19 ވަނަ މަޖިލީހުން ރުހުން ނުދޭން ފާސްކުރި ތިން ވަޒީރުންނަށް ރުހުން ދޭން 20 ވަނަ ރައްޔިތުންގެ މަޖިލީހުގެ ކަމާގުޅޭ ކޮމިޓީން ފާސްކޮށްފިއެވެ.
އެ ތިން މިނިސްޓަރުންނަކީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އެޓާރނީ ޖެނަރަލް އަހުމަދު އުޝާމް އަދި ހައުސިން މިނިސްޓަރު ޑރ. އަލީ ހައިދަރެވެ.
ނިމިދިޔަ މަޖިލީހުން ރުހުން ނުދިން ނަމަވެސް ރައީސް ޑރ މުއިއްޒު ވަނީ އެ ތިން ބޭފުޅުން އަލުން އެ މަގާމުތަކަށް އައްޔަން ކުރައްވާފައެވެ.
އަދި ރުހުން ހޯދުމަށް އަލުން އެ ތިން ވަޒީރުންގެ ނަންތައް މަޖިލީހަށް ފޮނުވިއެވެ.
ނިމިދިޔަ މަޖިލިސް ދައުރަށް އެ މައްސަލަ ފޮނުވާފައި ވީ ނަމަވެސް މައްސަލަ އެޖެންޑާކޮށް، ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވާފައިވަނީ އައު ދައުރުގައި މި ހަފްތާގެ ތެރޭގައިކަން ފާހަގަކޮށްލެވެއެވެ.
ބުދަ ދުވަހުގެ ރޭ ކުރިއަށް ދިޔަ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީން ތިން ވަޒީރުންގެ ވެސް ވަޒީރު ކަމުގެ ޝަރުތު ހަމަވާ ކަމަށާއި މައްސަލައެއް ނެތް ކަމަށް ބަލައި ރުހުން ދޭން ފާސްކޮށްފައިވަނީ ހާޒިރުވެ ތިއްބެވި ނުވަ މެމްބަރުންގެ ތެރެއިން ހަތް މެންބަރުންގެ ވޯޓުންނެވެ.
ދެކޮޅަށް އިދިކޮޅުގެ އެއް މެމްބަރަކު ވޯޓު ދެއްވާފައިވާކަން ވަނީ ހާމަވެފައެވެ.
