ އިތުރަށް ވިދާޅުވީ، 19 މަޖިލިހުގައި އެމްޑީޕީގެ ސުޕަރ މެޖޯރިޓިއިންވެސް ކަން ކުރަމުްނ އައި އުސޫލަކީ މުހިއްމު ކަމެއް ވިއްޔާ ހޫރާލާފައި ބޭރުކުރުން ކަމަށާ މިހާރުވެސް ފެންނަމުން ދަނީ ހަމަ އެމަންޒަރު ކަމަށެވެ. އެހެންކަމުން20 މަޖިލިސް ފެނިގެން ދަނީ 19 ވަނަ މަޖިލީހުގެ ކޮޕީއެއްގެ ގޮތުގައި ކަމަށް ޑރ. އަބްދުﷲ ވިދާޅުވެފައިވެއެވެ. މީގެ އިތުރުން 20 ވަނަ މަޖިލިސް ހިނގަމުން ދާނީ ހަމަ 19 ވަނަ މަޖިލިސްވެސް ހިންގަމުން ދިޔަ މަގުން ކަމަށް ވެސް ޑރ. އަބްދުﷲ ވިދާޅުވިއެވެ.

މީގެ އިތުރުން ޑރ. އަބްދުﷲ ވަނީ މަސްވެރިން ކިރާ މަހަށް 48 ގަޑިއިރުވެސް ނުވަނީސް ހަމަ އަގު ދޭނެ ކަމަށް ބުނެ އައި ސަރުކާރން މަސްވެރިންގެ ފައިސާ ނުދީ އެތައް ދުވަހެއްވެފައިވާތީ އެ ފައިސާކޮޅު ހޯދަން ބަޔަކު ބިލެއް ވައްދާފިއްޔާ ބޭރު ނުކުރާނެތޯވެސް ސުވާލު އުފައްދާފައެވެ.