މަސްވެރިންނަށް ފައިސާ ނުދީ ގިނަ ދުވަސްވަމުންދާތީ "ބޮޑު ކަންނެލި މަސްވެރިންގެ ޔޫނިއަނުން" ކަންބޮޑުވުން ފާޅުކޮށްފިއެވެ.

އެ ޔޫނިއަނުން ކަންބޮޑުވުން ފާޅުކޮށްފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން އެ ޕޯސްޓްގައި އެ ޔޫނިއަނުން ވަނީ އަދުގެ މަސްވެރިކަމާ ބެހޭ ވަޒީރު އަހުމަދު ޝިޔާމް، 19 ވަނަ ރައްޔިތުންގެ މަޖިލީހުގައި ނައިފަރު ދާއިރާ ތަމްސީލް ކުރެއްވި އިރު މަސްވެރިންގެ ހައްގުގައި ދައްކަވާފައިވާ ވާހަކައިގެ ވީޑިޔޯ އެއް ހިއްސާ ކުރައްވާފައެވެ.

އަދި އެ ޕޯސްްޓްގައި އެ ޔޫނިއަނުން ވަނީ ރައީސުލްޖުމްހޫރިއްޔާ ޑރ މުހައްމަދު މުއިއްޒު އަދި މިނިސްޓާރ ޝިޔާމް ޓެގްކޮށް، ރިޔާސީ އިންތިޚާބްގެ ކެމްޕެއިން ތެރޭ މަސްވެރިންނަށް ވީ ވައުދު ފުއްދުމަށް ގޮވާލާފައެވެ.

މަސްވެރިން މަސް ކިރާތާ 48 ގަޑި އިރު ތެރޭ ފައިސާ ދޭނެ ކަމުގެ ވައުދާއެކު ވެރިކަމަށް އައުމަށްފަހު ފެނިގެންދަނީ މަސްވެރިން ބާނާ މަހަށް މަސް ދެ މަސް ވެގެން ދާއިރުވެސް ފައިސާ ނުދެވިގެން އުޅޭ މަންޒަރެވެ.

އެގޮތުން އެންމެ ފަހުން މަސްވެރިންނަށް ފައިސާ ދީފައިވަނީ އޭޕްރިލް މަހުގެ 22 ވަނަ ދުވަހުއެވެ.

އެއީ 20 ވަނަ ރައްޔިތުންގެ މަޖިލިސް އިންތިޚާބާ ދިމާކޮށް މަސްވެރިންގެ ވޯޓު ހޯދުމުގެ ނިޔަތުގައި ސަރުކާރުން ކުރި ކަމެއްގެ ގޮތުގައި ބައެއް މަސްވެރިން އަންނަނީ ސިފަ ކުރަމުންނެވެ.

އަދި މަސްވެރިންނަށް ވީއެންމެ އަވަހަކަށް ފައިސާ ދީ ބެކްލޮގް ކްލިއާރ ކޮށްދެއްވުމަށް ވެސް މަސްވެރިން އަންނަނީ ގޮވާލަމުންނެވެ.